Kristus lahenda nadedenu matetu nara, ma lahenda nadedenu ta matetu' ara
11
De soba nenene matalolole au! Au saka' dedea bau-ina' bai', leo mae au dedea sama leo' lahenda koa-pakanaa'. 2 Au sama leo' emi amam. Ma emi sama leo' au ana feto ana ka nanuu tunangan so. Kristus sama leo' emi tunangan ma. De au anea atalolole emi, ela emi sao tunangan ria boe, emi bei lalao-lalafu'. Au anea atalolole emi ela boso' hapu esa mai fufudi-lele'o emi, fo tao nalutu emi namahere ma. 3 Besa' ia emi tuka Kristus eno roo-tetu Na no malole. Tehuu au bii', boso' losa lahenda tipu-dai rala' emi, fo heo' meme eno' ria mai, sama leo' fai a ulu na meke a tipu-dai nala' Hawa. Meke ria bisa tipu-dai leo naa', nana huu ria napuputa heta!a 4 Fai bea ma lahenda rupa leo naa' a leo emi mai, boe ma tui-beka fee emi la'e-neu' Yesus rupa feke', ta sama leo' Yesus fo ri' ami tui-bekan neu' emi, sona ubea' taon de emi mamahere lahenda ria? Maulu na, emi sadia dale mara fo sipo Manetualain Dula-dale Malalao-malalafu Na, ela Ana ator emi. Boe ma ubea' taon de besa' ia emi sipo dula-dale rupa feke' esa bali? Maulu na, emi mamahere Kristus Tutui Malolen fo ri' ami tui-bekan neu' emi. Boe ma ubea' taon de besa' ia emi mamahere nanori-nafada rupa feke' bali?5 Ara io ao nara rae, sira nana Manetualain lahenda nadedenu kaheren. Dodoo maan nana sira haak na lena neme au, do? Ta'a! Au ta tuka dudu'a-aafi leo naa' a. 6 Leo mae au dedea ta alela' pake dedea hehelo', tehuu au bubulu' matetu' la'e-neu' hata fo au dedean a. Emi bubulu' hihii-nanau' ia ra, nana huu au atudu asarerei neu' emi.
7 Tepo' fo au tui-beka Manetualain Tutui Malole Na neu' emi a, au ta hule emi seba-bae au. Au aloe-adae ao ka, ela au bisa so'u-fua emi. Dodoo maan emi sale au, nana huu ria, do? 8 Lahenda kamahere' rai jama'at mamana feke' ara seba-bae au, de au bisa alalau' emi. Ria sama leo' au hai neme sira mai, ela bisa tulu-fali emi. 9 Tepo' fo au sama-sama oo emi a, au parluu ubea', au ta hule hata esa neme emi mai boe'. Ita toranoon fo reme propensi Makedonia mai, ri' tulu-fali au. Tehuu au ta parnaa tao asususa' emi hata-hata esa boe', ma au ta nau tao leo naa' nai balahaa-binesa'.b 10 Au abua-aesa oo Kristus, ma Kristus Hara-dasin roo-tetu', de au amahere ae, au dedea-nafada ki roo-tetu'. Ta hapu lahenda nai propensi Akaya bisa rau au bafa ka, ma horo au fo boso' dedea bau-ina' ae, au ta tao ambera emi leo naa'. 11 Ubea' taon de au ta nau tao ambera emi? Bate mae au ta sue-lai emi, do? Leo mae emi du'a-afi leo naa', tehuu Manetualain bubulu' au sue-lai emi.
12 Ma au boe ta nau tao ambera emi nai fai mana mai' a. No ria naa, lahenda fo rahii' dedea bau-ina' fo io ao nara rae, sira nonoi-tataon sama leo' ami, sona sira ta hapu nete' ela dedea leo naa' nana huu ara saka noi doi'. 13 Ara rae, Manetualain ri' nadenu si. Sira lahenda mana noi manatipu-manadai'! Sira soba-soba tao ao nara sama leo' Kristus lahenda nadedenu matetun. Sekonaa te, dedea fufudi' mesan basa sira! 14 Emi boso' heran! Huu fo nitu ra malaka na boe soba-soba tao aon sama leo' Manetualain eila'o-limalopen rai nusatetu-ikutema' a pake makaledo' no dale malole. 15 Huu ria naa, boso' heran kalu nitu a lahenda malalau-maoono nara boe, soba-soba tao ao nara sama leo' lahenda malalau-maoono dale roo-tetu'. Tehuu besa-besa, te neu' ko Manetualain balas sira tadalu nara.
