Saka eno' tao matetea lahenda feke' ara namaheren
15
Ita fo ri' tamahere tetea', muste tulu-fali no dale loa' neu' lahenda fo bei ta namahere tetea', ela ara ranenete nai susa dale'. Kalu ita tao tamaho'o noi neu' ita ao-ina heheli' ara, sona ta malole. 2 Au maksud ka leo ia': ita esa-esa muste saka eno', tao malole soa-neu' ita toranoo lahenda sarani' ara, ela sira namahere na boe-boe natea. No ria naa, ara ramaho'o ro ita. 3 Yesus Kristus boe noi Ria nonoi-tataon, fo ta tao namaho'o noi Ria dale Na, tehuu Ana tao namaho'o Manetualain dale Na boe. Ria sama leo' mana dui' mema' nai Manetualain Susura Makamoin dale' la'e-neu' hata fo neu' ko dadi neu' Yesus nae,“Sira ramumulu-ramamae' O,
sona la'e Au ria boe.”a
4 Basa-basan fo fai a ulu na lahenda dui' ana nai Manetualain Susura Makamoin dale', dui' fo nanori-nafada ita. Ana natudu eno' ela tao na ita dadi tea-mepe', tanenete tahere, ma Ria Hara-dasin nafofoa ita. No ria naa, ita bisa tahani fo nau tita Manetualain natudu dale malole Na neu' ita.
5 Manetualain tao na lahenda bisa tea-mepe', de ara ta heo'. Ma Ana natetea ita dale na. Au hule-haradoi neu' Manetualain ela emi masoda dale' esa, tuka Yesus Kristus hihii-nanaun. 6 Kalu emi dale' esa leo' naa, emi bisa sama-sama io-oa Manetualain. Ria nana, ita Ramatuan Yesus Kristus Aman.
Manetualain Tutui Malolen soa-neu' lahenda Yahudi ma lahenda ta Yahudi
7 De emi muste esa sipo' esa, sama leo' Kristus sipo' emi. Kalu emi masoda leo naa', neu' ko lahenda ra radedema Manetualain nade Na.
8 Au afada leo ia': Kristus tao aon sama leo' ata, ela tao natetu basa hihii-nanau' fo ri' Manetualain helu mema' nau taon soa-neu' ita bei-ba'i nara. No eno' ria, Ana tulu-fali lahenda Yahudi fo ri' bubulu' rae, Manetualain dedea matetu'. 9 No ria naa, basa lahenda nusa feke' fo ta Yahudi io-oa Manetualain. Huu fo ara bubulu' Ana nanuu dale kasian soa-neu' ita basa. Sama leo' fai a ulu na mane' Daud dui' nai Susura Makamoi' a dale' nae,
“Huu ria naa, au adedema Papa nade Ma,
soa-neu' lahenda nusa feke' ara.
Au soda sosoda i'io-o'oa la'e-neu' Papa
nai lahenda nusa feke' ara matan.”b
10 Babati-lalane feke' nai Susura Makamoi' a mana dui' nae,
“Emi lahenda dea meme basa mamana feke' ara.
Mamaho'o-matadale,
sama-sama mo Ramatua' a lahenda nara.”c
11 Babati-lalane feke' nai Susura Makamoi' a, Daud dui' nae,
“Emi fo ri' meme lahenda nusa feke ara,
meu tui-beka fee basa lahenda la'e-neu' Ramatua' a marela-masa'an,
ela sira boe io-oa ita Ramatua na.”d
12 Babati-lalane feke' nai Susura Makamoi' a, ba'i Yesaya dui' nae,
“Neme Isai anan, mane' Daud,
neu' ko ria tititi-nonosin esa kalua mai.
Ria ri' neu' ko pareta lahenda nusa feke' ara.
Ara bubulu' Ana nau mai.
Boe ma ara rahani Ni,
huu fo ara bubulu' Ria nana, bea.”e
13 Manetualain dadi neu' oka-samu' neme basa-basan fo ita tamahena. Kalu emi mamahere Ni, sona Ria tao na emi dale mara ramaho'o ma tesa-tama. No ria naa Manetualain Dula-dale Malalao-malalafun kuasa Na, tao na emi boe-boe mamahere la'e-neu' hata fo Ana tao a.
