Ara fee tutulu-fafali' no dale lalao-lalafu'
8
Toranoo susue kara! Ami nau emi bubulu' Manetualain dale susuen fo Ana natudun neu' jama'at rai propensi Makedonia. 2 Leo mae ara hapu susa-lela dodou', tehuu ramaho'o-ratadale raroo. Huu ria naa, leo mae ara to'a-taa, tehuu ara bei fee sira doi-talin dodou' no dale lalao-lalafu', ela tulu-fali lahenda kamahere feke' mana susa' ara. 3 Au bisa tui ae, ara fee katema' hata fo rabe'i fee neme sira hahapu-dadai nara. Ma ara fee lena neme naa' mai bali. Ta hapu esa naseti si boe'. 4 Tebe-tebe sira si' hule ela ami fee si lela'. No ria naa, sira boe bisa tulu-fali lahenda kamahere' mana susa' ara rai Yerusalem.a 5 Ami mamahena ara tao leo ia', tehuu ara tao lena neme ami namahena-nabanim! Masososa na, ara fee ao-ina nara reu' ita Ramatua na. Ara rafada bali rae, “Ami nau fee ami ao-ina mara ela malalau' emi, tuka Manetualain hihii-nanaun.”6 Huu no jama'at rai Makedonia, ara ratudu conto leo naa', de ami hule Titus fali selu' leo emi neu nai Korintus, ela emi bisa tulu-fali Manetualain lahenda mana susa nara rai Yerusalem. Maulu na, ana mulai nabubua fee si doi'. Besa' ia ami hule ni ela bisa tao namano'u-namadai emi nonoi-lakam fo ri' tulu-fali lahenda.b 7 Tebe emi nonoi-tataom soa-neu' Manetualain, nana malole na seli. Conto leo-leo': emi mamahere tebe-tebe; emi nanori-nafadam malole; emi bubulu' dodou' la'e-neu' Manetualain; emi makate mara seli; ma emi sue-lai ma ami seli. Huu ria naa, au nau emi fee doi' dodou', ela tulu-fali Manetualain lahenda mana susa nara.
8 Au ta pareta emi nai Korintus fo fee doi' dodou', tehuu au nau uji emi. Jama'at rai Makedonia, ara rahii' raan seli nau tulu-fali lahenda mana susa' ara. De neu' ko emi matudu mae tebe-tebe emi sue-lai lahenda sira boe. 9 Huu fo emi bubulu' ita Ramatuan Yesus Kristus, natudu dale malole Na neu' emi. Maulu na Ana sama leo' lahenda kamasu'i. Tehuu Ana dadi lahenda manato'a-manataa' ela tulu-fali emi, fo bisa mamasu'i nai basa hihii-nanau' dale'.
10 Manafali' a, emi mulai mabubua fee si doi'. Emi ta fee noi doi', tehuu emi tulu-fali neme emi dale mara mai boe. De tuka au sona emi muste tao leo ia': 11 Maulu na, emi tulu-fali Manetualain lahenda mana susa nara rai Yerusalem. De besa' ia fee matetu hata fo emi maetu' maan nau tulu-fali meni' a. Ma emi mabe'i fee hida, sona fee leo. Tehuu penting na ri', fee no dale katematua. 12 Kalu ita fee no dale namaho'o tuka ita hahapu-dadain, sona ria malole a. Lahenda boso' fee hata fo neu' ko tao nasususa' ana nana huu fee no naseti'.
13 Au maksud ka ae, ela ita basa lepa bela' sira susa-lelan. Au ta anuu maksud tao fee emi mambera, ela lahenda feke' namakafa. 14 Huu fo besa' ia emi hapu-dai lena, ma sira kura-kopo. Fai bea ma emi kura-kopo, sona neu' ko ara bisa fee emi. No ria naa, ita sama-sama bisa lepa-tasaa beibebera'. 15 Sama leo' mana dui' nai Manetualain Susura Makamoi Na nae,
“Lahenda fo hapu dodou',
ara ta ranuu desi lena neme naa' mai.
Ma lahenda fo hapu baiana',
ara ta kura-kopo boe'.”c
La'e-neu' Titus, ma lahenda feke' fo saka' reni tutulu-fafali'
16 Au hule makasi neu' Manetualain, nana huu Ria ri' fufu'a-aali Titus fo tulu-fali emi, sama leo au tulu-fali emi. 17 Tebe ami hule ni neu dama emi. Sekonaa te, ria dale hihii na boe. Huu ria naa, leo mae au ta hule ni boe, ana neu tulu-fali emi. 18 Tehuu ta mesa' ana neu. Huu fo ami madenu ami toranoom esa, neu sama-sama no ni. Basa jama'at fo rai ia ralela' lahenda ia, nana huu ria boe noi-tao sota naan seli, tui-beka fee lahenda Manetualain Tutui Malole Na. 19 Jama'at ara mauli-malaka nara here ra ni, fo la'o sama-sama no ami, ela tulu-fali nai ami nonoi-tatao malolem ia dale'. Ami malala'o nonoi-tatao' ia, ela matudu ita Ramatua na marela-masa'an, ma tao malole soa-neu' lahenda mana susa' ara rai Yerusalem.
20 Ami saka eno' tao roo-tetu', ela fai fo ami meni doi' ia ra, leo lahenda fo ri' ara parluu, ta hapu lahenda bisa rapaneneo' rae, ami ta moi-tao no matetu'. 21 Ami du'a-afi malole ela tao roo-tetu' neme dale lalao-lalafu' nai Manetualain matan, ma nai lahenda matan boe.d
22 Ami madenu toranoo' esa bali, fo no Titus asa sama-sama reni doi' sira reu a, ami uji ni lai dodou' so. De ami bubulu' ria nau noi-tao sota naan seli soa-neu' emi. Ana nakate, nana huu bubulu' nae, emi tao roo-tetu'.
23 Kalu lahenda ratane la'e-neu' Titus sona mafada si mae, Titus nana, au toranoo ki fo ri' noi-tao no au la'o naroo soa-neu' emi. Kalu lahenda ratane la'e-neu' lahenda feke' fo ri' tuka ro Titus, sona mafada si mae lahenda kamahere' rai mamana feke' boe here sira fo tuka Yerusalem reu reni doi' ia ra. Ara rahani rai Korintus fo saka' reu. Titus sama-sama no si. Neu' ko sira basa ratudu Kristus marela-masa'an. 24 De emi muste matudu susue-lalaim neu' lahenda mana neni doi' sira. Ma matudu si, mae ubea' taon de ami dedea koao' la'e-neu' emi. No ria naa, lahenda kamahere' reme jama'at nai basa mamana' ain bubulu' matetu' emi sue-lai si.