Ramatua Yesus lahenda nadedenu feke nara sipo' Paulus nanori-nafadan no malole
2
Basa teu' sanahulu haa, boe ma au oo Barnabas fali selu' leo kota Yerusalem meu. Ma ami moo lahenda kamahere' esa boe, nade Titus. Ria, ta Yahudi fa.a 2 Au leo naa' uu, nana huu Manetualain ri' nadenu. Boe ma au tui-beka fee lasi Kristen ara, Tutui Malole fo au anori-afadan neu' lahenda ta Yahudi ra. Tepo' ria, au dedea mata' oo si, ela ara parisa' ratalolole hata fo au anori-afada ni a, tebe do ta'a. Kalu ara raetu' rae, ta tebe fa, sona au nonoi-tatao ki mana dadi taa'!3 Ramanene au dedea ae leo' naa, boe ma ara sipo' no malole. Ara sipo' Titus no malole boe. Leo mae ria ta lahenda Yahudi, tehuu ara ta raseti ni fo sunat. 4 Tehuu tepo' ria, toranoo' hida ta rataa, nana huu ara ranori-rafada feke'. Sira nana lahenda Kristen mapuputa'. Boe ma ara raseti ramaninino' Yesus Kristus lahendan fo ta Yahudi, ela tuka lahenda Yahudi ra atoran agama na katema'. Sekonaa te Yesus Kristus po'i-tata na ita, ela ita boso' nanaheke' nai atoran sira, sama leo' ata. 5 Leo mae ara raseti leo' naa, tehuu ami ta nau sipo' bai' boe'. No ria naa, emi bisa mamahere maroo Tutui Malole fo ri' au anori-afadan a. Huu fo ria nana tebe.
6 Lasi' sira sipo' no malole au nanori-nafada ki, ma ara ta tamba selu' hata-hata esa neu boe'. Tehuu Manetualain ta mete mata'. De leo mae sira lahenda bau-ina', do aana', ria ta penting.b 7 Penting na ri': ara bubulu' rae, Manetualain here au, fo uu tui-beka Tutui Malole fee lahenda ta Yahudi. Sama leo' Ana nadenu Petrus fo neu tui-beka Tutui Malole ria fee lahenda Yahudi ra. 8 Manetualain fee Petrus kuasa, de ana dadi lahenda nadedenu' soa-neu' lahenda Yahudi ra. Leo' naa boe Ana fee au kuasa, de dadi lahenda nadedenu' soa-neu' lahenda ta Yahudi. 9 Tepo' ria, lahenda ra tao Yakobis, Petrus,c ma Yohanis, reu' mauli-malaka sarani'. Fai fo telu si bubulu' rae, Manetualain natudu dale malole Na neu' au, boe ma ara foa de mai tabe' au oo Barnabas, fo dadi tanda nae, ami basa dale' esa. Ara sipo' ami meni Tutui Malole fee lahenda fo ta Yahudi, ma sira si' reni fee lahenda Yahudi ra. 10 Ara rafarerene' fee ami noi hihii-nanau' esa. Ri', ami boso' mafarene henin ela tulu-fali lahenda manato'a-manataa' ara. Mema' ria nana au saka' oi-taon.
Paulus nasa'ai Petrus nai Antiokia, nana huu ana heo' neme lahenda fo ta Yahudi
11 Lai' esa de Petrus leo kota Antiokia mai, boe ma au asa'ain, nana huu ana tao sala. 12 Fai fo ana besa' ko mai, ana namaho'o natuu' naa-ninu sama-sama no Kristus lahendan fo ta Yahudi. Tehuu Yakobis tia-lain lahenda Yahudi nara mai, boe ma Petrus heo' neme toranoo' fo ta Yahudi, ma ta naa-ninu noo si so'. Nana huu ana bii lahenda Yahudi fo ranori-rafada rae, Kristus lahenda nara muste homu rahere lahenda Yahudi ra atoran agama na katema', ma muste bika reme lahenda fo ta Yahudi.
13 Lahenda Yahudi feke' ara rita Petrus nonoi-tataon ria, boe ma sira boe ratukalele. Losa' Barnabas boe ana tuka leo sira nonoi-tatao dea-matan ria neu. 14 Tehuu fai fo au ita si ta tuka matetu' Tutui Malole a hihii-nanaun, boe ma au asa'ai tuti' Petrus nai sira mata nara ae, “Toranoo Petrus! Tebe toranoo' a, nana lahenda Yahudi. Tehuu Manetualain soi eno', de lahenda fo ramahere Yesus Kristus, boso' nanaheke' ro lahenda Yahudi ra atoran agama nara bali. Ma toranoo' a sipo' hihii-nanau' ria. Boe ma ubea' taon de besa' ia toranoo' a bei nau maseti lahenda fo ta Yahudi, ela ara tao ao nara sama leo' lahenda Yahudi ra bali?”
15 Au asa'ai Petrus leo' naa, nana huu ami dua lahenda Yahudi bela' a. Ami lahenda nusa Yahudi a ta sama leo' lahenda nusa feke' ara, huu fo ami nusa ma lahenda nara ralela' Manetualain doo' a so. 16 Ita bubulu' lahenda mole-dame ro Manetualain nana huu ara ramahere Yesus Kristus, ta huu ara tao tuka atoran agama. Ria sona besa' ko Ramatua' a sipo' lahenda ria nae salan ta'a so.d
17 Huu ria naa, ita tanori-tafada tae, Manetualain sipo' lahenda no malole, nana huu ana namahere Yesus Kristus. Tehuu lahenda Yahudi ra sale ami rae, ami sala, huu fo ami mamahere Yesus Kristus, tehuu ta homu mahere atoran agama Yahudi ra. Emi boe nau sale ami leo' naa, do? 18 Kalu au homu selu' atoran agama fo ri' au tu'u henin, ria sona besa' ko au sala! 19-20 Tebe maulu na au saka eno na, fo tao tuka atoran agama Yahudi ra, ela au malole oo Manetualain. Tehuu au ta bisa fa. De besa' ia au tu'u-tapa heni atoran sira fo asoda abua-aesa oo Kristus. No ria naa, besa' ko Manetualain sipo' au no malole. Taon neu' au mana paku naisa' nai ai kake' a sama-sama oo Kristus. Masoda besa' ia ta au fa, tehuu Kristus nasoda nai au dale'. Au hapu soda bebeu' ia, nana huu au amahere Manetualain Ana Na. Ana sue na au seli, losa' Ana mate kati au. 21 Manetualain sipo' au, nana huu Ria dale malolen, ta huu no au tuka atoran agama. Kalu lahenda bisa malole no Manetualain, nana huu tuka atoran agama, sona Kristus mamate na, sosoa-raraa taa'.
Ria ri', au afada neu' Petrus asa nai Antiokia.