Manetualain nadenu Paulus neu tui-beka Tutui Malole Na
14 Toranoo kara emin! Au amahere emi dale ma henu' no hihii-nanau' malole ra, emi bubulu' dodou' la'e-neu' roo-tetu', ma emi mabe'i manori-mafada esa no esa. 15 Au dui' ledo-ledo nai susura' ia, ela afarerene' fee emi lai' esa selu' la'e-neu' dedea rupa'. Au dui' leo ia', nana huu Manetualain natudu dale malole Na neu' au, 16 tepo' fo Ana so'u au dadi Yesus Kristus lahenda nadedenun, ela muste uu tui-beka Manetualain Tutui Malole Na neu' lahenda fo ta lahenda nusa Yahudi. Au alala'o nonoi-laka ka, sama leo' malaka agama fo sadia na lahenda dodou' dadi leo' tutunu-hohotu' esa, fo tao namaho'o Manetualain dale Na. Manetualain Dula-dale Malalao-malalafu Na, tao na si dadi lalao-lalafu', de Manetualain bisa sipo' asa.
17 Huu no au abua-aesa oo Yesus Kristus, de au bisa boti' laka ka nai Manetualain matan. 18 Au ta aparani dedea hihii-nanau' feke'. Au tui-beka noi Kristus nonoi-tataon, ma tao leo' bea de Ana pake au. Besa' ia lahenda fo ta Yahudi ramanene neu' Kristus, nana huu Manetualain pake au, fo atudu eno' uni' au dedea-nafadak ma au nonoi-tatao ki. 19 Kristus fee au kuasa neme Manetualain Dula-dale Na, ela au bisa tao tanda heran rupa' ara. Ana fee kuasa ria neu' au fo natudu nae, Kristus nana, bea. No ria naa, au afada lahenda nai basa mamana' ain, basa-basan la'e-neu' Kristus Tutui Malole Na. De au tui-beka eme kota Yerusalem, rule-feo losa nusa Ilirikum nanenea' Italia. 20 Neme fai a ulu na mai, au afi ae, “Au ahii' aan seli tui-beka fee lahenda fo ri' ta parnaa ramanene Tutui Malole la'e-neu' Kristus!” Au ta ahii' anori-afada nai mamana', fo ri' lahenda feke' ara ranori-rafada a. 21 Nai Manetualain Susura Makamoi Na, mana dui' nae,
“Lahenda nusa' fo bei ta parnaa ramanene la'e-neu' Manetualain,
sira neu' ko rita Ni.
Lahenda fo ta parnaa ramanene hata-hata esa boe',
sira neu' ko bubulu' la'e-neu' Ana.”f
Paulus bobo'o nau leo kota Roma neu
22 Huu no au nonoi-laka ka leo' naa, de au bei ta dadi uu dama emi.g 23 Tehuu besa' ia au abasa nonoi-laka kara rai ia so. Ma ahii' uu dama emi doo' a so, losa teu-to' ara. 24 Kalu au leo nusa Spanyol uu, neu' ko au tuli emi. Boe ma kalu au tuli emi, emi bisa tulu-fali au meni' doi la'o eno' leo Spanyol uu.
25 Tehuu besa' ia, au nau leo Yerusalem uu dei, fo tulu-fali Manetualain lahenda kamahere nara rai naa. 26 Huu fo ita toranoon fo rai propensi Makedonia, ma propensi Akaya, fee doi tutulu-fafali' ela tulu-fali lahenda kasian rai Yerusalem fo ri' ramahere Kristus.h 27 Ara tao leo naa', nana huu ara rameda raan rahuta ita toranoo nara rai Yerusalem. Huu fo lahenda reme nusa feke' nai basa mamana' ain boe sipo' hihii-nanau' malole fo Manetualain Dula-dale Na fee neu' lahenda Yahudi fai ulu' ara. De naraa kalu lahenda sarani' fo ta Yahudi nau pake sira hata-heto nara ela tulu-fali sira toranoon lahenda Yahudi ra.i
28 De kalu au tao abasa nonoi-laka' ia, fo fee tutulu-fafali' neu' ita toranoon nara rai Yerusalem, au tuli emi fai fo au leo Spanyol uu a. 29 Kalu au mai, au uni ua-nale' dodou-ina' neme Kristus mai.
30 Toranoo kara emin! Huu no Yesus Kristus nana emi Ramatuam, ma huu no Manetualain Dula-dale Na tao na emi masue-malai ao, de au hule fo emi hule-haradoi tebe-tebe ela Manetualain tulu-fali au. 31 Hule fo Manetualain nanea au nai propensi Yudea, ela lahenda fo ta ramahere Manetualain, boso' tao tadalu' neu' au. Ma hule fo kalu au uu tulu-fali lahenda sarani' fo rai Yerusalem, sona ara sipo' au no malole. 32 Boe ma kalu tuka Manetualain hihii-nanaun, au bisa mai dama emi no dale namaho'o. Au nau hahae ao ki bai' nai emi naa. 33 Au hule-haradoi neu' Manetualain ela sama-sama no emi. Ria ri' bisa tao na lahenda nasoda no tesatei-tamadale' ma mole-dame. Tebe!