4
Au fee selu' conto esa. Kalu ana' esa papa na maten, sona ria nanuu haak sipo posaka' neme papa na mai. Tehuu kalu teu na bei ta dai, sona ana bei ta bisa sipo posaka' sira, leo mae neu' ko basa sira dadi ria nuu-enan. Huu fo kalu teu na bei ta dai, ria sama leo' ata a de ta nanuu haak fo hapu ria malaka na hata-heton. 2 Huu ria naa, muste hapu lahenda fo urus ria no posaka nara. Ana' ria muste tuka mana urus a hihii-nanaun, losa ledo-fai fo papa na naetu', besa' ko ana bole sipo na ria posakan.3 Leo' naa boe neu' ita. Tepo' fo Yesus Kristus bei ta mai, ita bei sama leo' ana aana' ria. Ita bei lili-ne'a to dae-bafo' a hihii-nanaun, sama leo' ata esa. 4-5 Tehuu naraa no ledo-fain, te Manetualain fee Ana Na mai dadi lahenda dae-bafo', ela lahenda dae-bafo' a boe bisa nana so'u dadi reu' Manetualain ana nara. Ria Ana Na, nasoda tuka lahenda Yahudi ra atoran agama na, fo ela bisa po'i-tata na basa lahenda fo fai a ulu na nanaheke' ro atoran ria.
6 Huu no emi dadi Manetualain ana nara, de Ana fee Ana Na Dula-dale Na maso' nai emi dale mara. No ria naa, emi manuu haak maloo Manetualain mae, “Papa Boki'”. 7 De besa' ia emi ta ata, fo ta manuu haak sipo posaka'. Tehuu emi dadi meu' Manetualain anan, de manuu haak sipo basa posaka fo ri' Ana helu.a
Paulus dale na doda' neu' lahenda Galatia ra
8 Maulu na, tepo' fo emi bei ta malela' Manetualain, emi fee ao-ina mara dadi ata meu' hihii-nanau' ta matetu' ara, ela io-oa ma tuka si. 9 Tehuu besa' ia, emi malela' Manetualain so. Lena-lena' bali au afada ae, Manetualain nalela' emi. Ubea' taon losa' emi matafali selu' meu' dudu'a-aafi' dae-bafo', leleo-lala'o sosoa-raraa taa' a ma ta nanuu kuasa? Emi nau lili-ne'a mo hihii-nanau' sira, fo dadi ata fee si bali, do? 10 Au amanene rae, emi malala'o atoran la'e-neu' agama a fai malole nara tuka ledo-fai, bula' ma teu', ela tao mamaho'o Manetualain dale Na. 11 Ia ri' tao na au dale ka doda'! Boso losa doo-naru basa ia, au sota aan seli anori-afada emi a, nana mana dadi taa'.
12 Toranoo susue kara emin! Au hule emi masoda po'ilota' meme hihii-nanau' sira mai, sama leo' au. Au po'ilota' eme atoran agama, sama leo' emi fo ta Yahudi. Maulu na tepo' fo ita bei sama-sama a, au ta parnaa hapu susa-lela neme emi mai. 13 Emi basa bubulu' fai fo ri' au mai tui-beka masososa Tutui Malole neu' emi a, au ao-ina ka hedis a. 14 Leo mae leo' naa, tehuu emi ta tipa-tola' au, nana huu emi sipo' au, sama leo' au nana Manetualain eila'o-limalopen neme nusatetu-ikutema' a mai. Lena-lena' bali emi sipo' au, sama leo' au nana Yesus Kristus. 15 Tepo' ria ita basa tamaho'o tan seli. Tehuu, ubea' taon, de besa' ia ta leo naa' so'? Sekonaa te tepo' ria emi sue ma au seli, losa' emi sadia nau edo ma mata deke mara fo fee au. 16 Tehuu besa' ia emi bate mae au nana emi musu-noom, huu fo au dedea roo-tetu' fee emi, do?
