Saoina-saotou' ara
7
Besa' ia au nau dui' la'e-neu' basa hihii-nanau' fo emi matane nai emi susura ma dale' nae, “Leo' bea? Malole lena' tou' ara boso' sao do?”2 Leo ia': huu no lahenda bisa hapu lela' dodou' fo tuda rala hohoke a dale', de malole lena' tou' ara esa' ko no' saon. Leo' naa boe soa-neu' ina' ara esa' ko no' saon.
3 Tou' ara! Boso' tipa sao ma haak na fo suku mo' ana. Ma sao ina' ara! Boso' tipa sao ma haak na fo suku mo' ana. 4 Huu fo sao ina' a fee ao-paa na dadi neu' sao na nuun. Ma sao tou' a fee ria ao-paa na dadi neu' sao na nuun. 5 De emi boso esa tipa esa, huu fo emi dua manuu haak! Tehuu kalu emi nau hule-haradoi, sona boso' afi hihii-nanau' feke' ara fo nau suku mabua, malole lena' manenete bai' dei. Sadi sao ina' ma sao tou' dedea-rao' matalolole leo naa'. Ma kalu hule-haradoi basa, sona malole lena' dua si ralale suku rabua leo. Ta'a sona masalae' a! Huu fo nitu ra malaka na muda laesa' duduku-papau' lahenda fo ta nanenete nala. 6 Ia nana ta Manetualain atoran Na, tehuu au dudu'a-aafi mesa ka. 7 Tuka au aafi ka, malole lena' lahenda boso' sao, sama leo' au. Tehuu Manetualain fee lahenda ra esa-esa' ko babati-papala' natetu-naraa noon. Ana fee lahenda ruma sao ma ruma ta sao.
8 Au nau afada tou' do ina' mana sao taa' ara, ma ina-falu ra ae, malole lena' kalu emi ta sao, sama leo' au. 9 Tehuu kalu ta bisa ranenete, sona malole a ara sao. Malole lena' lahenda sao, kalu ta'a sona hihii-nanau ao-paa na bisa tao nalutu ni.
10 Ia nana ta noi neme' au mai. Au nau afada hata fo ita Ramatua na pareta lahenda manuu sao' ara nae, sao ina' a ta bole namaetu' no sao na. 11 Kalu ana foa ela sao na, sona ana boso' sao selu'. Tehuu kalu ana nau sao selu', sona natafali neu sao selu' sao na. Leo' naa boe, sao tou' a ta bole namaetu' no sao na.a
12 Ia neme au mai, ta neme ita Ramatua na mai. Ma soa-neu' lahenda feke' ara, au nau dedea leo ia': kalu lahenda sarani' fo sao ina na ta namahere Kristus, ma kalu sao ina na bei sadia nasoda sama-sama no ni, sona boso' namaetu' no ina' ria. 13 Leo' naa boe, kalu sao ina' fo sao na ta namahere Kristus, ma kalu sao na nau nasoda sama-sama no ni, sona ana boso' namaetu' no tou' ria. 14 Huu fo sao tou' fo ta namahere Manetualain, ana dadi lalao-lalafu', nana huu nabua-naesa no sao na. Ma sao ina' fo ta namahere Manetualain, ana dadi lalao-lalafu', nana huu nabua-naesa no sao na. Kalu ta'a, sona sira ana nara ta lalao-lalafu'. Tehuu no eno' ia, ara hapu e'e-dedede' lalao-lalafu' nai Manetualain matan. 15 Tehuu kalu lahenda fo ta ramahere Manetualain, la'o ela ria sao inan do sao toun lahenda kamahere', sona pesin neme' naa. Sao ina' do sao tou' kamahere' ara ta rabua-raesa leo naa' so'. Huu fo Manetualain naloo emi dadi Ria lahendan, ela emi bisa masoda tetu-tema' ma mole-dame. 16 Sao ina kamahere' emin! Emi bisa fee sao mara soda'. Bate ta'a. Ma sao tou kamahere' emin! Emi bisa fee sao mara soda'. Bate ta leo naa' boe'. Emi ta bubulu' matetu'.
Emi natuu-napadeim leo bea', sona leo naa' leo, sadi emi dale' esa mo Manetualain
17 Leo mae leo' naa, tehuu tepo' fo Manetualain naloo emi dadi Ria lahendan, sona lahenda ra esa-esa' ko natuu-napadein leo bea', sona nasoda naroo leo naa' leo. Boso' naralin bali, huu fo Manetualain ator leo naa'. Au anori-afada atoran ia nai basa jama'at ara.
18 Dedea nasasama' leo-leo', emi parnaa sunat fo natudu nae, emi lahenda Yahudi, nai fai mabui' a besa' ko mamanene Manetualain naloo emi, sona boso' malena sunat ria. Ma lahenda fo ta sunat, ramanene Manetualain naloo si dadi Ria nuu-enan, sona boso' boe sunat dadi tanda nae, sira dadi Manetualain lahendan. 19 Kalu sunat, ta nanuu sosoa-raraa'. Ma kalu ta sunat, ria boe ta nanuu sosoa-raraa'. Nanuu sosoa-raraa', nana ri': ita tao tuka Manetualain pareta Nara. 20 Tepo' fo Manetualain teka-here emi dadi Ria lahendan, Ana ta nadenu emi sunat do ta'a . De neme' naa, ela emi leo naa' mahere leo. Ta parluu marali so'.
