Manetualain sipo' ita no malole, nana huu ita tamahere Yesus Kristus
3
Lahenda Galatia emin! Maulu na au afada mata' emi, la'e-neu' Yesus Kristus mamate Na nai ai kake' a. Tehuu besa' ia lahenda edi-fule mamata' emi! Emi pakanaa maan seli! 2 Au nau atane noi hihii-nanau' esa. Emi sipo Manetualain Dula-dale Na, nana huu emi tuka atoran agama, do? Ta'a, hete! Ria Dula-dale Na onda neu' emi, nana huu emi mamahere Tutui Malole fo ri' mamanenen. 3 Ubea' taon, de emi pakanaa maan seli' leo' naa? Maulu na emi masoda tuka Dula-dale Malalao-malalafu' a hihii-nanaun. Tehuu besa' ia emi matafali selu' fo masoda tuka lahenda dae-bafo' a hihii-nanaun. 4 Tepo' fo emi besa' ko mulai mamahere Kristus, emi hapu eese-rurumu' dodou'. Boso losa basa sira dadi sosoa-raraa taa'! (Sekonaa te, mamahere Kristus ta bisa sosoa-raraa taa'.) 5 Tepo' fo Manetualain fee Dula-dale Na, ma natudu tanda heran rupa' nai emi matam, emi afi mae Ana tao leo naa', nana huu emi tuka atoran agama, do? Ta'a, hete! Ana tao leo naa', nana huu emi mamahere Tutui Malole fo ri' mamanenen.6 Mafarene lahenda Yahudi ra ba'in Abraham. Mana dui' nai Manetualain Susura Makamoi Na nae, “Huu no namahere Manetualain, de Ana sipo' naan no malole.”a
7 De emi muste bubulu' matalolole hihii-nanau' ia! Lahenda fo namahere sama leo' Abraham, sona tebe-tebe sira dadi Manetualain lahendan.b 8 Manetualain nafada mema' nai Ria Susura Makamoi Na dale' nae, neu' ko Ana sipo' lahenda nusa feke' ara boe, kalu ara ramahere Ni. Fai a ulu na, Ana nafada mema' Tutui Malole a neu' ba'i Abraham nae, “Neu' ko basa lahenda nusa' nai dae-bafo' a hapu ua-nale' nana huu o.”c 9 Huu no Manetualain hehelu-barataa Na, de Ana fee ua-nale' neu' basa lahenda fo ramahere Ni, sama leo' Ana fee neu' Abraham.
10 Lahenda fo tuka atoran agama, ela Manetualain sipo' ana no malole, sona ana muste lepa bera' atoran sira katema', sama leo' ana hapu kutuk. Mana dui' nai Manetualain Susura Makamoi Na dale' nae, “Lahenda fo ta tuka naroo atoran agama losa leo lulutu-raraen, ana hapu kutuk!”d 11 Tehuu tea na, Manetualain ta sipo' lahenda, nana huu ana tuka atoran agama. Huu fo mana dui' nae, “Lahenda muste namahere Au, besa' ko Au sipo' ana no malole sama leo' lahenda dale roo-tetu', ela ana hapu soda matetu'.”e
12 Kalu lahenda nau nasoda tuka atoran agama a hihii-nanaun, ana muste tao tuka basa-basan losa lulutu-raraen! Manetualain nafada mema' nai Susura Makamoi' a nae, “Lahenda fo ri' nau nasoda tuka atoran, neu' ko ana nasapute noi atoran sira.”f
13 Tehuu Kristus bae etu, de po'i-tata na ami meme atoran agama fo ri' nanaheke' neu' ami. Maulu na, atoran agama ria bera na seli bati neu' ami sama leo' lahenda fo ri' hapu kutuk. Tehuu besa' ia, Ramatua Yesus so'u heni kutuk ria neme ami mai so. Ita bubulu' ria, nana huu mana dui' nai Susura Makamoi' a nae, “Lahenda fo ri' mana londa naisa' nai ai sele, ana hapu kutuk.”g 14 Tepo' fo Yesus Kristus maten, ela po'i-tata ita a, ua-nale' fo Manetualain feen neu' Abraham, onda nai lahenda nusa feke' ara boe. No ria naa, basa lahenda fo ramahere Kristus bisa sipo' Manetualain Dula-dalen fo ri' Ana helu.
