3 Au nau ataa atafali' soa-neu' lahenda fo ri' nahii' sale au a, leo ia': 4 Emi afi mae au oo Barnabas ta manuu haak sipo nanaa-nininu' neme lahenda fo ami manori-mafada si a, do? 5 Emi afi mae, ami ta manuu haak fo sao ina Kristen, ela bisa tuka fo sama-sama malalau' nai mamana feke', do? Sekonaa te Ramatua' a lahenda nadedenu feken roo sira sao ina nara. Ramatua Yesus fadi nara ma Petrus boe tao leo naa'!^a 6 Do, emi afi mae noi au oo Barnabas muste moi nonoi' saka doi-tali ela ami masoda, fo manori-mafada lahenda? 7 Emi aafim ria dasar na leo bea'? Mete noi soldadu ra. Sira ta parluu asa nanaa' ma kakao-papake'. Mete noi lahenda mana noi nai oka anggor. Ta hapu esa horo ni nae, “O ta bole mua anggor boa' sira!” Mete noi mana foo ra. Sira ranuu haak rinu sosoe' neme bibi-lopo fo ara foo a.

8 Au lahenda dae-bafo' biasa ia, au ta dedea tuka dudu'a-aafi mesa ka. Huu fo Manetualain Atoran nara rafada hihii-nanau' sama leo' naa boe. 9 Nai ba'i Musa Atoran na dale' mana dui' nae, “Fai fo sapi a aai hade, ela loo heni deke na neme pule na mai, boso' rapa maisa' bafa na ela ana bisa naa.” Emi afi mae, Ramatua' a naboi-nasamao noi sapi a, do?^b 10-11 Ta'a! Ana nafada nae Ria mete-relu ita boe! Huu fo mana dui' boe nae, “Fai fo lahenda manafoi dae, ma lahenda manaetu-manaoru ra, roi nonoi', ara bubulu' neu' ko sira hapu babati'.” Leo' naa boe, lahenda nadedenu' Kristen ara bisa sipo sira nuu babatin, neme sosota nara mai. Kalu ami manori-mafada emi hihii-nanau' neme Manetualain Dula-dale Na, ria sama leo' lahenda maue-maosa esa sele-tande. De kalu ami manori-mafada basa, sona naraa sipo nanaa-nininu' neme emi mai.^c 12 Lahenda feke' fo ranori-rafada emi, ranuu haak sipo nanaa' ma hata feke' neme emi mai, hete? Ami manuu haak lena neme sira mai!

Tehuu emi bubulu'. Ami ta parnaa pake ami haak ma fo partutu leo naa'. Ami manenete nai hihii-nanau' rupa' dale', ela boso' tao fee emi pupute-aai'. No ria naa, emi mahii' mamanene Kristus Tutui Malolen fo ri' ami tui-bekan soa-neu' emi. 13 Soba dodoo! Malaka agama fo ri' ralalau' nai lahenda Yahudi ra Uma Mamaso Yahudi Ina na, sira rasoda reme neneni-fefee' fo ri' lahenda reni. Ma lahenda fo nalalau' nai mei tutunu-hohotu', ara bisa raa paa' neme banda fo ri' lahenda reni.^d 14 Leo' naa boe, Manetualain hehelu-barataa Na nae, lahenda fo nanuu nonoi-laka' tui-beka Kristus Tutui Malolen, ara bisa rasoda reme sira sosota na mai. Ria ri' la'e.^e

