Ita muste tafada leleka' basa lahenda, la'e-neu' Ramatua Yesus mamate Na nai ai kake'
2
Toranoo susue kara emin! Maulu na au leo emi mai, au afada emi Manetualain ninon fo ri' lahenda dae-bafo' a ta bubulu'. Tehuu au ta uni dedea-nafada' ria fo dedea koao'. Ma au boe ta pake dedea-nafada madema fo atudu au malela ka. 2 Tepo' fo au sama-sama oo emi, au afi ae leo ia': au nau atudu noi hihii-nanau' esa, ri' Yesus Kristus. Ria ri', Lahenda fo neme ulu' mai Manetualain helu mema' nau feen mai. Tehuu tepo' fo Yesus mai, lahenda ra paku raisa Ni nai ai kake'. Au alela' matetu' noi hihii-nanau' ria.3 Fai fo au sama-sama oo emi a, au ameda aan ta abe'i ma bii-amata'u.a 4 Au dedea-afada ma tui-beka, pake dedea bale fai'. Au ta pake dedea madema fo arorolu emi. Ta'a! Tehuu fai fo au dedea leo' naa, lahenda ra bubulu' Manetualain Dula-dale Malalao-malalafu Na ri' ator au, ma Ria kuasa Na nai au. 5 Au afi ae, kalu emi mamahere Manetualain, nana huu emi mamanene lahenda dae-bafo' a dudu'a-aafi tanden, sona ta malole. Malole lena' emi mamahere Manetualain, nana huu Ana natudu kuasa Na neu' emi.
Manetualain nanori-nafada ita la'e-neu' dudu'a-aafi tande roo-tetu'
6 Sekonaa te, fai fo ami dedea mo lahenda fo ri' ramahere tetea' a, ami manori-mafada pake dudu'a-aafi tande'. Tehuu ta tuka lahenda dae-bafo' a dudu'a-aafi tanden, do tuka hata fo besa' ia mana pareta rahii' ranori-rafada ni a, te neu' ko basa-basan sapu-lalo. 7 Tehuu ami manori-mafada noi dudu'a-aafi tande' fo ri' Manetualain naondan mai. Nai fai a ulu na, Manetualain nafuni hihii-nanau' ia ra. Tehuu besa' ia, Ana naetu' fo soi hata nino ria reu' loan soa-neu' ita, ela lahenda rita Manetualain rela-sa'an fo ri' nananita nai ita dale'. 8 Tehuu lahenda fo besa' ia homu pareta, ara ta bubulu' matetu' Manetualain dudu'a-aafi tande Na. Huu fo kalu ara bubulu', sona sira ta bisa paku raisa ita Ramatuan marela-masa'a nai ai kake'.
9 Nai Susura Makamoi' a mana dui' la'e-neu' Manetualain ninon, fo ri' bei nafuni' nai fai a ulu na nae,
“Hihii-nanau' fo lahenda dae-bafo' a bei ta parnaa ritan,
ma hihii-nanau' fo lahenda dae-bafo' a bei ta parnaa ramanenen,
ma lahenda dae-bafo' a ta bisa dodoo-tatai ralan.
Sekonaa te, Manetualain sadia mema' basa hihii-nanau' sira,
soa-neu' lahenda fo sue-lai Ni.”b
10 Tebe fai a ulu na, lahenda ta bubulu' hihii-nanau' sira, tehuu besa' ia Manetualain pake Ria Dula-dale Malalao-malalafu Na, fo soi hihii-nanau' sira reu' loa na soa-neu' ita.
Manetualain Dula-dale Na, bubulu' basa hihii-nanau' ara. Huu fo Ria boe parisa' Manetualain dale Na losa Ria bubulu' basan. 11 Ita esa' ko nanuu' dula-dale hehelin nai ita dalen. Huu ria naa, ita lahenda dae-bafo' a afi ma tao hihii-nanau' fo ta sama. Ma ta hapu lahenda feke' bubulu' matetu' ita dalen, noi ita dula-dale na. Leo' naa boe soa-neu' Manetualain. Ta hapu lahenda esa bubulu' Manetualain dale Na boe'. Noi Ria Dula-dale Na ri' bubulu' matetu'.
12 Ita sipo ta Manetualain Dula-dale Na, ma Ria ri' ator ita. Huu ria naa, ita ta tuka lahenda nai dae-bafo' ia dudu'a-aafin. Huu fo Manetualain Dula-dale Na nai ita dalen, de ita bisa talela' basa hihii-nanau' malole fo Ana taon soa-neu' ita.
13 Hihii-nanau' sira si' biasa ita dedean. Ami mafada basa hihii-nanau' fo Manetualain Dula-dale Na nanori-nafadan neu' ami. Ami ta manori-mafada pake rolu-malela' tuka lahenda dae-bafo' a dudu'a-aafin. Tehuu soa-neu' lahenda fo ralela' Manetualain, ami manori-mafada si pake dedea laka' neme Ria Dula-dale Na mai. 14 Neu' lahenda fo ta ralela' Manetualain Dula-dale Na, ramanene ami dedea-nafadam, tantu ara ta sipo'. Ara afi rae, “Ubea' ria? Ta raa dale'!” Lahenda ria ta bubulu' hihii-nanau' sira, nana huu ana ta nabua-naesa no Manetualain Dula-dale Na. 15 Lahenda fo nabua-naesa no Manetualain Dula-dale Na, sona besa' ko ana bisa bubulu' basa hihii-nanau' sira, ma bisa bubulu' roo-tetu' a ri' ubea'. Tehuu lahenda kamahere taa' ara, ta bisa bubulu' ma uku-sudi rala lahenda kamahere ara nonoi-tataon. 16 Ta bisa fa! Huu fo mana dui' nai Susura Makamoi' a nae,
“Bea ri' bisa bubulu' Manetualain dudu'a-aafin?
Do bea ri' bisa ator Manetualain,
fo Ana tao tuka lahenda ria pareta na?
Ta hapu lahenda esa boe'!”c
Sekonaa te ita bisa bubulu' hihii-nanau' sira, nana huu Kristus tulu-fali ita, fo bisa dodoo-tatai tuka Ria dudu'a-aafin.