Manetualain homu nahere hehelu-barataa Na
15 Toranoo kara emin! Besa' ia au nau pake conto neme ita masoda bale fai na. Kalu lahenda dui' na susura hata posaka', boe ma ana lima-ree nade na neu' susura' ria, sona dadi susura' tetea'. Lahenda feke' ta bisa ratika hata fo mana dui' nai susura' ria, ma ta bisa dui' tamba selu' hata-hata esa neu boe'. 16 Leo' naa boe, tepo' fo Manetualain tao hehelu-barataa' no Abraham ma tititi-nonosi nara. Manetualain ta nae, “Au tao hehelu-barataa' ia, oo tititi-nonosi mara”, nana huu Ana ta helu-barataa soa-neu' lahenda dodou'. Tehuu Ana helu-barataa fee noi Abraham tititi-nonosin lahenda esa' a, ri' Kristus.h 17 Leo ia': Manetualain tao naulu' hehelu-barataa' no ba'i Abraham. Boe ma teu' natun haa telu hulu, besa' ko Ana naonda atoran agama fee lahenda Yahudi ra, tuka sira ba'in Musa. Leo mae leo' naa, tehuu Manetualain ta natika hehelu-barataa', fo ri' Ana tao naulu' ana.i 18 Manetualain ta fee Abraham ua-nale', nana huu ana tao tuka atoran. Tehuu Ana fee ua-nale' nana huu Ana helu mema' neme ulu' mai, nau fee hihii' neu' Abraham. Ria sama leo' ana' esa sipo posaka neme papa na. Ana sipo nana huu papa na helu mema', ta huu ana' ria tao tuka atoran a.j
19 Besa' ia au atane leo ia': kalu Manetualain sipo' ba'i Abraham no malole, nana huu ana namahere, tao leo' bea de Manetualain fee tamba atoran agama tuka ba'i Musa bali? Ana tamba atoran agama, fo nanori-nafada lahenda dae-bafo' a la'e-neu' sira sala-siko rupa nara. Ria maksud na ela lahenda dae-bafo' a nasoda tuka atoran ria hihii-nanaun, losa Abraham tititi-nonosin esa mai. Kalu tititi-nonosi' ria, ri' Kristus mai, sona ta parluu atoran ria so'.
Tepo' fo Manetualain fee atoran agama Yahudi a, Ana ta fee mata' fa. Tehuu Ana pake eila'o-limalope nai nusatetu-ikutema' a, boe ma ara renin mai de feen neu' ba'i Musa lima na, besa' ko Musa fee ni neu' lahenda Yahudi ra. No ria naa, Musa dadi lelete soa-neu' Manetualain no Ria lahenda Nara. 20 Tehuu tepo' fo Manetualain tao hehelu-barataa' no Abraham, Ana nafada matan ta nadenu lahenda. No ria naa, ita bubulu' tae, Manetualain hehelu-barataan, kahere' lena neme atoran sira.
Atoran agama a nanori-nafada lahenda dae-bafo' a la'e-neu' sira sala-siko rupa nara
21 Atoran fo Manetualain feen neu' ba'i Musa ta nasei' no Ria hehelu-barataan. Tehuu leo ia': kalu tebe-tebe lahenda dae-bafo' a bisa tao tuka atoran ria tantu Manetualain bisa sipo' ana no malole, fo ela ana bisa nasoda, sona atoran lahenda Yahudi ra bisa paken. Tehuu ta bisa, nana huu leo mae lahenda dae-bafo' a tao tuka atoran lahenda Yahudi ra, ta hapu esa tao la'e Manetualain dale Na, ela Ana sipo' naan no malole. 22 Nai Manetualain Susura Makamoi Na mana dui' nae, basa lahenda dae-bafo' a nanaheke naisa' no sala-siko rupa'. Huu ria naa, noi lahenda fo namahere Yesus Kristus, ri' bisa sipo hata fo Manetualain helu basa a.
23 Tepo' fo Kristus bei ta mai, ami lahenda Yahudi a nanaheke naisa' no atoran sira, losa' ta bisa po'i ma ao mara. Tehuu losa ledo-fain te, Manetualain soi eno', ela ami ao mara loan neme atoran sira mai, kalu ami mamahere Kristus. 24-25 De atoran agama sira sama leo' manea a, nanori-nafada natalolole ita losa' Kristus mai. Tehuu kalu Ana mai, sona besa' ko ita tamahere Ni, ela Manetualain sipo' ita. Huu ria naa, besa' ia ita ta parluu manea ria so'.
Lahenda kamahere' ara dadi Kristus kileo-bobokin
26 Besa' ia emi dadi meu' Manetualain ana nara, nana huu emi mamahere Yesus Kristus. 27 Emi basa sarani ela dadi Ria lahendan, ma mabua-maesa moo Ni boe. 28 Basa lahenda fo ramahere Kristus nana sama reu' esa. De leo mae emi lahenda Yahudi, do ta Yahudi, ata do ta ata, ina' do tou', basan sama nana huu rabua-raesa ro Yesus Kristus.
29 Kristus nana, Abraham tititi-nonosin fo ri' Manetualain helu mema' neme ulu' mai. Huu no emi mabua-maesa moo Kristus, de emi boe dadi Abraham tititi-nonosi matetun. No ria naa, emi boe bisa sipo ua-nale' fo Manetualain helu mema' neu' Abraham.k