2 Toranoo kara! Fee ami mamana'. Sipo' ami no malole nai emi dale mara. Maulu na tepo' fo ami nai emi talada, ami ta parnaa tao sala' soa-neu' lahenda esa boe'. Ami ta parnaa lele'o lahenda fo tao sala'. Ami boe ta parnaa tipu-dai lahenda fo saka oonto' neme sira mai. 3 Au ta anuu maksud sale emi. Huu fo au afada ae, ami sue-lai emi. Leo mae ita mate do tasoda, ami moo emi teiesa-daleesa. 4 Besa' ia au ta teisusa-dalehedi so', huu fo au amahere emi. Au boe dedea bau-ina' la'e-neu' emi. Emi boe matetea au dale ka. De leo mae ami hapu susa rupa', tehuu au amaho'o-atadale aroo nana huu emi.

5 Tepo' fo ami leo propensi Makedonia mai a, ami sota maan seli. Huu fo ami hapu susa ii-ona'. Ami mareresi' mo lahenda dea. Ami boe bii-mamata'u nai ami dale mara.^a 6 Tehuu Manetualain natetea lahenda fo mopo makate na, ma nameda naan bera' a. Ana natetea ami dale mara, fai fo Ana fee Titus leo ami mai. 7 Titus mamai na, natetea ami dale mara. Huu fo tui nae, ana bei nai naa, emi matetea ria dale na. Ami mamanene leo' naa, ria boe dadi natetea dale' soa-neu' ami. Ana tui nae, emi mahii' mita au, ma emi masaledale matetu' neu' dedea' fo maulu na dadi nai emi talada. Ria boe tui la'e-neu' emi saka eno' fo nau tao dale' neu' au. Huu ria naa, au amaho'o-atadale.^b

8 Au bubulu' au asa'ai emi uni' susura' fo ri' maulu na au haitua fee emi, mema' tao na emi susa. Tehuu au ta asaledale dui' susura' ria. (Sekonaa te tepo' ria, au asaledale bai', fai fo au bubulu' au susura ka tao na emi susa, leo mae noi hatemata'.) 9 Tehuu besa' ia, au amaho'o-atadale. Au ta amaho'o nana huu tepo' ria emi susa. Ta'a! Au amaho'o nana huu tepo' ria au susura ka isi-liin lea-nore emi fo saledale-tu'etei mara. Boe ma emi manaku sala-siko mara, ma foa ela emi hihii-nanau' tadalu mara, fo matafali mai tuka Manetualain eno roo-tetu Na. Manetualain ri' tao na emi masaledale leo naa'. No ria naa, ta ami ri' tao mahehedi' emi dale mara. 10 Kalu ita tasaledale sala-siko' ara tuka Manetualain hihii-nanaun, sona ita saledale-tu'etei ara ta tao hihii-nanau' tadalu' so', ma tatafali mai tuka eno roo-tetu'. Ria ri' po'i-tata na ita teme Manetualain huhuku na, ma ita ta tasaledale la'o naroo. Tehuu kalu ita tasaledale noi nai bafa-doo' ara, sona sama leo' lahenda nai dae-bafo' a biasa nara, de neu' ko ita bika-bati teme' Manetualain mai.

11 Soba emi dodoo! Tepo' fo emi lees au susura ka, au bubulu' emi masaledale sala-siko mara tuka Manetualain hihii-nanaun. Huu fo ria tao na emi moi-tao sota maan seli, ela sae-safe heni hihii-nanau' tadalu' a, neme emi masoda ma. Emi mamaai' no tadalu mara. Emi bii', boso losa emi tao selu' tadalu'. Emi mahii' mita au, ma sadia tao malole maroo. Emi boe sadia nau huku lahenda mana tao sala'. Huu no emi tao roo-tetu' leo' naa, de emi lalao-lalafu'. No ria naa, ta hapu esa sale emi boe'. 12 De susura maulu ki fo ri' au dui' a, ta fee lahenda mana tao tadalu'. Au boe ta dui' fee lahenda fo ri' doidoso nana huu lahenda feke' a nonoi-tatao tadalun. Tehuu au dui' susura' fee emi ela au atudu ae, emi helu basa nai Manetualain mata Na, nana tetea'. Ma emi sue-lai matetu' ami. 13 Basa ia ra, ratetea au dale ka.

Emi boe matetea Titus dale na, ela ria dale na bisa tama. Hihii-nanau' ria tao na ami boe-boe mamaho'o. 14 Au parnaa io emi nai Titus matan la'e-neu' emi nonoi-tatao malolem. Au afada ni ae, ta parnaa emi tao mamamae' au. Basa hihii-nanau' fo ri' parnaa ami tuin neu' emi, nana tebe. Ma basa hihii-nanau' fo ri' ami tuin neu' Titus la'e-neu' emi, tebe. 15 De fai bea ma ana nafarene emi nonoi-tataom, ma emi dedea-nafadam, sona sue na emi seli. Ma nafarene tepo' fo leo emi naa' neu a, emi sipo' ana no hada-horomata, tehuu emi boe dale mara doda' neu' au susura ka. 16 Au amaho'o-atadale, nana huu au bisa amahere emi nai basa hihii-nanau' ara. De au dale ka ta doda' neu' emi!