Ita lahenda kamahere' a muste toi-tao dale' esa soa-neu' Manetualain, ma boso' tareresi' ii-ona'
3
Toranoo susue kara emin! Tepo' fo au nai naa, emi sama leo' lahenda fo bei ta nabua-naesa natalolole no Manetualain Dula-dale Na. Nana huu emi tuka noi hihii-nanau mesa mara, sama leo' lahenda dae-bafo' biasa. Huu ria naa, au ta bisa dedea oo emi, sama leo' lahenda lasi', huu fo emi leo' ana aana'. 2 Au muste anori-afada emi la'e-neu' hihii-nanau' kafa', huu fo emi bei ta sadia sipo' hihii-nanau' bera', sama leo' ana aana' a bei ta bisa naa nanaa mepe'. Sekonaa te, emi muste dadi bara'ai', sama leo' lahenda bau-ina' fo biasa naa paa'. Tehuu besa' ia emi bei sama leo' ana boki beu' de ninu noi sosoe'.a 3 Huu fo emi bei du'a-afi sama leo' lahenda fo tuka noi sira hihii-nanau mesan. Kalu lahenda bea lena neme emi mai, sona emi mamanasa', ma mareresi' ii-ona'! Huu ria naa, au ae emi tuka noi hihii-nanau mesa mara. No ria na, emi sama leo' lahenda dae-bafo' biasa nai dae-bafo' ia. 4 Huu fo emi ruma mae, “Ami nana Paulus lahendan!” Ma ruma mae, “Ami nana Apolos lahendan!” Kalu emi dedea leo naa', sona matudu mae emi sama leo' lahenda dae-bafo' fo ta malela' Kristus.bEmi sama leo' oka-tine esa
5 Sekonaa te, Apolos nana, bea? Paulus nana, bea? Huu fo ami dua nana, noi ata. Ami ri' matudu eno' fo emi bisa mamahere Kristus. Apolos nalala'o nonoi-laka' tuka Ramatua' a pareta Na. Ma au boe leo naa'! 6 Au afada masososa emi la'e-neu' Kristus. Ria sama leo' au sele-tande bini-kee. Boe ma Apolos mai nanori-nafada emi. Ria sama leo' ria ri' tetee-totoli bini-kee fo au sele a. Tehuu Manetualain namomori-nadadadi' bini-kee ria de nambau-ina.c
7 De neu' lahenda manasele-manakari ma manatetee-manatotoli bini-kee, sosoa-raraa taa'. Noi Manetualain ri' penting. Huu fo Ria ri' namomori-nadadadi' bini-kee ria. 8 Lahenda manasele-manakari, ma lahenda manatetee-manatotoli ra roi-tao reu' esa. Ma basa lahenda fo ralala'o Manetualain nonoi-tataon, neu' ko Ana balas sira sosotan. 9a Huu fo ami sama-sama dadi Manetualain lahenda mana noin. Ma emi dadi sama leo' Manetualain oka-tinen fo ri' Ana nau noin.
Emi sama leo' uma esa
9b Leo' naa boe, emi sama leo' uma fo ri' Manetualain nafoan. 10 Manetualain natudu dale malole Na neu' au. Huu ria naa, au sama leo' malaka tukan. Manetualain tulu-fali au de neme masososa na mai, au anori-afada emi basa hihii-nanau' dasar, fo afoa fanderen tea-mepe' nai emi masoda ma. Ma lahenda feke' boe ranori-rafada emi, ela rafoa neu' fanderen fo ri' au tao. Tehuu tukan ara sira esa-esa muste tao ratalolole fo rafoa no matetu'. 11 Fanderen tea-mepe' a nana ri' Yesus Kristus. De lahenda ta bisa nafoa fanderen feke' nai emi dale mara, huu fo Manetualain peda-fua fanderen matetu' a.
12 Tantu lahenda nau nafoa neu' fanderen ria pake hata rupa' ara. Ruma pake hata mabeli, leo-leo' lilo pilas, lilo fula', do batu makadila'. Ruma pake hata biasa, leo-leo' ai-batu, nau, do fii. 13 Tehuu tukan ara nonoi-tataon neu' ko nananita', ma basa lahenda ra bubulu' ria nonoi-tataon malole, do ta'a. Huu fo neu' ko dae-bafo' a nonoen, Manetualain uji ni, sama leo' Ana pake ai-pila' fo natudu fee lahenda ra esa-esa' ko nonoi-tataon tea-mepe', do ta'a. 14 Kalu uji lahenda esa nonoi-tataon pake ai-pila', ma hata fo ana pake ni a bei tea-mepe', neu' ko Manetualain feen seseba-babae' nai nusatetu-ikutema'. 15 Tehuu kalu uji lahenda nonoi-tataon pake ai-pila', ma hata fo ri' ana paken nafoa neu' fanderen ria lain a, ai-pila' a naa henis, sona Manetualain ta fee lahenda ria seseba-babae' hata esa boe'. Tukan ria bei hapu popo'i-tatata', tehuu ria sama leo' lahenda nalai kalua neme uma fo ai-pila' a naa henin, ma kura bai' maten.
Emi sama leo' Manetualain uma mamason esa
16 Emi muste bubulu', emi sama leo' Manetualain uma mamason esa, ma Ria Dula-dale Na leo-naparasa nai dale'.d 17 Ma kalu lahenda tao nalutu Manetualain uma mamason, fo ri' Ria mamana leleo-naparasan, sona besa-besa! Neu' ko Manetualain tao nalulutu' ana boe! Huu fo Manetualain uma mamaso Na lalao-lalafu', de emi boe muste lalao-lalafu'.
18 Emi boso' edi-fule selu' ao-ina mara! Kalu o tao aom malela', ma bubulu' basa-basan tuka lahenda dae-bafo' besa' ia rolu-malelan, sona tea na nana ri' o ta bubulu' hata-hata esa boe'. Kalu mameda maan o ta bubulu' hata-hata esa boe', besa' ko o bisa mulai manori. 19 Dudu'a-aafi tande' lahenda dae-bafo besa' ia a, Manetualain tao si reu' pakanaa'. Sama leo' mana dui' nai Susura Makamoi' a nae:
“Lahenda nae ria dudu'a-aafin tande',
tehuu neu' ko Manetualain pake selu' sira dudu'a-aafi tadalun,
fo hiki natafali' asa ela tao nalulutu' si!”e
20 Nai babati feke' mana dui' nae,
“Ita Ramatua na bubulu' hata fo lahenda dudu'a-aafi tande' ara dodoo-tatain,
ma lahenda fo muste bubulu' nau tao leo bea',
Ana bubulu' ara afi noi hihii-nanau' mana dadi taa'.”f
21-22 De emi boso' io lahenda esa mae, ria kahere'. Huu fo Manetualain ri' so'u lahenda fo nauli-nalaka emi. Basa-basan dadi emi nuu-enam. De emi mauli-malaka mara, leo-leo'; au, a'a Apolos, ma a'a Petrus,g ami basa dadi emi nuu-enam. Ma basa hihii-nanau' nai dae-bafo' ia, dadi emi nuu-enam, leo mae emi mate do masoda, leo mae besa' ia do ledo-fai bea, basa-basan dadi emi nuu-enam. 23 Ma emi dadi Kristus nuu-enan. Ma Kristus dadi Manetualain nuu-enan.