21 Au afada dedea nasasama' esa bali. Kalu fai fo Manetualain naloo o, sekonaa te o bei dadi lahenda atan, sona dadi leo naa' leo! Tehuu uni' ko leo tepo ria o ta ata fa, sona dadi leo naa' leo. Nana huu o ata do ta ata, ta hata-hata fa! 22 Tepo' fo Manetualain naloo ata esa dadi Ria lahendan, ata ria dadi sama leo' lahenda po'ilota' fo noi-tao soa-neu' ria Ramatua na nai lain. Ma tepo' fo Manetualain naloo lahenda po'ilota' esa dadi Ria lahendan, besa' ia lahenda ria dadi Kristus atan. 23 Kristus tifa etu emi neni' beli mabera! De emi boso' dadi ata fee lahenda feke'.
24 Toranoo susue kara emin! Tepo' fo Manetualain naloo emi dadi Ria lahendan, emi natuu-napadeim leo bea', sona leo naa' leo. Boso' maralin bali. Neme' naa, sadi emi dale' esa mo Manetualain.
La'e-neu' lahenda mana sao taa' ara
25 Emi matane au la'e-neu' mana sao taa' ara. Ramatua' a ta nafada au la'e-neu' hihii-nanau' ia. Tehuu emi bisa mamahere hata fo ri' au dedea ni, nana huu Ramatua' a natudu dale malole Na neu' au. Au aafi ka leo ia': 26 Besa' ia ita hapu doidoso rupa'. De kalu lahenda a leo bea', sona ela ana leo naa' leo. Au maksud ka leo ia': 27 Kalu o mabua-maesa mo sao ina ma, sona boso' mamaetu' mo ni. Kalu o ta mabua-maesa mo sao ina ma, boso' saka eno' fo sao selu'. 28 Tehuu uni' ko leo o sao, o ta sala fa. Ma kalu ana feto mana sao taa' esa sao, ria ta sala. Tehuu mafarerene' te lahenda mana sao' ara, neu' ko hapu susa rupa' nai dae-bafo' ia. Au maksud ka ela emi boso' susa leo naa'.
29 Toranoo susue kara! Tuka au aafi ka, leo ia': ledo-fai boe-boe eetu, ma dae-bafo' a nonoe na nanenea' so. De lahenda fo nanuu sao ina', boso' tao dale' noi neu' sao ina na, tehuu ana muste tao dale' neu' Ramatua' a boe. 30 Leo' naa boe, kalu bea dola, malole lena' natetea dale na fo boso' dola, ela ana bisa tao dale' neu' Ramatua' a. Kalu bea namaho'o-natadale, malole lena' boso' tao aon leo naa', ela ana bisa tao dale' neu' Ramatua' a. Kalu bea ue-asa, malole lena' ana nasoda sama leo' ta nanuu hata esa boe', ela ana bisa tao dale' neu' Ramatua' a. 31 Kalu bea pake hata-heto dae-bafo' a, malole lena' ana tao aon sama leo' ta tiadea-radaara neu' hata-heto dae-bafo' a, ela ana bisa tao dale' neu' Ramatua' a. Huu fo neu' ko dae-bafo' a eno soda na sapu-lalo.
32 Au nau emi dale mara boso' doda'. Neu' lahenda mana sao' taa' a, ledo-fain bei dodou' de ana bisa tao dale' neu' Ramatua' a hihii-nanaun. Huu ria naa, ana bisa saka eno' fo noi-tao malole, ela tao namaho'o Ramatua' a dale Na. 33-34 Tehuu lahenda mana sao' a, boe muste tao dale' neu' dae-bafo' ia hihii-nanaun. Ana tao dale' neu' Ramatua' a hihii-nanaun, ma ana muste saka eno' fo tao namaho'o sao ina na. Ria ri' tao na dudu'a-aafin nabati' ii-ona'.
Leo' naa boe, ina-falu ra, ma ina' mana sao' taa' ara. Ara tao dale' neu' Ramatua' a hihii-nanaun, ela sira dalen, ma ao-ina nara bisa lalao-lalafu'. Tehuu ina' mana sao' a, ria dale na nabati' ii-ona'. Huu fo ana tao dale' neu' Ramatua' a hihii-nanaun, tehuu ria boe muste saka eno' ela tao namaho'o sao tou na. 35 Au afada emi hihii-nanau' ia ra, ela emi hapu malole na. Au ta nau emi hapu eena-natabaa'. Au ahii' emi tao roo-tetu', ma tao dale' neu' Ramatua' a hihii-nanaun, ela emi dudu'a-aafim ta nabika-nabati'.
36 Kalu tou' a nahii' sao ana feto' fo teu-fain naraa, sona ela ara sao. Lena-lena' kalu tou' ria ta nanenete. Ara tao leo naa', ta sala fa. Boso losa ara ela-dei' raroo, boe ma neu' mate'e na tou' ria tao hihii-nanau' ta malole ra. 37 Tehuu kalu ana nanenete nabe'i, sona ana boso' nalale fo sao. Huu fo ria bubulu' hata fo ri' ria naetu', de ana nanenete nala' doo' a boe malole. 38 De tou' a sao na ina' fo ri' nahii' ana, malole a. Ma ta sao fa, ria malole lena bali.
La'e-neu' ina-falu ra