Paulus bela ria nonoi-tataon soa-neu' Kristus
10
Au, Paulus, ri' dui' nai ia. Tantu emi ruma afi mae leo ia': kalu au sama-sama oo emi, sona au mae' dedea neu' matetu na. Tehuu kalu au doo' a oo emi, sona au aparani dedea ta pake bibila-babaa'. Leo naa', hete? Sekonaa te, matetu na ri' au hule fo emi mamanene au, nana huu Kristus dale balaroe-balanau Na neu' emi, ma Ana nahii' tao dale' neu' emi. 2 Tehuu emi ruma ta nau ramanene au. Ara rafada rae, ami nonoi-tataom, sama leo' lahenda feke' nai dae-bafo' ia nonoi-tataon. De kalu au leo naa' eti, sona au muste dedea soa-neu' asa ta pake bibila-babaa'. Huu ria naa, au afada mema' emi basa, ela fai bea ma au leo naa' eti, sona boso' au dedea hara bera soa-neu' asa. 3 Leo mae ita lahenda dae-bafo', tehuu kalu ita tareresi' to lahenda feke', sona boso' ita tahuu-talena sama leo' lahenda fo ri' ta ralela' Manetualain. 4 Kalu ita tahuu-talena to lahenda, sona boso' mafarene henin, te ita tee-tafan ta sama no lahenda dae-bafo' a nuu nara. Kalu ita tahuu-talena ma tareresi' to lahenda laka batu', sona ita tanuu Manetualain kuasa Na, de bisa tao talulutu' lahenda kota musun. 5 Manetualain kuasa Na bisa ofe heni basa hihii-nanau' fo ri' soa' Manetualain, ma tao na lahenda ta nau ralela' Ana. Ria kuasa Na boe bisa natudu eno', ela kati ita eno dodoo-tatai paraa na, neni' eno dodoo-tatai bebeu'. No ria naa, ita bisa dodoo-tatai tuka Kristus nanori-nafadan.a 6 Neme emi mai, kadodou na mulai ramania-ramanene neu' Kristus, ma tao tuka Ria hihii-nanaun katema'. Tehuu emi ruma bei ta nau ramania-ramanene Ni. De ami sadia huku sira fo ri' ta nau ramanene neu' Ana.7 Emi mahii' mete-relu noi hihii-nanau' fo nananita' nai dea'. Tehuu emi muste mete-relu lahenda dale na. De kalu lahenda bea tao aon dadi neu' Kristus lahenda nadedenun, sona nafarene natalolole. Huu fo ami boe Kristus lahenda nadedenun, sama leo' ria. 8 Bate emi afi mae, au dedea bau-ina' aan seli, la'e-neu' kuasa fo ri' ita Ramatua na feen neu' ami. Leo naa', hete? Ta'a! Huu fo hapu kuasa ria, ela natetea emi, te ta nalulutu' emi dale mara. De au ta ataa' lahenda ofe ralulutu' au nonoi-tatao ki, fo tao ramamae' au. 9 Au ta anuu maksud abibii' emi uni' au susura kara. 10 Tehuu lahenda sira dedea rae, “Boso' tao dale' neu' Paulus. Leo mae ria susura na isi-liin nasa' a ma kahere', tehuu kalu ana mai matan, sona male-male' a, ma dedea-nafadan ta nanuu kuasa.” 11 Neme' naa ela lahenda mana dedea fufudi leo naa' a, dodoo-tatai hihii-nanau' ia: ami dui' ubea' nai susura' dale', sona ami mai dedea mo emi boe sama leo' naa.
12 Lahenda sira io ao nara rae, sira nana Kristus lahenda nadedenu kaheren. Emi bubulu' ami ta maparani mararaa' ao-ina mara mo sira. Huu fo ami ta bisa kahere' sama leo' sira! Lahenda rupa leo naa', saka noi lahenda fo ri' sama leo' sira, besa' ko rae lahenda kahere ara si naa' dei. Sira rararaa' ao-ina nara esa no esa leo naa', pakanaa raan seli! 13 Sekonaa te, kalu ami ta manuu nete', sona ami ta dedea koao'. Ami dedea noi leo naa', la'e-neu' nonoi-laka' fo ri' Manetualain feen neu' ami. Ami tao ubea' soa-neu' emi, tuka noi hata fo ri' Manetualain nadenu ami tao. Ami ta tao feke' lena neme naa' mai. 14 Matetu na, tepo' fo ri' ami dedea koao' la'e-neu' emi, ami ta dedea mala lena'. Huu fo ami mai ela tui-beka fee emi Kristus Tutui Malole Na. Emi boe sipo' ami dedea-nafadam. Kalu Manetualain ta parnaa nadenu ami, tehuu ami dedea koao' la'e-neu' emi, sona ria ta la'e. 15 Kalu lahenda feke' a noi-tao, sona ami ta dedea bau-ina' mae, ami nonoi-tataom ria. Huu fo penting soa-neu' ami a, nana ri' emi namaherem boe-boe natea. No ria naa, neme ulu' mai ami nonoi-tataom nai emi a, buna-boan tamba naroo. 16 Ami bisa meu tui-beka Kristus Tutui Malole Na, nai basa mamana manenea' fo ri' lahenda bei ta roi-tao rai naa. No ria naa, lahenda ta bisa rae ami dedea bau-ina' la'e-neu' lahenda feke' fo ri' ralala'o raulu' sira nonoi-tataon.
17 Mana dui' nai Manetualain Susura Makamoi Na nae, “Kalu lahenda dedea bau-ina', sona ela ana dedea bau-ina' la'e-neu' noi ita Ramatuan Manetualain.”b 18 Kalu lahenda esa dedea bau-ina' la'e-neu' ao-ina na, sona ria sosoa-raraa' ta'a. Tehuu kalu ita Ramatua na ri' io lahenda ria, sona besa' ko kahere na ri naa'!