Susue-lalai matetu'
13
Uni' ko leo au bisa dedea pake basa dedea rupa', dedea' lahenda dae-bafo' do, dedea' neme Manetualain eila'o-limalopen rai nusatetu-ikutema' a, tehuu au ta anuu susue-lalai' bai' boe', ria onto ubea'? Au dedea ka rou', sama leo' me'o a nalii, do darom a nalii dolo-dolo. 2 Uni' ko leo au anuu babati-papala' fo tui-beka Manetualain hehelu-barataan neu' Ria lahenda Nara, ma au bubulu' basa hata nino a, ma basa hihii-nanau' fo lahenda malela' ara bubulu', ma kalu au amahere tebe-tebe Manetualain, losa' au bisa lali heni lete' ara, tehuu au ta anuu susue-lalai' bai' boe', ria sosoa-raraan ubea'? Au nonoi-tatao ka, sosoa-raraa' ta'a.a 3 Leo mae au se'o heni katema' hata-heto ki, boe ma babati doi nara ela ahao lahenda manato'a-manataa' ara, do fee heni au ao-ina ka dadi tutunu-hohotu',b tehuu au ta anuu susue-lalai' bai' boe', ria sosoa-raraan ubea'? Au ta anuu dasar fo atutua-adedema ao ka. Huu fo ria mana dadi taa'! Ta onto hata esa boe'.4 Susue-lalai' a, balaroe-balanau'.
Susue-lalai' a, sabar.
Susue-lalai' a, ta namanasa'.
Susue-lalai' a, ta natutua-nadedema ao'.
Susue-lalai' a, ta koao'.
5 Susue-lalai' a, ta baraa'ai fa.
Susue-lalai' a, ta soa noi ao-ina heheli' a.
Susue-lalai' a, ta muda' laesa' namanasa.
Susue-lalai' a, ta napeda dale' nalela'.
6 Susue-lalai' a, namaho'o neu' hata roo-tetu',
ma ta nahii' hihii-nanau' ta roo-tetu'.
7 Susue-lalai' a, ta nalale balas lahenda nonoi tadalun.
Susue-lalai' a, namahere naroo.
Susue-lalai' a, namahena-nabani.
Susue-lalai' a, nanenete naroo.
8 Susue-lalai' a ta namaetun.
Tehuu hata fo ri' Manetualain mana nesi mata nara rafada, mate'e na te ta parluu so'. Ma kalu lahenda dedea pake dedea rupa', mate'e na te ta parluu so'. Ma hata fo ri' lahenda malela' ara bubulu', mate'e na te sosoa-raraa' ta'a. 9 Besa' ia, ita bubulu' noi baiana'. Kalu ita dadi Manetualain mana nesi matan, ita tafada noi' hihii-nanau' fo bei ta namadai. 10 Tehuu losa ledo-fain, neu' ko basa-basan namano'u-namadai. Tepo' ria te hihii-nanau' fo bei ta namano'u-namadai boe, sosoa-raraa' ta'a.
11 Conto na leo ia': tepo' fo au bei aana', au dedea sama leo' biasa ana aana' ara dedea a. Au boe du'a-afi sama leo' biasa ana aana' a dua'-afi. Tehuu besa' ia au ambau-ina so. Huu ria naa, au ta leo-la'o sama leo' ana aana' so'.
12 Conto feke' bali: besa' ia, ita bisa tita dae bai', tehuu bei sama leo' tita salao' ara nai tiro-ao faki'. Tehuu neu' ko ita tita no matetu', sama leo' nai ita mata-idun. Besa' ia au bubulu' noi baiana'. Tehuu neu' ko au bisa bubulu' basa-basan, sama leo' Manetualain bubulu' basa-basan la'e-neu' au ao-ina ka.
13 De ita muste tao hihii-nanau' telu fo ri' rahere raroo, si':
ita muste tamahere taroo Ramatua' a;
ita muste tamahena-tabani taroo tae, neu' ko Ana ator basa-basan dadi malole;
ma ita muste tasue-talai ao taroo.
Neme hihii-nanau' ia ra telu, penting naan seli a, nana ri', susue-lalai'. Huu fo susue-lalai' a ri' malole lena neme basa-basan.