Doi' fo lahenda fee ela tulu-fali Manetualain lahenda nara
16
Besa' ia, au nau dui' la'e-neu' doi' fo ri' emi mabubua ma, ela tulu-fali Manetualain lahenda nara rai Yerusalem. Au afada lahenda kamahere' ara rai propensi Galatia, eno na leo bea' sira muste rabubua doi'. Besa' ia emi boe muste tao tuka sira.a 2 Leo ia': tuka-tuka fai mamaso' lahenda Yahudi, basa lahenda muste peda sira doin bai', neme sira sosota-bebe'i nara. Boso' mahani au mai, besa' ko emi mulai urus fo mabubua doi'. 3 Kalu au mai, sona tudu ma emi lahendam fo ri' mamahere si, ela reni doi' tutulu-fafali' sira fee Manetualain lahenda nara rai Yerusalem. Neu' ko au dui' fee susura' ela mauli-malaka jama'at fo rai naa ralela' asa. 4 Ma kalu emi mae malole lena' au tuka, sona ami bisa meu bela' a.Paulus bobo'o nau leo mamana' dodou' neu
5 Kalu au la'o rule-feo propensi Makedonia, sona besa' ko au leo emi naa' uu. Tehuu au bei leo Makedonia uu dei.b 6 Au nau leo amanoso bai' oo emi; bate basa fai oe faa' esa katema'. Basa dei, emi bisa moo au leo mamana' esa uu bali. 7 Au ae ta oi tuli' emi fa. Au nau leo amanoso oo emi, kalu Manetualain nau. 8 Tehuu au bei nau leo nai kota Efesus ia, losa fai malole Pentakosta, [ri' basa fai malole Paska a fai' lima hulu].c 9 Huu fo nai ia au hapu lela mana'a-hii', de bisa oi-tao nonoi-tatao' dodou', leo mae lahenda dodou' ralena laka neu' Manetualain nonoi-tataon.d
10 Kalu Timotius dadi leo emi neti, sona sipo' ana no malole, ela ana boso' teisusa-dalehedi. Huu fo ria nana ita Ramatua na lahenda mana noin sama leo' au.e 11 Boso' mataa' lahenda mete ni reni' mata i'o nara. Tulu-fali ni, losa' ana fali no soda-mole', ela ana bisa natafali leo au mai. Huu fo au oo toranoo feke' ara mahani ni.
12 Bei hihii-nanau' esa bali. Au lele'o ita toranoon Apolos, ela ana neu dama emi ma toranoo feke' ara. Tehuu ana bei ta nau neu besa' ia. Neme' naa, ela ana hapu lela' dei, besa' ko leo naa' neu.
Tao selu' hihii-nanau' esa
13 Emi muste manea matalolole ao-ina mara! Emi muste manenete fo mamahere maroo Manetualain! Boso' bii'! Bara'aai ao mara! 14 Emi tao sudi la'e ubea' a, sona matudu emi dale susue-lalai mara.
15 Toranoo susue kara! Emi basa bubulu' a'a Stefanus no ria uma isi nara si' ramahere masososa Kristus nai propensi Akaya. Sira roi-tao sota raan seli, fo ralalau' basa lahenda kamahere' ara rai naa. De au hulef 16 emi mamania-mamanene neu' lahenda leo naa'. Si' lahenda fo roi-tao sota raan seli ela sama-sama ralalau' lahenda kamahere' ara.
17 Au ahii' uu dama emi. Tehuu au dale ka namaho'o-natadale, huu fo a'a Stefanus, a'a Fortunatus, ma a'a Akaikus mai rai ia. No ria naa, ara kati emi. 18 Sira ratetea au dale ka, sama leo' ara ratetea emi dale mara boe. Emi muste fee hada-horomata neu' lahenda rupa leo naa' ara.
Paulus haitua haraoe soda-mole' fee basa-basan
19 Jama'at fo rai propensi Asia haitua fee emi haraoe soda-mole'. A'a Akila, sao inan, susi Priskila,g ma basa lahenda feke' fo biasa rabua rai sira uma na, haitua haraoe soda-mole', nana huu sira boe rabua-raesa ro ita Ramatua na la'o naroo.h 20 Basa lahenda kamahere' fo rai ia, haitua haraoe soda-mole' boe.
Kalu emi mabua, sona esa sipo' esa pake nade'i lalao-lalafu' matetu-maraa' soa-neu' lahenda kamahere' ara.
21 Soba mete dei! Au, Paulus, au dui' mata ki ae leo' ia: Soda-mole'!
22 Bea ta nanuu susue-lalai' neu' ita Ramatua na, neu' ko Manetualain feen huhuku'.
Au ahii' ate'a lahenda, pake ami lahenda Yahudi a dedea Aram nae, “Marana ta!” Ria sosoa na nae, “Ramatua'! Mai leo!”
23 Au hule fo Yesus, ita Ramatua na, natudu dale malole Na neu' emi.
24 Au sue emi basa, nana huu ita sama-sama tabua-taesa to Kristus, fo ri' Manetualain feen mai.
Te'e ada' ia leo. Soda-mole'!
Neme au,
Paulus