17 Manatipu-manadai' ara ta nau au atia' oo emi fa, de ara makate fufudi-lele'o emi, fo tuka lahenda Yahudi a atoran agama na katema'. Ara nau emi tuka noi sira hihii-nanaun. 18 Tehuu kalu emi makate tao basa hihii-nanau' malole, sona ria malole a boe! Leo mae au sama-sama oo emi, do ta'a boe, tao noi malole a.
19 Ana susue kara emin! Besa' ia, au oi-tao sota aan seli fee emi, losa' au sama leo' ina' fo nameda boboki'. Au ta hahae nonoi-tatao' a, losa emi dale mara sama leo' Kristus dale Na. 20 Tehuu besa' ia, au ta bubulu' tao emi leo' bea so'! Au ahii' nau uu dedea mata' oo emi, ela au boso' dedea no hara bera' leo' ia.
Paulus fee dedea nasasama' pake tutui' la'e-neu' Hagar ana na, ma Sara ana na
21 Kalu emi nau masoda tuka lahenda Yahudi ra atoran agama na, sona malole lena' emi bubulu' maulu' atoran ria maksud na dei. 22 Nai Manetualain Susura Makamoi Na hapu tutui' la'e-neu' ba'i Abraham ana manen dua si. Ana hapu ana' esa neme ata na mai, ma esa bali neme sao na mai.b 23 Ata ria, boki na ana na, nana huu tuka lahenda dae-bafo' a hihii-nanaun. Tehuu sao na, boki na ana na, nana huu Manetualain helu mema' neu' Abraham.
24 Ina' sira dua dadi dedea nasasama', de natudu hehelu-barataa' dua fo ri' Manetualain helu-barataan no lahenda dae-bafo' a. Ana tao hehelu-barataa' esa no ba'i Musa nai lete Sinai, tepo' fo Ana naonda lahenda Yahudi ra atoran agama nara. Lahenda fo nanaheke' ro atoran agama, sona sira boe ata sama leo' Hagar. 25 Mamana' fo nai lete Sinai, nai dae Arab, sama leo' Hagar. Basa lahenda Yerusalem, fo ri' besa' ia bei nanaheke' ro atoran agama Yahudi, sira dadi ata sama leo' Hagar.
26 Tehuu hehelu-barataa' feke' a, natudu kota Yerusalem feke' esa nai nusatetu-ikutema' a. Manetualain anan fo ri' leo rai naa, ata ta sira fa. Sira nana lahenda po'iloa', fo ta nanaheke' ro atoran agama sira. Huu ria naa, sira sama leo' ita maman Sara, Abraham sao na. 27 Nai Manetualain Susura Makamoi Na mana dui' nae:
“Ina' fo ri' ta bisa boki-lae!
Mamaho'o leo!
Ina' fo ri' ta mameda hedi boboki'!
Soda mamaho'o-matadale leo!
Ina' fo ri' dale na nalulutu', nana huu sao na ta tao dale' neu' ana,c
neu' ko ana hapu ana' dodou' lena neme ina' fo ri' nanuu sao'.”d
28 De toranoo kara emin! Fai a ulu na Manetualain helu nae fee Abraham ana'. Tehuu doo' a besa' ko Manetualain tao tuka hehelu Na, de Sara boki Isak fee Abraham. Ita sama leo Isak, nana huu Manetualain helu nae fee Abraham tititi-nonosi feke'. 29 Ata a anan fo ri' bokin huu no lahenda dae-bafo' a hihii-nanaun, nambau-ina boe ma ana tao nahehedi' Isak fo ri' bokin huu no Manetualain Dula-dale Na hihii-nanaun. Ria boe sama leo' hata fo dadi nai besa' ia.e 30 Manetualain Susura Makamoi Na mana dui' nae, “Usi heni ata ria no ana na. Huu fo ata ria ana na ta nanuu haak sipo posaka'. Noi sao kabi na ana na nanuu haak.”f
31 De leo ia' toranoo kara emin! Ita ta sama leo' ata a ana na, nana huu ita ta nanaheke' to lahenda Yahudi ra atoran agama na. Ita sama leo' ana' neme Abraham sao kabin, nana huu ita tamahere Yesus Kristus.