Paulus haitua haraoe soda-mole' fee toranoo' fo rai Roma
16
Au nau fee emi malela' ita susin Febe tuka susura' ia, ma hule emi sipo' ana. Ria ri' ara so'u ni dadi mauli-malaka jama'at nai kota Kengkrea. 2 Au hule emi mapela lima mara ela sipo' ana no malole, sama leo' naraa fee lahenda sarani' ara, nana huu ria nabua-naesa no ita Ramatua na. Ana parluu ubea', sona tulu-fali ni. Huu fo neme ulu' mai, ria ri' tulu-fali au o lahenda dodou'.3 Au haitua haraoe soda-mole balaroe-balanau' fee susi Priskilaa ma saon a'a Akila. Ami sama-sama malala'o Yesus Kristus nonoi-tatao kadodou Na.b 4 Dua si hisadei na mate, nana huu ara nau tulu-fali ra au eme soe a mai. Tehuu ta noi au mesa' ka hule makasi neu' asa. Lahenda fo ta Yahudi dadi lahenda sarani' neme basa jama'at nai basa mamana' ain, hule makasi nana huu sira nonoi-tatao malolen.
5 Au haitua haraoe soda-mole' fee basa lahenda fo rabua de maso' rai Priskila no Akila uma na.
Au haitua haraoe soda-mole' fee au nonoo ki, a'a Epenetus. Ria nana lahenda masososa' fo ri' namahere Kristus nai propensi Asia.
6 Au haitua haraoe soda-mole' fee susi Mia. Ana noi-tao sota naan seli soa-neu' emi.
7 Au haitua haraoe soda-mole' fee a'a Andronikus no susi Yunia.c Sira nana, lahenda Yahudi sama leo' au. Ara ramahere Kristus, raulu' au. Maulu na, ara rai bui dale' sama-sama ro au. Sira boe dadi reu' Manetualain lahenda nadedenun, ma lahenda dodou' ralela' asa.
8 Au haitua haraoe soda-mole' fee a'a Ampliatus. Au sue-lai ni, nana huu ana nabua-naesa no ita Ramatua na.
9 Au haitua haraoe soda-mole' fee a'a Urbanus. Ria boe sama-sama no ami malala'o Kristus nonoi-tataon.
Au haitua haraoe soda-mole' fee a'a susue ki Stakis.
10 Au haitua haraoe soda-mole' fee a'a Apeles. Ana hapu sosoba', tehuu lui na aon. No ria naa, ita bubulu' ana namahere tebe-tebe Kristus.
Au haitua haraoe soda-mole' fee a'a Aristobulus kileo-boboki nara katema'.
11 Au haitua haraoe soda-mole' fee a'a Herodion. Ria lahenda Yahudi, sama leo' au.
Au haitua haraoe soda-mole' fee basa Narkisus kileo-bobokin fo ramahere Kristus.
12 Au haitua haraoe soda-mole' fee susi Trifena no susi Trifosa. Sira boe ralala'o ita Ramatua na nonoi-tataon.
Au haitua haraoe soda-mole' fee au tia ki, susi Persis. Huu fo ria noi-tao sota naan seli fee ita Ramatua na.
13 Au haitua haraoe soda-mole' fee a'a Rufus. Ita Ramatua na teka-here ni.
Au haitua haraoe soda-mole' fee mama na boe. Ria nana, sama leo' au mama boki ka.d
14 Au haitua haraoe soda-mole' fee a'a Asinkritus, a'a Flegon, a'a Hermes, a'a Patrobas, a'a Hermas ma basa toranoo' fo sama-sama ro si a.
15 Au haitua haraoe soda-mole' fee a'a Filologus, susi Yulia, a'a Olimpas, a'a Nereus no fadi inan ma basa lahenda sarani' fo sama-sama ro si a.
16 Kalu emi mabua, fo esa sipo' esa pake nade'i lalao-lalafu' naraa soa-neu' lahenda kamahere' ara. Kristus jama'at nara rai ia, haitua haraoe soda-mole balaroe-balanau' fee emi boe.e
Paulus fee si lelea-nonore'
17 Toranoo kara emin! Au hule emi fo besa-besa! Manea matalolole, huu fo lahenda tao ra emi tapasara, fo nau rahihii' ratuda emi. Hata fo ri' ara rafada emi, nana nasei' no hata fo ri' ami manori-mafadan neu' emi. De boso' matia' mo lahenda rupa leo naa' ara! 18 Ara ta roi-tao soa-neu' ita Ramatuan Yesus Kristus. Ara roi-tao fo noi sira mesa' asa si' hapu ria buna-boan. Sira lalame maa nara ro lahenda fo bei ta ralela' bea ri' malole, ma bea ri' tadalu'. Ara lalame maa nara fo tipu-dai lahenda.
19 Basa lahenda ra ramanene rae, emi tuka mahere Manetualain hihii-nanaun. Huu ria naa, au amaho'o-atadale nana huu emi. Au nau emi malela' la'e-neu' hihii-nanau' malole, ma boso' seseo-babali' moo hihii-nanau' tadalu' ara. 20 Manetualain, ri' bisa fee ita tasoda no tetu-tema', mole-dame ma tesatei-tamadale'. Ria ri' neu' ko nalulutu' nitu ra malaka bau-ina na kuasan, ma natudu nae, emi ri' maseki. Ria ta doo' a so'. Au hule-haradoi fo ita Ramatuan Yesus Kristus natudu dale malole Na neu' emi.
21 Fadi ki Timotius fo noi-tao sama-sama no au, ana haitua fee emi haraoe soda-mole'.
A'a Lukius, a'a Yason, ma a'a Sosipater boe haitua haraoe soda-mole'. Sira nana, lahenda Yahudi sama leo' au.f
22 (Au Tertius, ri' dui' susura' ia tuka hata fo a'a Paul nadenu au dui' a. Soda-mole' neme au, huu fo au boe ita Ramatua na lahendan.)
23 Au leo lalai nai a'a Gayus uma na. Basa lahenda sarani' fo rai ia, biasa rabua fo maso' rai uma na. Ria boe haitua haraoe soda-mole'.
A'a Erastus fo dadi mana homu doi' nai bendar a, ma ita toranoon Kuartus boe haitua haraoe soda-mole'.g
24 [Au hule fo ita Ramatuan Yesus Kristus natudu dale malole Na neu' emi basa.h
Noi ri naa' so!]
Manetualain, marela-masa'a!
25 Io-oa Manetualain! Ria ri' nanuu kuasa de tao na emi dadi tea-mepe'. Ria Tutui Malole Na nae leo naa', ma tepo' fo au tui-beka fee si la'e-neu' Yesus Kristus, au anori-afada lahenda leo naa' boe. Manetualain ri' nafada ita basa hihii-nanau' la'e-neu' Kristus, fo lahenda fai ulu' ara ta bubulu', nana huu bei nino. 26 Tehuu besa' ia, hihii-nanau' fo Manetualain mana nesi mata fai ulu nara dui' nai Susura Makamoi' a dale', nana makaledo' so. Manetualain masoda' a, ri' ator ela lahenda reme basa nusa' ara mai bisa ralela' hihii-nanau' fo fai a ulu na bei nafuni'. No ria naa, ara bisa ramahere Ni, ma tao tuka Ria hihii-nanaun. 27 Noi Ria ri', Manetualain. Noi Ria ri' bubulu' basa hihii-nanau'. Au io-oa Ni, nana huu Yesus Kristus nonoi-tataon! Tebe!
Au susura ka te'e ada' ia,
Soda-mole',
Paulus