Hata-heto mabeli fo mana peda' nai ure dae dale'
4
Manetualain natudu dale kasian na neu' ami, de Ana nadenu ami, mafada lahenda la'e-neu' Ria Hehelu Bebeu Na. Huu ria naa, ami makate maroo. 2 De neme ulu' mai ami maetu' maan kalu ami ta nau tao hihii-nanau' tadalu', sama leo' lahenda feke' ara. Ara rahii' tao rafufuni', ela boso' lahenda rita, ma ara ta ranuu mata mamae'. Tehuu ami ta nau mapuputa' lahenda. Ami ta dedea fufudi' la'e-neu' Manetualain Hara-dasin, tehuu ami manori-mafada neu' loan hata roo-tetu' a. No ria naa, basa lahenda bisa parisa' ami nanori-nafadam nai Manetualain matan, boe ma uku-sudi ao nara ami lahenda dae-bafo' rupa ubea'. 3 Kalu Manetualain Tutui Malolen fo ri' ami tui-bekan, lahenda ta nau bubulu' ana, sona neu' ko ara ralulutu', huu fo sira bika-bati reme Manetualain mai.4 Nitu ra malaka na, sama leo' ramatua' esa rian, de besa' ia lahenda ra do'o-taben. Ana tao na lahenda ruma dudu'a-aafi nara tuku', sama leo' poke dale nara. Sira nana si' lahenda fo ta ramahere ita Manetualain roo-tetu' a. Huu no poke si, de ria sama leo' ara ta bisa rita Manetualain makaledo Na. Huu ria naa, ara ta bisa bubulu' Tutui Malole la'e-neu' Kristus. Sira boe ta bubulu' Kristus marela-masa'a Na. Kristus nana, rupa-lole' esa no Manetualain. 5 Ami ta dedea dodou' la'e-neu' ami ao-ina heheli mara. Tehuu ami dedea dodou' la'e-neu' Yesus Kristus, ita Ramatua na. Ami dedea dodou' la'e-neu' ami ao-ina heheli mara nana noi ri': ami tao ao mara sama leo' ata fo malalau' emi, nana huu ami dadi Yesus lahendan. 6 Fai a ulu na, parnaa Manetualain dedea nae, “Makaledo' a muste nahaa nai mamana maiu'.” Boe ma Ana tao na Ria makaledo Na, nahaa nai ita dalen. Huu fo Ana nahii' fee ita Ria makaledo Na. Ria sosoa na nae, fai fo ita du'a-afi la'e-neu' Kristus, ita boe tafarene Manetualain marela-masa'an.a
7 Leo mae ami noi lahenda dae-bafo' biasa, tehuu Manetualain peda-fua hata-heto mabeli ia nai ami dale mara. Ria sama leo' lahenda esa peda hata-heto mabeli na, nai ure dae dale'. Hata-heto mabeli ia, ri' Manetualain makaledo Na. Matetu na ri', kuasa bau-ina' fo ri' nai ami, ta naoka-nasamu neme ami, tehuu naoka-nasamu neme Manetualain mai. 8 De leo mae lahenda tao rasususa' ami nai basa mamana' ain, tehuu ami manenete maroo. Leo mae ami ta bubulu' basa-basan, tehuu ta mopo ami makate ma. 9 Leo mae lahenda tao rasususa' ami, tehuu Manetualain ta foa ela ami mesa' kami. Leo mae lahenda ese-rumu ami, tehuu ara ta bisa ralulutu' ami. 10 Huu no ami hapu eese-rurumu rupa', de ami leo bea' meu, sona ami bisa mafarerene' fee lahenda mae, fai fo Yesus mate a, Ana hapu eese-rurumu' dodou' boe. Leo mae lahenda ese-rumu ami rupa' ara, tehuu ami masoda maroo. Ria boe fee nafarerene' nae, Yesus leo nahere nai ami ao-ina mara dale'. 11 Tebe! Lai' dodou' ami fo ri' bei masoda ia a, kura bai' mate, nana huu ami dadi meu' Yesus lahendan. No ria naa, basa lahenda bisa bubulu' rae, Yesus fee ami masoda matetu', leo mae neu' ko ami mate. 12 De leo mae neu' mate'e na ami mate, tehuu ami ta bii' dedea la'e-neu' Kristus. Ami sadia mate leo' naa, ela emi bisa hapu soda matetu'.
13 Manadui' nai Manetualain Susura Makamoi Na dale' nae, “Huu no au amahere Manetualain, de au dedea.” Ami dudu'a-aafim boe, sama. Huu no ami mamahere Manetualain, de ami muste mafada lahenda la'e-neu' Ana.b 14 Ami bubulu' Manetualain ri' fee ita Ramatuan Yesus Kristus nasoda selu' neme mamate na mai. Ria boe neu' ko fee ita tasoda selu', nana huu ita tabua-taesa to Yesus. Neu' ko Manetualain fee ita basa tapadei nai Ria mata Na, fo Ana sipo' ita. 15 Manetualain tao basa hihii-nanau' ia ra, ela tulu-fali emi. Ria boe nau natudu dale malole Na neu' lahenda fo ri' tuka-tuka fai' tamba dodou' la'o naroo. Neu' ko ara hule makasi dodou' neu' Ana. No ria naa, ara manaku Ria marela-masa'an.
Ita tamahere taroo Manetualain
16 Huu ria naa, ita tanenete taroo, ma ta mopo makate' a. Leo mae ita ao-paa na ta nabebe'i, tehuu Manetualain natetea ita dale na tuka-tuka fai'. 17 Tuka ita dale dodoo-tatain, besa' ia ita hapu susa-lela rupa' ara. Tehuu ita muste tafarene tae, neu' ko Manetualain nadedema ita. Huu ria naa, ita tao ita susa-lelan sira sosoa-raraa taa', kalu tararaa' ana no hata fo neu' ko mori-dadi! 18 De ita muste mete-relu basa hihii-nanau' fo ta nananita'. Boso' mete-relu noi hihii-nanau' fo nananita'. Huu fo hihii-nanau' nananita' a, noi hatemata'. Tehuu basa hihii-nanau' fo ta nananita', nana manaetu-manabasa taa'.