Manea matalolole emi masodam
13
De ia nana au saka' uu dama emi kalai' telu na. Kalu bea napaneneo' lahenda, sona boso' nafarene heni atoran a. Huu fo mana dui' nai Manetualain Susura Makamoi Na nae, “Kalu bea napaneneo' lahenda esa, sona muste lahenda dua do telu sakasii, ma tutui' esa' a dei, besa' ko sipo'. Kalu ta leo naa', sona boso' sipo'.”a 2 Maulu na tepo' fo au leo emi naa' eti kalai' dua na, au afarerene' fee lahenda mana tao tadalu' ara so. Besa' ia au fee selu' asa nafarerene', sama-sama ro basa lahenda mana tao tadalu' ara. Sama leo' maulu na, au fee nafarene ae, kalu au dadi eti sona ara sipo ra huhuku nara.3 Emi saka buti mae, Kristus dedea nesi' au. Kalu Kristus ator emi, sona Ana noi-tao neni' kuasa bau-ina' nai emi talada. Huu fo Ana ta noi-tao male'-male' a. 4 Tepo' fo ara raisa Ni nai ai kake', mema' Ana male'-male' a, huu fo Ana hai heni kuasa Na. Tehuu Manetualain fee Kristus kuasa, de besa' ia Ana nasoda. Leo mae ita fo ri' dadi Ria lahendan, tameda taan ta tabe'i, tehuu Manetualain fee ita soda' bebeu'. Huu ria naa, ami bisa malalau' emi pake Ria kuasa Na.
5 Parisa' aom emi dalem ela bubulu' mae, emi mamahere tebe-tebe Kristus do, ta'a? Ria kuasa Na nananita' nai emi masoda ma do, ta'a? Uji ao mara leo naa'. Huu fo kalu Ana ta nabua-naesa no emi, sona emi ta dadi Ria lahendan. 6 Kalu emi parisa' ami, sona emi bisa mita Ria kuasa Na nai ami masoda ma. No ria naa, ami lui ma ao mara meme u'uji' a mai. 7 Ami hule-haradoi neu' Manetualain, ela emi boso' tao sala'. Ami ta tao dale' mae lahenda rahii' ami nonoi-tataom, do ta'a. Leo mae lahenda feke' tipa-tola ami, tehuu ami mahii' emi tao malole. Leo mae leo' naa boe ta hata-hata. 8 Huu fo ami ta tao sudi ubea', ela soa' hata roo-tetu'. Ami tao noi malole. 9 Huu fo kalu emi bara'ai', ma ami male'-male' a, sona ami mamaho'o. Ami hule-haradoi neu' Manetualain ela tao namano'u-namadai emi namahere mara. 10 Huu ria naa, leo mae au doo' a oo emi boe, besa' ia au dui' hihii-nanau' ia ra, ela fai bea au eti, sona au boso' dedea hara bera emi bali. Au dadi ita Ramatua na lahenda nadedenun. Tehuu Ana fee au haak ma kuasa fo afofoa emi, ta alulutu' emi.
Paulus dui' nate'e susura na
11 Toranoo susue kara! Ia nana au dedea-nafada mate'e ka, soda-mole' nai susue-lalai' dale'. Tao matetu basa hihii-nanau' ara. Mamanene matalolole au lelea-nonore ka. Masoda teiesa-dale'esa. Emi muste esa malole no esa. Manetualain sue-lai emi. Au hule fo Ana sama-sama no emi la'o naroo ma Ana tulu-fali emi, ela emi masoda mole-dame esa no esa.
12 Fai bea ma emi matete'a ao', sona meni' dede'i' lalao-lalafu', fo ri' naraa soa-neu' Manetualain lahenda lalao-lalafun. Manetualain lahendan fo rai ia, basa si haitua haraoe soda-mole' susue-lalai' soa-neu' emi.
13 Au hule fo ita Ramatuan Yesus Kristus natudu dale malole Na neu' emi. Au hule fo Manetualain natudu susue-lalain neu' emi. Au hule fo Manetualain Dula-dale Malalao-malalafu Na natudu dale balaroe-balanau Na neu' emi, ela emi basa tei' esa ma dale' esa.
Noi ri naa' so,
Paulus