Doi tutulu-fafali' fee lahenda Kristen rai Yerusalem
9
Matetu na, ta parluu au dui' bali, fo hule emi tulu-fali Manetualain lahenda kamahere nara. 2 Huu fo au bubulu' emi makate leo naa' tulu-fali lahenda. Au boe amaho'o afada lahenda kamahere' rai Makedonia la'e-neu' emi dale malole mara. Au tui ae, emi nai propensi Akaya sadia neme manafali' a mai, fo haitua doi tutulu-fafali'. Au boe tui la'e-neu' emi makatem fo ri' tao na lahenda feke' boe tulu-fali lahenda mana susa' ara. 3 De besa' ia au adenu ita toranoo nara, ela ratudu rae, hata fo ami tuin la'e-neu' emi a, ta dedea fufudi'. Au afada ae leo' naa, ela emi sadia mema'. 4 Huu fo kalu lahenda Makedonia ra mai sama-sama ro au, boe ma emi bei ta sadia, sona ita basa mae'. Boso losa au namahere ka neu' emi a nete' ta'a. 5 Huu ria naa au afi ae, malole lena' ita toranoo nara raulu' leo emi naa' reu, ela emi basa bisa ator doi tutulu-fafali' sira tuka maulu na emi hehelu ma. Emi muste fee neme dale malole mara. Boso' fee no naseti-nala'a.6 Eno na leo ia': “Lahenda fo sele-kari baiana', neu' ko hapu buna-boa' baiana'. Lahenda fo nakate sele-kari dodou', neu' ko hapu buna-boa' ma ua-nale' dodou'.” 7 Lahenda ra muste esa' ko naetu' aon nae ana fee hida. Boso' fee no dale poo seseri'. Boso' fee nana huu lahenda raseti. Huu fo Manetualain sue-lai lahenda fo fee no dale namaho'o. 8 Manetualain nabe'i fee emi, basa ua-nale rupa'. Ana nabe'i fee lena', ela emi ta kura-kopo. Kalu emi parluu, sona neu' ko emi hapu-dai lena bali. No ria naa, emi bisa bati-pala lena-ono mara fo tulu-fali basa nonoi-tatao malole ra. 9 Mana dui' nai Manetualain Susura Makamoi Na nae,
“Manetualain bati-pala fee lahenda manato'a-manataa' ara,
neme Ria dale malole Na.
Ana tao roo-tetu' naroo,
huu fo Ria dale Na roo-tetu' nahere losa doo na neu.”a
10 Manetualain sadia bini-kee, fee lahenda maue-maosa ra ela sele-kari. Manetualain fee ita tua-nanaa', fo bisa taa-tinu. Manetualain ria boe, neu' ko fee emi ua-nale', ela emi bisa tao roo-tetu'. Ria sama leo' emi dadi lahenda maue-maosa, de Manetualain fee emi bini-kee fo sele-kari. No ria naa, Ana tao na emi nonoi-tatao malolem sira tamba fai, tamba dodou'.b 11 Manetualain fee emi lena neme emi parluu ma, ela emi bisa tulu-fali lahenda feke' ara neme emi dale balaroe-balanau mara. De kalu emi tulu-fali leo naa' neu lahenda feke', sona neu' ko ara hule makasi neu' Manetualain. 12 Huu fo emi fee tutulu-fafali' nana, tantu tulu-fali Manetualain lahendan fo rai naa. Ma ria boe emi tao tanda makasi dodou' neu' Manetualain. 13 Huu fo emi tulu-fali lahenda feke' ara, de ria natudu buti nae, emi mamahere tebe-tebe. Ria boe tao na lahenda feke' ara io-oa Manetualain. Huu fo ara bisa rita emi mamahere Kristus Tutui Malole Na, nana ta dedea fufudi'. Ria nana huu emi tao tuka emi namahere ma. Fai fo emi fee tutulu-fafali' no dale balaroe-balanau' soa-neu' sira ma lahenda feke', sona ria ri' tao naa si io-oa Manetualain.
14 Lahenda fo ri' sipo hata tutulu-fafali' neme emi mai, neu' ko ara hule-haradoi fee emi. Sira boe rahii' rita emi, nana huu Manetualain natudu Ria dale malole ina Na neu' emi. 15 Tehuu Manetualain parseen fee ita Hadia esa malole na seli. Ri' Yesus! Ria beli Na lena heni basa-basan! Huu ria naa, ita basa sama-sama hule “Makasi dodou'!” neu' Manetualain.