5
Ita bubulu', ita ao-paan fo besa' ia nai dae-bafo' a, sama leo' mamana leleo-naparasa' esa. Leo mae ita ao-paa na neu' ko nalulutu', tehuu ita dale na boso' doda', nana huu Manetualain sadia fee ita mamana malole esa nai nusatetu-ikutema' a. Lahenda dae-bafo' a ta tao mamana' ria, tehuu Manetualain ri' taon. Mamana' ria manaetu-manabasa taa'. 2 Ita sota' no ita ao-paa besa' ia na nai dae-bafo' a. Ma ita tahii' pake ao-paa bebeu' nai nusatetu-ikutema' a. 3 Kalu ita losa nai naa, ria sama leo' ita ta po'irao'a huu fo ita ta dadi noi dula-dale', tehuu ita hapu ao-paa bebeu' nai naa. 4 Ita ao-paan fo ri' neu' ko nalulutu', tao na ita hela hahae' ara, nana huu tameda taan bera' a. Leo mae leo' naa, tehuu ita ta nau mate, de ta tanuu ao-paa' so'. Ta'a! Ita hapu ao-paa bebeu', ela kati ao-paa paraa', neni' soda' roo-tetu bebeu'. 5 Manetualain tao na ita sadia sipo soda' bebeu' ria. Ana fee ita Ria Dula-dale Na, fo dadi tanda namahere' esa neme Ria Hehelu Na.6 Huu ria naa, ita tamahere taroo tae, ita soda' ao-paa besa' ia na bei ta nabua-naesa no Manetualain. 7 De ita tasoda nana huu tamahere Manetualain. Ita ta tasoda nana huu hata fo ita bisa titan nai dae-bafo' ia. 8 Tehuu ita tamahere, uni' ko leo ita mate foa ela ita ao-paa besa' ia na, fo teu tasoda sama-sama to Manetualain nai nusatetu-ikutema', sona tantu ita tamaho'o taan seli. 9 De leo mae ita tasoda taroo nai dae-bafo' ia, do ita mate nai ia ela tasoda nai ele, penting a nana ri' ita saka eno' fo tao tamaho'o taroo Manetualain dale Na. Ita hihii-nanaun ria. 10 Boso' mafarene henin. Losa bea oo, basa lahenda ra muste reu rataa Kristus. Ria nana Mana Ee Dedea', de uku-sudi basa lahenda masodan nai dae-bafo' ia. Neu' ko Kristus balas lahenda natetu-naraa no ria nonoi-tataon. Huu fo Kristus bubulu', lahenda ria tao malole, do tao tadalu'.b
Ita bisa malole to Manetualain, nana huu Kristus
11 Ami mafarene mae, neu' ko Kristus parisa' ami masoda ma, huu ria naa, ami bii' ma hada-horomata neu' Ana. Ma ami moi-tao sota maan seli, fo lele'o lahenda ela ara bisa ramahere Kristus. Manetualain bubulu' ami dale mara lalao-lalafu'. Au nau emi boe bubulu' ami dale mara lalao-lalafu'. 12 Ami ta io ao mara nai emi mata-idum. Ta'a. Tehuu ami mafada ami nonoi-tatao roo-tetum ela emi pake ni dadi nete', fo emi bisa dedea bau-ina' la'e-neu' ami, ma boso' bii-mae'. No ria naa, emi bisa mataa lahenda bafa maloa sira. Huu fo ara raloloa bafa nara la'e-neu' nonoi-tatao' fo ri' lahenda bisa rita, sekonaa te sira dale nara ta lalao-lalafu'. 13 Leo mae emi mae ami kamulu', tehuu ami tao leo naa', ela ami malala'o Manetualain nonoi-tataon. Leo mae emi ta bubulu', tehuu Manetualain bubulu'. Kalu ami dedea pake dudu'a-aafi makaneu', sona ami dedea leo naa' ela tulu-fali emi.
14 Kristus sue-lai na ita seli. Ria ri' tao na ami makate' malala'o ami nonoi-laka ma. Huu fo ami mamahere mae, noi Lahenda esa' a ri' Kristus, mate kati basa lahenda. Ria sosoa-raraan nae, sama leo' ita basa mate fo foa ela masoda paraa' a, ma ta tanuu haak fo tuka dae-bafo' a hihii-nanaun. 15 Kristus mate soa-neu' basa lahenda, ela basa lahenda fo rasoda rai dae-bafo' ia, ta rasoda tuka sira hihii-nanau mesa nara. Tehuu besa' ia ara muste rasoda tuka Kristus hihii-nanaun, huu fo Ana mate kati si, ma Ana nasoda selu'.
16 De mulai neme besa' ia mai, ita boso' uku-sudi lahenda pake lahenda dae-bafo' a uuku-susudin. Leo mae maulu na ita uku-sudi Kristus pake lahenda dae-bafo' a dudu'a-aafin, tehuu besa' ia ami ta uku-sudi Ni leo naa' so'. 17 Huu ria naa, lahenda dae-bafo' bea nabua-naesa no Kristus, ana nanuu soda' bebeu'. Ana ta sama leo' maulu na, huu fo masoda paraa na sapu-lalo, de ne'es ana so! Huu fo besa' ia hapu masoda bebeu' so. 18 Manetualain ri' adu-tao basa ia ra. Ria ri' adu mole-dame de ita malole selu' to Ni, nana huu Kristus sae-safe heni ita sala-sikon. Ria boe fee ita nonoi-laka', fo ita bisa tatudu eno' ela lahenda feke' bisa mole-dame selu' ro Manetualain.
19 Mafarerene' te, tepo' fo Kristus bei nai dae-bafo' a, Manetualain pake Ni ela noo lahenda reu mole-dame selu' ro Manetualain. De Ana ta reke sira sala-sikon, ma ara ta lepa sala-siko' a huhuku na so'. Boe ma Ana fee ita nonoi-laka' fo teu tafada lahenda tae, ara bisa malole selu' ro Ni.
20 Ita dadi Kristus lima boa ona Na. De Manetualain pake ita ela foo-lolo lahenda mai mole-dame selu' ro Ni. Huu no ami dadi Kristus lima boa ona Na, de ami hule kokoe emi, nana huu “Manetualain nahii' emi malole selu' mo Ni.” 21 Kristus ta parnaa tao sala-siko'. Tehuu Manetualain tao Naan lepa ita sala-sikon. Manetualain tao leo naa' soa-neu' ita, nana huu Kristus mamate na soi eno', ela ita bisa tasoda no dale roo-tetu', sama leo' Manetualain boe dale roo-tetu'.