Manetualain Dula-dale Na fee Ria lahenda nara esa' ko no' babati-papalan
14
Saka eno' fo masue-malai ao nai basa hihii-nanau' ara dale'. Huu fo ta hapu hihii-nanau' feke' penting lena so'. Saka eno' fo Manetualain Dula-dale Na fee emi kuasa, ma babati-papala' ela emi bisa tao hihii-nanau' malole. Ma malole na ri', kalu emi hapu babati-papala' fo tui-beka Manetualain hehelu-barataan. 2 Kalu lahenda bea nanuu babati-papala' fo dedea pake dedea Dula-dale Malalao-malalafu', sona Manetualain Dula-dale Na fee ni kuasa, ela dedea hihii-nanau' fo bei ta makaledo'. Huu fo ana ta dedea no lahenda feke', ana dedea no noi Manetualain. De lahenda fo rabua rai naa, ta hapu esa bubulu' lahenda ria dedea-nafadan. 3 Tehuu kalu lahenda nanuu babati-papala' fo tui-beka Manetualain hehelu-barataan, ana fee hehelu-barataa' soa-neu' basa lahenda fo rai naa. Ana nafofoa lahenda namahere na neu' Manetualain, natetea dale nara, ma o'oe-nanasi lahenda mana susa' ara. 4 Lahenda bea dedea pake dedea Dula-dale Malalao-malalafu', ana natetea noi ria ao-ina heheli na. Tehuu lahenda bea tui-beka Manetualain hehelu-barataan, ana natetea basa jama'at, ela ara boe-boe dadi tea-mepe'.5 Au ahii' emi basa bisa dedea pake dedea Dula-dale Malalao-malalafu'. Tehuu au hihii bau-ina ka, emi bisa tui-beka Manetualain hehelu-barataan. Huu fo lahenda bea tui-beka Manetualain hehelu-barataan, ria sosoa-raraan lena neme lahenda fo pake noi dedea Dula-dale Malalao-malalafu'. Kalu dedea pake dedea Dula-dale Malalao-malalafu', ria malole a boe, sadi lahenda bisa nafada dedea' ria sosoa na. No ria naa, hehelu-barataa' ria boe-boe tao natetea basa jama'at de ara bisa bubulu'.
6 Toranoo susue kara! Dodoo-tatai masudi hihii-nanau' ia. Uni' ko leo au leo emi mai, boe ma au dedea pake dedea Dula-dale Malalao-malalafu' de emi ta bubulu', emi onto ubea? Ta'a hete? Kalu au dedea oo emi, malole lena' au tui-beka Manetualain hihii-nanaun. Au tui neu' loa na hihii-nanau' fo maulu na ta makaledo'. Leo' naa boe au tulu-fali emi ela bubulu' matalolole hihii-nanau' rupa'. Ma au afarerene' fee emi Manetualain Hara-dasin. Malole lena' au anori-afada emi. Ria besa' ko nanuu sosoa-raraa' soa-neu' emi, hete?
7 Leo' naa boe musik ara. Sira ta hata masoda', tehuu ara kalua lii rupa'. Lahenda soda pake suling, sasandu, do juk, tehuu kalu lii nara ta raraa fa, tantu lahenda ta bisa bubulu' ana namina' sosoda ubea' ria. 8 Ma kalu saki a lii na ta matetu', sona tao leo' bea fo soldadu ra bisa bubulu' tanda na, de rahehere ao nara reu musu? Ta bisa fa, hete? 9 Leo' naa boe soa-neu' emi. Kalu emi dedea pake dedea Dula-dale Malalao-malalafu', do pake dedea' fo lahenda ta bubulu' matetu' ana, ria sama leo' emi dedea sosoa-raraa' taa'. Ria mana dadi taa', huu fo lahenda ta bisa bubulu' o maksud ma! 10 Dedea rupa' dodou' nai dae-bafo' ia. Dedea' ara esa' ko no' sosoa-raraan. 11 Tehuu kalu au ta alela' lahenda feke' a dedean, ria sosoa-raraa taa' soa-neu' au. Au ta bubulu' sira, ma sira boe ta bubulu' au. Ami esa no esa dadi' lahenda mana mai.
12 Leo' naa boe neu' emi. Emi nau hapu kuasa ma babati-papala' neme Manetualain mai. Ria malole a. Tehuu malole lena' emi saka eno' fo hapu kuasa ma babati-papala' ela emi bisa mafofoa lahenda kamahere' dodou'!
