Paulus nalamei ma nita hihii-nanau' ara rai nusatetu-ikutema'
12
Kalu emi nau mamanene noi lahenda fo dedea bau-ina', sona ela au dedea bau-ina' selu'. Sekonaa te, dedea bau-ina' a sosoa-raraa' ta'a. Tehuu au nau afada emi basa hihii-nanau' fo ita Ramatua na natudun neu au, nai meis dale'. 2-4 Au alela' lahenda esa nabua-naesa no Kristus. Teu' sanahulu haa maneu' ele, esa noo ni hene-ae leo lalai poi na neu. Tehuu au ta bubulu', ana hene-ae neni ao-ina katematua na, do noi dula-dale na hene-ae. Noi Manetualain ri' bubulu'. Au bubulu', fai fo ana hene-ae leo Manetualain Mamana Malole Na neu a, ana namanene dedea-nafada' kahere', losa' lahenda dae-bafo' a ta bisa dedea. 5 De soa-neu' lahenda rupa leo naa' a, au nau dedea bau-ina'. Tehuu au ta dedea bau-ina' la'e-neu' au ao-ina heheli ka. La'e-neu' noi hihii-nanau' fo au ta abe'i tao ni, besa' ko au dedea bau-ina' leo naa'. 6 Tehuu uni' ko leo au saka' dedea bau-ina', au ta parluu dedea fufudi', huu fo au anuu hihii-nanau' kahere dodou' fo ri' tebe-tebe au oi-tao si. Tehuu au anenete, ela lahenda boso' afi rae, au kahere' lena neme hata fo ri' ara ramanene, ma rita mata' neme au mai. 7 Manetualain natudu au hihii-nanau' kahere' dodou' nai au meis ka dale'.Tehuu au hapu susa, ela boso' koao. Huu fo nitu ra malaka na nadenu ria ana nadedenun esa mai nasesebo' au la'o naroo, sama leo' kau-kou' esa pau-pau no au ao-ina ka. Tebe-tebe au doidoso! 8 Au hule Ramatua' a lai' telu, ela so'u heni hihii-nanau' ia neme au mai. 9 Tehuu Ana nataa au nae, “Au atudu dale malole Ka neu' o. Ria namano'u-namadai soa-neu' o. Huu fo o mameda maan mae, tuka o bara'ai mesam, sona ta namano'u-namadai, sona Au kuasa Ka boe-boe natea nai naa.” Huu ria naa, fai fo au ta abe'i tao hihii-nanau' esa, au boe-boe dedea bau-ina'. Huu fo au bubulu' Kristus kuasa Na nasuru-nahapa au. 10 Huu ria naa, kalu au ameda aan au ta mesa' ka abe'i oi-tao hihii-nanau' esa, au dale ka tama. De fai fo lahenda dedea ramumulu-ramamae' au, tao rasususa' au, tao doidoso au, do ese-rumu au, nana huu au dadi Kristus lahendan, sona au dale ka tama. Huu fo kalu au ta abe'i, sona au hapu kuasa neme Kristus mai, de au bisa abe'i tao hihii-nanau' ria.
Paulus dale na doda' la'e-neu' lahenda kamahere' rai Korintus
11 Emi masoda nonoo' leo Manetualain ta parnaa nadenu au leo naa' eti. Huu ria naa, nau do ta nau, bisinaa' a au dedea koa-pakanaa' bai'. Matetu na emi muste dedea bau-ina' la'e-neu' au. Mema' au sosoa-raraa' taa'. Tehuu kalu nararaa' au oo “lahenda kahere' raan seli” fo ri' rae, Manetualain nadenu si, sona sira ta kahere' lena au.
12 Fai bea ma Manetualain nadenu lahenda esa fo nafada lahenda la'e-neu' Ana, sona lahenda ria tao tanda heran rupa' pake kuasa, ela natudu buti nae, Manetualain nadenu ni. Boso' mafarene henin, te tepo' fo au nai emi talada, au tao tanda heran leo naa' ara boe. Tehuu au oi-tao leo naa' no sabar la'o aroo. 13 Boso' mamanasa! Noi hihii-nanau' esa, fo ri' lahenda feke' taon nai jama'at feke' a, au ta taon nai emi. Ri' au ta tao fee emi mambera.
14 Leo ia'! Au sadia leo emi mai kalai' telu na ia so. Au ta parluu emi tanggong maolu-mahao au. Au ta parluu emi hata-hetom boe'. Tuka ita hadas na, ta naraa ana aana' ara peda-fua ela sira ina-ama nara hata-heto. Matetu na ina-ama ri' peda-fua ela ana nara hata-heto. Huu fo emi sama leo' au ana kara, de au ta parluu emi peda-fua ela au hata-heto! Au parluu a nana ri' emi dale katematua mara, ma emi susue-lalaim. 15 Au amaho'o fee emi hata fo ri' au anuu. Au boe ahii' oi-tao sota, ela emi bisa masoda tuka Manetualain hihii-nanaun. Kalu au sue-lai emi, sona emi muste sue-lai au leo' naa boe. Ubea' taon, de emi makura' susue-lalai mara? Ta naraa, hete?
16 Neme emi mai ruma manaku rae, au ta tao fee emi bera-bau'. Tehuu ruma bali rae, au dadi lahenda manatipu-manadai' malela', losa' tipu ala' emi fo tuka au hihii-nanau ki. 17 De leo bea'? Emi afi mae lahenda fo ri' au fee si leo emi naa' reu a, ara tipu-dai emi, do? 18 Au lele'o Titus fo leo emi naa' neti. Au adenu toranoo feke' esa, fo no ni reu. Dodoo maan, nana Titus tipu-dai emi, do? Ta'a, hete? Titus no au, rupa esa' a. Ami moi-tao hihii-nanau' sama, huu fo ami dua dudu'a-aafim boe, sama.
19 Toranoo susue kara! Bate emi afi meme bisinaa' a mai mae, ami masala'e ao mara nai emi matam, do? Ta'a! Basa-basan fo ami dedea ia nana, Manetualain bubulu'. De ami ta bisa mafuni Ni hata esa boe'. Ami boe mabua-maesa mo Kristus. Ami sue-lai emi, de basa-basan fo ri' ami tao, nana ela bisa nafofoa emi namahere ma.
20 Kalu au dadi leo emi naa' uu, au dale ka doda', boso' losa emi ta dadi lahenda sama leo' au hihii-nanau ki. Boso' losa ruma rareresi', ramanasa', rapeda dale', ruma afi noi ao-ina heheli nara, ruma dedea ramumulu-ramamae' lahenda, ratui dedea, ruma koao', ma tao liuaari basa-basan. Bate au boe dadi lahenda ta sama leo' emi dale hihiim. 21 Kalu au leo emi naa' uu, au dale ka doda', nana huu emi nonoi-tataom. Boso' losa Manetualain tao na au mae' nai emi matam. Boso' losa au tao a lahenda rameda raan bera' a, nana huu neme emi mai kadodou na bei tao tadalu', tehuu ta nau saledale-tu'etei nara, fo ratafali mai tuka Manetualain eno roo-tetun. Sira makekeo-makakanu'! Huu fo ruma hohoke lahenda fo ta sira saon. Ara tao rupa' ara ma ta mae'.