Tepo' fo Kristus lahenda nadedenu matetu nara, tui-beka fee lahenda la'e-neu' Ramatua Yesus, ara hapu doidoso rupa'
16 Kalu emi nau, sona ela au dedea koa-pakanaa' baiana' selu'. Huu fo au nau soba-soba dedea koao'. 17 Besa' ia au dui' fo io ao ka leo ia', au dedea koa-pakanaa' ia. Ita Ramatua na ta nadenu au dedea leo ia'. Ia sama leo' lahenda pakanaa' a biasa io aon. 18 Lahenda dodou' rahii' io ao nara tuka lahenda dae-bafo' a biasa na. De au nau dedea koao' leo' sira boe. 19 Huu fo emi ri' tao ao mara leo' lahenda dudu'a-aafi tande', kalu maneta moi lahenda dudu'a-aafi taa' esa, sona emi sabar neu' ana, hete? 20 Lahenda io ao nara rae, sira nana Manetualain ata kaheren tao emi leo' bea boe, moi mataa' asa. Conto leo-leo': kalu ara tao emi neu' sira atan boe, moi mataa' asa. Kalu ara tipu-dai emi boe, moi mataa' asa. Kalu ara hai ra emi hata-hetom, moi mataa' asa. Kalu ara radedema ao nara sama leo' lahenda bau-ina', ma ara tao emi neu' lahenda aana' boe, moi mataa' asa. Leo' naa boe, kalu ara fapa emi boe, moi mataa' asa. 21 Tehuu boso' mamanasa! Au mae', nana huu ami male-male' a. Huu fo ami ta mabe'i tao leo naa', sama leo' lahenda sira taon soa-neu' emi.
Tehuu kalu ara dedea bau-ina' la'e-neu' ubea', sona au boe aparani dedea bau-ina' leo naa'. (Tehuu boso' mafarene henin, te au dedea koa-pakanaa' ia!) 22 Sira lahenda Ibrani tea', do? Au boe lahenda Ibrani. Sira lahenda Israel, do? Au boe lahenda Israel! Sira nana ba'i Abraham tititi-nonosin, do? Au boe ba'i Abraham tititi-nonosin! 23 Sira nana, Kristus lahenda malalaun, do? Au boe leo naa'. (Boso' mafarene henin, te au tao dedea nasaseko' ria!) Mema' au afada ae, au sama leo' sira. Sekonaa te, au lena eme sira mai. Huu fo au oi-tao sota lena. Lahenda ra ena au nai bui dale' lai dodou'. Ara fepa-li'u au lai dodou'. Lai dodou' kura bai' au mate.c 24 Au lahenda Yahudi kara fepa-li'u au lai' lima so. Fai bea ma ara fepa-li'u au, sona losa' lii' telu hulu sio.d 25 Lahenda ra fepa au reni' ai, lai' telu. Ruma bali nau pia raisa au reni' batu, lai' esa. Au sa'e ofa' a, bolo lai' telu. Au bonu-bonu nai tasi talada' leledo' esa ma hatu' esa.e 26 Au leo mamana doo' uu kose-kose. Soe-sala' dodou' tao ra au kura bai' mate. Leo-leo': Soe neme faa a nai lee bau-ina', parampok ara rafara'u ra au, au lahenda Yahudi kara ma lahenda fo ta Yahudi ra ese-rumu au, ma lahenda fo tao ao nara sama leo' lahenda kamahere', sekonaa te manatipu-manadai' ara ese-rumu au boe. Kura bai' mate au nai tasi talada', nai bendar ma nai mamana lino-nees.f 27 Au oi-tao sota aan seli, ma au hapu susa rupa'. Lai dodou' au ta suku. Au amalaa ma maamada-metihedu. Lai dodou' au ta ua-inu hata esa boe'. Parnaa au bua-loas ta'a, de marini aan seli. 28 Kalu ta nau reke basa hihii-nanau' sira, sona reke leo ia': huu fo tuka-tuka fai' laka dile' a dai au, nana huu au du'a-afi la'e-neu' ita toranoon lahenda kamahere' fo rabua rai basa mamana' ain. 29 Kalu lahenda nameda naan ta nabe'i, sona nafarene au. Huu fo au boe leo naa'. Kalu lahenda fufudi-lele'o lahenda kamahere' fo tao sala', sona au mae' ma ete' ao ka.
30 Kalu au muste dedea koao', sona malole lena' au dedea koao' la'e-neu' hihii-nanau' fo ratudu rae au male'-male' a. Tebe! 31 Manetualain fo ita Ramatuan Yesus Aman, bubulu' au ta dedea fufudi'. Naraa lahenda io-oa Ni losa doo na neu.
32 Conto leo-leo', maulu na nai kota Damsik, mane' Aretas gubernor na nadenu lahenda tepa au nai lelesu bafa' ara, fo hopu au. 33 Tehuu au tia-lai kara tao au uu' sapai esa dale', boe ma ara raonda au pake tali tuka kota a tembok na dea'. De au soi a soda ka eme gubernor a lima na mai. Mafarerene', te kalu au mesa' ka, sona ta bisa, hete?g