Kristus lahenda nadedenun fo ri' Ana nadenu si leo basa mamana' ain reu
4
De emi muste tao ami leo ia': boso' io ami, huu fo ami nana noi Kristus atan. Ma Manetualain namahere ami de manea matalolole Ria hihii-nanaun fo ri' bei nino. 2 Lahenda bea nanea ria malaka na hata-heton, ana muste dadi lahenda fo ri' tao tuka matetu na. 3 Au leo bea' bali? Au oi-tao tuka matetu na do, ta'a? Au ta tao dale' ae emi uku-sudi au leo bea'. Au boe ta tao dale' ae lahenda feke' a uku-sudi au leo bea'. Ma au boe ta uku-sudi ao-ina ka leo bea'. 4 Huu fo leo mae au dale ka ae au malole a, bei ta tantu au malole. Penting na Manetualain ri' uku-sudi au leo' bea. 5 De emi boso' tao ao mara dadi' mana ee dedea', fo uku-sudi lahenda feke' ara. Mahani Ramatua' a natafali mai. Huu fo Ria neu' ko soi basa hihii-nanau' reu' loan. Ria ri' neu' ko kalua basa hihii-nanau' tadalu' fo ri' lahenda rafunis rai maiu'. Ana natudu basa hihii-nanau' fo lahenda du'a-afin nai dale nara. Manetualain nau nafada basa hihii-nanau' malole fo ri' lahenda ra tao.6 Toranoo kara emin! Au dedea la'e-neu' au oo a'a Apolos, sama leo' au fee conto ela emi bisa manori hihii-nanau' esa neme ami mai, leo ia': Tao tuka noi basa hihii-nanau' fo mana dui' rai Susura Makamoi' a dale'. Boso' tao tuka feke' a bali. Kalu emi manori hihii-nanau' ria, boso' moo' noi seri, ma dedea bau-ina' nana huu tuka lahenda esa, ma ta hika-hada' lahenda feke'. 7 De leo' bea? Emi io ao mara lena lahenda feke', do? Boso'! Huu fo emi sipo basa-basan, nana hapu neme Manetualain mai. Kalu leo' naa, sona ubea' taon de emi koao, sama leo' emi ri' tuka-saka ao mara? 8 Sama na leo' emi hapu-dai ma basa-basan fo ri' emi parluu. Leo-leo' emi mamasu'i! Emi tao ao mara dadi' lahenda bau-ina', sama leo' mane', ma ami ta loloo' lima mara neu bai' boe'. Sekonaa te, Manetualain fee basa-basan fo ri' emi parluu. Tehuu kalu tebe emi dadi mane', bate ami bisa homu pareta sama-sama mo emi, hete?
9 Manetualain nadenu ami leo basa mamana' nai dae-bafo' ia, ela tui-beka fee lahenda la'e-neu' Kristus. Tehuu tuka au hahapu ka, sona nonoo' nae Manetualain tao na ami dadi lahenda mabui', sama leo' lahenda mana huku' fo roi rahani' huhuku mamates. Boe ma Ana fee basa lahenda nai dae-bafo' a, ro Ria eila'o-limalopen rai nusatetu-ikutema' a, ranilu ami. 10 Emi kahere' maan seli! Huu fo lahenda tao emi neu' manuu rolu-malela', nana huu emi mabua-maesa mo Kristus. Tehuu ara tao ami neu' koa-pakanaa', sekonaa te ami boe dadi Kristus lahendan. Ara rae emi bara'ai mara seli. Tehuu ami kalana'u. Ara io emi, tehuu ara ta hada' ami bai' boe'. 11 Losa' besa' ia, ami mamalaa, ma maamada-metihedu. Ami matasida-matasai'. Lahenda fepa-li'u ami. Ami sama leo' lahenda maleu-malaa' uma-loo ta'a. 12 Ami moi-tao sota maan seli. Kalu lahenda dedea rupa' la'e-neu' ami, ami balas mae, “Ami hule fo Manetualain tao basa hihii-nanau' malole soa-neu' emi.” Kalu lahenda tao rasususa' ami, ami manenete.a 13 Kalu lahenda dedea ramumulu-ramamae' ami, ami balas meni' dedea balaroe-balanau'. Leo mae leo' naa, tehuu lahenda bei tao ami neu' kasee', do kadafu' de naraa tu'u-tapa henin.b
14 Au dui' hihii-nanau' ia ra, ta huu amamae' emi. Tehuu au nau asa'ai emi, nana huu au sue-lai emi sama leo' ana boki kara. Huu ria naa, au afada emi matafali mai tuka eno roo-tetu'. 15 Leo mae lahenda rifu-natun bisa ratudu emi eno' la'e-neu' Kristus, tehuu noi au ri' dadi uu' emi papa ma. Au ri' lahenda masososa' fo tui-beka fee emi la'e-neu' Yesus Kristus Tutui Malole Na. Huu ria naa, emi mamahere Ni. Au tao leo naa', nana huu au abua-aesa atalolole oo Ni. 16 De au hule fo emi tuka matalolole au leleo-lala'o ka.c
17 Huu ria naa, au fee Timotius neti ela tulu-fali emi. Au sue-lai ni sama leo' au ana boki ka. Au amahere ni, huu fo ria boe nabua-naesa no ita Ramatua na. Neu' ko ana tulu-fali emi ela nafarerene' fee emi au eno masoda ka. Au soda ka leo naa', nana huu au abua-aesa oo Yesus Kristus, fo ri' Manetualain feen mai. Ma ria boe sama leo' au anori-afada lahenda sarani' fo ri' rabua rai basa mamana' ain.
18 Neme emi ruma mai afi rae, au ta dadi leo naa' uu so'. Huu ria naa, ara koao. 19 Tehuu kalu ita Ramatua na nau, sona ta doo' a so', te au leo kota Korintus uu. Boe ma neu' ko au bubulu' mema' lahenda ia ra noi bafa koao nara do, sadi' ko ranuu kuasa tetea'! 20 Huu fo Manetualain nana, Mane' mana kuasa. De Ria lahenda nara ta lalame maa nara fo rafofoa lahenda namaheren, tehuu ara pake kuasa matetu'. 21 Emi hihii ma leo bea'? Kalu au mai, sona au dedea no hara bera' ma fee emi huhuku'? Do au mai atudu susue-lalai' ma dale balaroe-balanau'?