La'e-neu' nanaa' sosoko-tataku'
(Tui Selu' La'e-neu' Eno Soda' 4:35,39; 6:4)
8
Besa' ia, au dedea la'e-neu' paa' fo lahenda soko reni' a. Ita basa bubulu' dodou', la'e-neu' hihii-nanau' ia ra. Huu fo kalu lahenda bubulu' dodou', sona ana bisa koao, nana huu ana afi nae ria malela' lena lahenda feke' ara. Malole lena', ita tasue-talaiao too lahenda feke'. Huu fo ria ri' tao na basa lahenda ra bisa ranenete rala' doo' a.2 Kalu lahenda nae ana nalela' basa-basan, sona natudu nae, ria rolu-lelan bei ta namadai. 3 Tehuu kalu lahenda sue Manetualain, sona Manetualain nalela' ana, ria ri' penting.
4 De kalu lahenda naa paa' fo parnaa soko reni' ana, ita basa bubulu' tae, hata fo lahenda soko ni nai dae-bafo' ia, ria ta Manetualain matetu' a. Huu fo ita bubulu' tae, “Manetualain noi esa' a” ma, “hata sosoko' fo lahenda do'o-taben, sosoa-raraa' ta'a.” 5 Hata dodou' rai lalai ma dae-ina' a, fo lahenda rae, ‘ramatua'’ do ‘malaka’.
6 Tehuu soa-neu' ita, Manetualain noi esa' a.
Ria nana, ita Aman.
Basa-basan raoka-rasamu rai Ria.
Ita toi-tao basa-basan soa-neu' Ana.
Ma ita Ramatuan, noi esa' a.
Ri', Yesus Kristus.
Manetualain pake Yesus,
tepo' fo Ana adu-tao basa-basan.
Ma ita tasoda,
nana huu Yesus ri' fee ita soda'.
7 Tehuu lahenda ruma ta bubulu' hihii-nanau' sira. Ara bei dodoo-tatai raroo la'e-neu' hata fo ara soko a, sama leo' maulu na parnaa sira dodoo-tatai. Huu ria naa, fai bea ma ara raa paa' fo parnaa lahenda soko reni', ara afi rae, “Nanaa' ia dadi tutunu-hohotu' fo soko reni'! Kalu au ua hata ia, au bei nanaheke' oo hihii-nanau' tadalu' ara!” De ria tao nalutu sira dudu'a-aafin, losa' ara ta afi roo-tetu', nana huu sira dale nara ta tea-mepe'. 8 Ria tute na huu ubea'? Nanaa-nininu' ta bisa noo ita leo Manetualain teu, hete? Kalu ta taa nanaa' sosoko, sona ita ta tamba tadalu'. Ma kalu taa, ta tao na ita dadi lahenda malole, hete?a
9 Tehuu besa-besa! Leo mae o manuu haak tao hihii-nanau' esa, bei ta tantu hihii-nanau' ria dadi malole soa-neu' o. Uni' ko leo toranoo lahenda kamahere' esa dale na ta tea-mepe', kalu ana nita o tao hihii-nanau' ria, boe ma ana natundu, sona ria ta malole a! 10 O bubulu' hihii-nanau' ria mana dadi taa'. Tehuu kalu toranoo lahenda kamahere' fo dale na ta tea-mepe', nita o matuu' mua-minu nai uma sosoko', neu' ko ana afi ubea'? Tantu ana afi nae hata sosoko' a boe ta neni sala' soa-neu' ana, leo mae ara soko reni'. 11 O bubulu' hihii-nanau' dodou' so. Tehuu kalu o tao leo naa', sona o tao malutu lahenda fo dale na ta tea-mepe'. Ma lahenda ria nana o toranoom lahenda kamahere'. Kristus mate soa-neu' ria boe! 12 Malole lena' afi leo ia': kalu o tao ma toranoom fo dale nara ta tea-mepe' a, tao hihii-nanau' fo ri' ara rae sala, o tao sala' fee si. Ma o boe masala neu' Kristus. 13 De kalu au ua hata fo tao na au toranoo ki lahenda kamahere' a tuda nala sala' dale', malole lena' au boso' ua paa' rupa leo naa'. Leo mae losa doo na neu boe boso'. Huu fo au ta nau sira tuda rala sala' dale'.