15 Leo mae au anuu haak fo asoda leo naa', tehuu au ta tao leo naa'. Au ta anuu maksud dui' susura' ia, ela emi fee au hata-heto. Au alalau' emi doo' a so, ma au ta hule hata-hata esa neme emi mai boe'. De malole lena' au mate, lena heni lahenda afi rae au alamemei. 16 Leo mae au tui-beka aroo Ramatua' a Tutui Malole Na neu' lahenda, tehuu ria ta dadi dasar fo au bisa dedea bau-ina'. Huu fo Manetualain nadenu au leo naa', de au muste afada lahenda la'e-neu' Ana. Kalu au ta tao leo naa' tuka au nonoi-laka ka, sona au soe! Huu fo tantu au hapu huhuku'. 17 Kalu au oi-tao nonoi-tatao' ia nana huu noi au hihii-nanau mesa ka, sona hata-heto fo au hapu a, sama leo' lahenda mana noi a sipo kadi. Tehuu kalu au oi-tao nonoi-tatao' ia, nana huu Manetualain nadenu au, ria feke'. Huu fo Ana namahere au, de anea Ria hata-heto mabelin. 18 De kalu leo' naa, sona au seseba-babae ka, ubea'? Au ta parluu sipo kadi! Au tui-beka Ramatua' a Tutui Malole Na, ma ta hule hata-hata esa boe'. Ria ri' tao na au ameda aan dai so. Ma au ameda aan dai a, sama leo' au seseba-babae ka. De leo mae au anuu haak rupa' leo' lahenda fo nonoi-laka na ri' tui-beka Tutui Malole, tehuu au ta nau pake katema' au haak ka.

19 Au lahenda po'ilota' fo oi-tao tuka au hihii ka. Lahenda ta nanuu haak fo nadenu au tao ia, do tao ria. Leo mae leo' naa, tehuu au tao ao ka sama leo' ata, de basa lahenda ranuu haak radenu au. No ria naa, au bisa tulu-fali lahenda dodou', ela ara bisa tuka rahere Manetualain. 20 De kalu au abua oo lahenda Yahudi, sona au tao ao ki leo' lahenda Yahudi, fo tulu-fali lahenda Yahudi ra ela ralela' Manetualain. Kalu au abua oo lahenda fo homu rahere Manetualain Atoran Na, au tao tuka Manetualain Atoran Na, fo au boe bisa tulu-fali si ela ralela' Manetualain, (leo mae au bubulu' tao tuka Atoran a ta bisa tao na au malole oo Manetualain). 21 Kalu au abua oo lahenda fo ta bubulu' Manetualain Atoran Na, au dadi sama leo' sira, fo apipipi-alala'o oo si leo Manetualain reu. (Au ta apo'i Manetualain Atoran fo Ana naondan tuka ba'i Musa, tehuu besa' ia au asoda pake Kristus Atoran Na.)^f 22 Soa-neu' lahenda fo dale na ta tea-mepe', au tao ao ka sama leo' au dale ka ta tea-mepe', ela au bisa lele'o si leo Manetualain mai. Soa-neu' basa lahenda, au tao ao ka sama leo' sira, ela tulu-fali lahenda ruma fo bisa hapu soda'. 23 Au tao katema' hihii-nanau' ia ra, ela basa lahenda ra bisa ramahere Ramatua' a Tutui Malole Na. No ria naa, ami hapu babati' nai basa hihii-nanau' malole fo ri' Manetualain nahii' feen neu' ami.

24 Au fee dedea nasasama' neme napo'i lalai' a. Lahenda dodou' rapo'i lalai', tehuu noi lahenda esa a hapu juara. De o muste malai ina' a fo hapu juara soa-neu' Manetualain. 25 Basa lahenda fo tuka napo'i lalai', ara muste ranenete ma tao tuka rahere noi hata fo ri' mana manori a nafada. Ara roi-tao sota mela-maku leo' naa, tehuu hapu noi silaka juara manasapu-manalalo'. Tehuu soa-neu' ita, toi-tao fo hapu seseba-babae' mana basa taa'. 26 De au ta alai afarara'u. Tehuu au alai roos losa too a. Kalu nararaa' ana no mana mapoko' a, sona au ta poko sala, tehuu au poko la'e. 27 Tebe-tebe au tuka ahere, ma anori tetea' ela au bisa anenete. Huu fo kalu au tui-beka fee lahenda la'e-neu' Manetualain, sekonaa te au alena laka atoran, sona ta malole a, boe ma Manetualain kalua heni au eme napo'i lalai' a mai.