Manetualain tao malole soa-neu' ita
6
Huu no ami moi-tao sama-sama moo Manetualain, de ami kokoe emi leo ia': Emi sipo ma Manetualain dale malole ina Na, de emi boso' tao ni neu' mana dadi taa'. 2 Huu fo Ria Susura Makamoi Na mana dui' nae,“Naraa la'e ledo-fain, Au amanene neu' o.
Au tulu-fali o, tepo' fo Au po'i-tata lahenda.”
Nenene matalolole! Besa' ia ledo-fai malole. Huu fo besa' ia Ramatua' a fai Na, fo po'i-tata na lahenda.a
3 De ami manea matalolole ao-ina mara, ela masoda roo-tetu'. Huu fo ami ta nau dadi eena-natabaa' soa-neu' lahenda fo leo Manetualain eno masoda Na neu. Ma ami boe nau dedea tuka matetu na, ela lahenda boso' ramumulu-ramamae' ami nade malole mara. 4 Basa-basan fo ri' ami tao, ami saka eno' fo matudu mae, ami nana Manetualain lahenda malalau-maoono malolen. De leo mae ami hapu susa, hapu doidoso, do masoda nai kakiliu-soroado' a talada boe, ami manenete mahere. 5 Fai fo ami hapu fefepa-lili'u, ena ami nai bui dale', lahenda ra adu nahuu-nalena', ami moi-tao sota maan seli, ami ta suku, ma fai fo mamalaa, ami manenete mahere.b 6 Ami manenete no dale malalao-malalafu'. Ami bubulu' dodou' la'e-neu' Manetualain. Ami manenete ma sabar. Ami tao malole soa-neu' lahenda. Ami mataa' Manetualain Dula-dale Na ator ami. Ami sue-lai matetu' lahenda, ma ta masarole-masarali'. 7 Tepo' fo ami dedea, ami dedea matetu', ta dedea fufudi'. Ami sipo kuasa neme Manetualain, fo tao malole. Ami sama leo' soldadu fo ri' homu Ramatua' a tee-tafan katema', de matati maseki musu. 8 Leo mae lahenda hada-horomata ami, do ara ramumulu-ramamae' ami nade malole ma; leo mae ara dedea ratuda ami, do ara ranea ami nade malole ma; leo mae lahenda dedea fufudi' rae, ami tipu-dai lahenda, do ara dedea rae, ami dedea matetu', tehuu ami manenete. 9 Ruma ta ralela' ami, tehuu dodou' ralela' ami nade ma. Lai dodou' kura bai' ami mate, tehuu ami bei masoda maroo boe. Ami hapu fefepa-lili'u lai' dodou', tehuu ami ta mate boe'. 10 Leo mae ami mameda maan bera' a, tehuu ami mamaho'o-matadale maroo. Leo mae ami doi' ta'a, tehuu ami tao ma lahenda dodou' ramasu'i nai dale nara. Ami ta manuu hata esa boe', tehuu sama leo' ami manuu basa-basan.
11 Ami dedea ledo-ledo soa-neu' emi nai kota Korintus. Ami sue-lai matetu' emi. 12 Ami matudu susue-lalaim neu' emi, ma ta eena-babaa. Tehuu emi eena-babaa susue-lalaim neu' ami. 13 De au nau lea-nore emi, sama leo' emi nana au ana kara. Malole lena' emi sue-lai maroo ami.
Boso' mabua-maesa mo lahenda fo ta ramahere Manetualain
14 Boso' mabua-maesa mo lahenda fo ta ramahere Kristus. Huu fo emi ta sama. Lahenda kamahere' fo leo-la'o roo-tetu', ma lahenda fo soa' Manetualain, ta naraa ara roi-tao reu' esa. Lahenda dale malole a no lahenda tadalu' a ta naraa dadi tia-lai. Ria sama leo' makaledo' a ta nabua no maiu'. 15 Kristus ta bisa dedea-rao' no nitu ra malaka na, hete?c Leo' naa boe, lahenda fo ta namahere Manetualain, ta hapu babati' sama-sama no lahenda kamahere'.
16 Emi dale dodoo ma leo bea'? Bate mae emi bisa leo Manetualain uma mamaso Na dale' meu, fo do'o-tabe Ni dei, besa' ko leo uma sosoko' dale' meu, fo hule-haradoi neu' hata sosoko' ara, do? Ta naraa fa, hete! Huu fo Manetualain nana Manetualain masoda'. Ria boe ita Ramatua na. Ma ita dadi sama leo' Ria uma mamason, nana huu Ana leo-naparasa nai ita dale nara. Huu fo mana dui' nai Manetualain Susura Makamoi Na dale' nae,
“Au uma Ka nai Au lahenda kara talada.
Au maso-kalua nai sira talada.
Au dadi sira Manetualain.
Sira boe dadi Au lahenda Kara.”d
17 Huu ria naa, Ramatua' a dui' nae leo' ia,
“Emi muste kalua meme sira talada mai, ma heo' meme sira mai,
ela emi boso' dadi sama leo' sira.
Emi dale mara muste lalao-lalafu'.
Emi muste doo' a meme basa-basan fo ri' nakekeo-nakakanu emi dale mara,
no ria naa, Au sipo' emi no malole.e
18 Au dadi emi Amam;
ma emi dadi Au ana Kara.
Ramatua' Mana Kuasa a,
ri' nahara-nadasi nae leo' naa.”f