13 De lahenda bea dedea pake dedea Dula-dale Malalao-malalafu', sona malole lena' ana hule-haradoi neu' Manetualain, fo fee ni babati-papala' ela bisa nafada dedea Dula-dale Malalao-malalafu' ria sosoa-raraan. 14 Kalu au hule-haradoi pake dedea Dula-dale Malalao-malalafu', au hule-haradoi uni' dale ka, tehuu ta bubulu' ae au dedea ubea'. 15 De malole na ri' au tao leo bea'? Au pake bela' dua si, tehuu esa' ko no' ria ledo-fain. Au hule-haradoi uni' dale ka. Ma au boe hule-haradoi pake dedea' fo au bubulu'. Au soda sosoda i'io-o'oa neu' Manetualain uni' au dale ka. Ma au boe bisa soda pake dedea' fo au bubulu'. 16 Kalu o pake dedea Dula-dale Malalao-malalafu' fo io-oa Manetualain neme o dale ma mai, boe ma lahenda fo nai naa ta bubulu' hihii-nanau' ria, tao leo' bea fo ana bisa dale' esa no o? Fai bea ma o hule makasi neu' Manetualain pake dedea Dula-dale Malalao-malalafu', tao leo' bea fo ana bisa nataa nae, “Tebe!” Ta bisa fa, hete? Huu fo ana ta bubulu' o dedea ma. 17 O bisa hule makasi neu' Manetualain mae leo' naa. Tehuu ria ta natetea lahenda feke' dalen.
18 Bate emi ta bubulu' au dedea pake dedea Dula-dale Malalao-malalafu' lena neme emi basa. Ma au hule makasi neu' Manetualain, nana huu Ana tao na au bisa dedea leo naa'. 19 Tehuu kalu lahenda kamehere' ara rabua, malole lena' au anori-afada si pake noi dedea eetu', ela ara bisa bubulu', lole na lena heni au dedea amaloloa-amananaru pake dedea Dula-dale Malalao-malalafu', tehuu ara ta bubulu'.
20 Toranoo susue kara! Soa-neu' hihii-nanau' sira, emi muste du'a-afi leo' lahenda lasi'. Boso' du'a-afi sama leo' ana aana'! Tehuu soa-neu' hihii-nanau' tadalu' a, emi muste leo' ana aana' fo ta tao ralela' hihii-nanau' tadalu' ara, huu fo sira dale nara lalao-lalafu'. 21 Nai Manetualain Susura Makamoi Na, mana dui' nae:
“Ita Ramatua na dedea nae,
‘Au pake lahenda fo dedea pake dedea Dula-dale Malalao-malalafu',
ela Au dedea fee lahenda nusa Israel ia ra.
Tehuu leo mae Au dedea leo bea' boe,
ara ta ramanene Au.’”a
22 Huu ria naa emi bubulu' kalu lahenda dedea pake dedea Dula-dale Malalao-malalafu', ria dadi tanda soa-neu' lahenda fo bei ta ramahere Manetualain, ela rita Ria kuasa Na. Tehuu ta tulu-fali lahenda fo ri' ramahere Manetualain so a. Ma kalu lahenda tui-beka Manetualain hehelu-barataan, ana tulu-fali lahenda fo ri' ramahere Ni so a. Tehuu ta tulu-fali lahenda fo ri' bei ta ramahere Ni. 23 Uni' ko leo emi mabua, de emi basa dedea pake dedea Dula-dale Malalao-malalafu', boe ma lahenda kamahere taa', do lahenda fo ta bubulu' hihii-nanau' ia ra, maso' rai emi talada, neu' ko ara du'a-afi leo bea'? Tantu ara rae, “Lahenda kamulu' ia ra do!”
24 Tehuu uni' ko leo emi mafada neu loan Manetualain hehelu-barataan, boe ma lahenda kamahere taa', do lahenda fo ta bubulu' hihii-nanau' ia ra, maso' rai emi talada. Tantu lahenda sira nau ramanene hata fo ri' emi dedean. De hata fo ri' emi dedean, natudu ria sala-sikon losa' ana parisa' nalulutu' masoda heheli na. 25 Boe ma hihii-nanau tadalu' fo bei nafuni' nai dale na, neu' ko basa lahenda bubulu'. De lahenda ria sunda' undulaka na fo do'o-tabe Manetualain, ma manaku nae, “Tebe-tebe Manetualain nai emi talada!”
Basa hihii-nanau' fo ita tao, sona tao tuka matetu na. Boso' liuaari
26 Toranoo susue kara! Lahenda ra esa' ko no' ria babati-papalan. De kalu emi mabua, sona ruma soda sosoda i'io-o'oa neu' Manetualain. Ruma ranori-rafada la'e-neu' Manetualain. Ruma tui neu' loan hihii-nanau' neme Manetualain, fo ri' fai a ulu na bei nafuni'. Ruma dedea pake dedea Dula-dale Malalao-malalafu'. Ma ruma bisa rafada dedea' ria sosoa-raraan. Ara muste tao basa hihii-nanau' sira, ela ratetea lahenda feke' ara namaheren.
27 Kalu bea nau dedea pake dedea Dula-dale Malalao-malalafu', ria malole a. Boso' dodou'. Leo mae noi lahenda dua do telu boe, dai so. Tehuu esa dedea basa dei esa bali. Ma muste lahenda feke' bisa nafada sira dedea na sosoa-raraan. 28 Uni' ko leo ta hapu lahenda bisa nafada dedea' ria sosoa-raraan, sona boso' dedea pake dedea Dula-dale Malalao-malalafu' nai lahenda kadodou' ara matan. Neme' naa ela ara dedea leo naa' nai dale nara. Sira boe bisa dedea leo' naa ro Manetualain.
29 Kalu emi mabua, ela noi lahenda dua do telu' a ri' tui-beka Manetualain hehelu-barataan. Feke' ara muste dodoo-tatai ratalolole sira dedea na. 30 Tehuu uni' ko leo lahenda esa natuu' nai naa, Manetualain nau feen bubulu' hihii-nanau' fo maulu na ta makaledo' a, sona lahenda ria muste nafada hehelu' ria neu' basa lahenda fo rai naa. Ma lahenda mana dedea nai mata a muste hahae, fo fee lela' neu' lahenda ri' besa' ko namanene neme Manetualain mai a, ela ana dedea. 31 Matetu na ri', emi basa bisa tui-beka Manetualain hehelu-barataan. Tehuu ela lahenda esa dedea basa dei, besa' ko ria nonoo na. No ria naa, basa lahenda ra bisa ramanene, basa-basan bisa ranori ma basa-basan rameda raan sira dale na boe-boe tea-mepe'. 32 Mafarerene', lahenda fo tui-beka Manetualain hehelu-barataan, muste ator nalela' ao-ina na, fo nahani ela esa dedea basa dei, besa' ko esa bali. 33 Huu fo nai Manetualain ta hapu liuaari'. Basa-basan mana ator matalolole'.
Nai bea-bea oo, kalu lahenda kamahere' ara rabua, sona biasa leo ia': 34 Ina' ara muste ratuu' nenee'. Ara boso' dedea dodou'. Muste ramania-ramanene neu' mauli-malaka ra. Huu fo Manetualain Atoran Na boe nae leo' naa, hete? 35 Kalu bea nau natane hihii-nanau' esa, sona fali neu' uma dei natane sao tou na. Huu fo ina' ara isu-ote nai uma mamaso' dale', sona tao mamae'!
36 Ubea' taon de emi ta sipo' hata fo ri' au dedea ni. Emi dudu'a-aafim leo bea'? Manetualain Hara-dasin ta neme emi mai! Ma Ria Hara-dasin ta soa-neu' noi emi nai kota Korintus! Afi matalolole dei! 37 Kalu lahenda nae ria bisa tui-beka Manetualain hehelu-barataan, do afi nae ria sipo kuasa neme Manetualain Dula-dale Na, sona ana bubulu' nae, hihii-nanau' fo au dui' fee emi a, ta atoran neme au mai, tehuu pareta ria neme Yesus, ita Ramatua na. 38 Kalu lahenda bea ta nau sipo' hihii-nanau' ia ra, sona emi boso' sipo' ana.
39 Toranoo susue kara! Mahehere ao mara fo sipo kuasa ela emi bisa tui-beka Manetualain hehelu-barataan. Ma boso' horo lahenda mae, sira ta bole dedea pake dedea Dula-dale Malalao-malalafu'. 40 De kalu emi mabua, sona malala'o basa-basan no matetu-maraa'. Basa hihii-nanau' esa dei, besa' ko feke' a. Malala'o basa-basan tuka atoran, boso' liuaari.