Boso' sale mafarara'u neu' emi toranoo lahenda sarani mara
14
Lahenda fo namahere Manetualain, tehuu bei kadudua ma ana bei ta bubulu' hihii-nanau' dodou'. Mapela lima mara fo sipo' ana no malole. Boso' mareresi' la'e-neu' ria dudu'a-aafin. Neme' naa ela ana natia' no emi. 2 Lahenda fo ramahere Manetualain, ara afi rae, lahenda sarani' a bisa naa sudi ubea', leo-leo' paa', do ubea'. Tehuu lahenda sarani feke', fo bei ta ramahere tebe-tebe, rahii' raa noi ai-doo. Huu fo ara raluli paa'. 3 Tehuu nenene! Lahenda sarani' fo nameda naan bole naa sudi ubea' a, muste hika-hada' neu' lahenda fo ta naa paa'. Leo' naa boe, lahenda sarani' fo ta naa paa', boso' nafada lahenda fo naa paa' a nae, “Taa paa' sona, sala!” Huu fo Manetualain sipo' na dua si, dadi Ria lahendan!4 Kalu o sale la'o naroo toranoo lahenda kamahere' ara leo' naa, afi mae o nana, bea? O manuu haak ubea' fo sale lahenda feke'? Ria nana ta o lahenda mana noim! Ma o nana, ta ria malakan. Noi ria Malaka na ri', nanuu haak fo nafada ledo-ledo, ana tao a la'e, do sala. Tehuu boso' mafarene henin. Ria Malaka na, ri' neu' ko sipo' lahenda ria no malole, nana huu malaka na nabe'i tao natetea ni, ela ana bisa nanenete.
5 Lahenda ruma raetu' rae, fai esa malole lena neme fai feke' ara. Lahenda feke' ara afi rae, basa fai ra sama, ta hapu esa feke' boe'. Lahenda ra muste raetu' ao nara la'e-neu' dedea' ria. 6 Kalu lahenda afi nae, fai fo malole lena neme fai feke' ara, ana tao leo naa' ela natudu hada-horomata neu' ita Ramatua na. Lahenda fo naa paa' ma nanaa feke' ara, bisa naa ela natudu hada-horomata neu' ita Ramatua na, huu fo ana hule makasi neu' Manetualain. Leo' naa boe lahenda fo ta naa paa'. Ria boe natudu hada-horomata neu' ita Ramatua na, ma ana hule makasi neu' Manetualain boe.a
7 Huu fo ita tasoda, ita ta tasoda soa noi neu' ita ao-ina na. Ma kalu ita mate, ita ta mate soa noi neu' ita ao-ina na. 8 Kalu bei tasoda, ita tabua-taesa to ita Ramatua na. Leo' naa boe, kalu mate, ita bei tabua-taesa to ita Ramatua na. De leo mae tasoda, do mate, ita bei dadi teu' Ria nuu-enan. 9 Huu ria naa, Kristus mate, boe ma nasoda selu'. Ana tao leo naa' ela Ana bisa dadi Ramatua' soa-neu' lahenda mana mate' ara, ma soa-neu' lahenda fo bei nasoda.
10 Ubea' taon de, o tao aom sama leo' mana ee dedea', fo sale o toranoom lahenda sarani'? Ubea' taon de, o ta hika-hada' ana? Neu' ko ita basa muste tataa Manetualain, ela Ana parisa' ita esa-esa masodan.b 11 Neme fai a ulu na mana dui' nai Manetualain Susura Makamoin dale' nae,
“Ita Ramatua na nafada nae,
‘Basa lahenda ra neu' ko sunda' undulaka nara fo raloe-radae ao nara reu' Au,
ma ratudu hada-horomata neu' Au.
Basa lahenda ra neu' ko manaku
rae, Au dadi sira Ramatuan,
nana huu Au ia, Manetualain.’”c
12 De ita basa neu' ko muste lepa natataa' fo tui Manetualain tae, ita tao leo bea', ma ubea' taon de ita tao leo naa'.
Boso' tao matuda o toranoom lahenda sarani' ara
13 Maulu na emi nai Roma sale la'o naroo emi toranoom lahenda sarani' ara. Boso' leo naa' bali! Malole lena', ita taetu' leo ia': ita boso' tao ita toranoo nara ratundu. Ita boso' tahihii' asa, fo ara tao sala'.
14 Huu no au abua-aesa oo ita Ramatuan Yesus, de au bubulu' matetu' leo ia': ta hapu hihii-nanau' esa, bisa tao nakekeo-nakakanu lahenda, losa' ana ta bisa hule-haradoi neu' Manetualain. Tehuu kalu lahenda afi nae hata esa tao naan nakekeo-nakakanu, losa' ana nameda naan ta nanuu haak huhule-haradoi, sona neme' naa ela ana naluli ni. 15 Conto leo-leo', kalu o mua paa', ma ria tao na o toranoo ma dale na susa, sona o ta matudu susue-lalaim neu' ana, hete? Manenete dei! Boso' tao malutu o toranoo ma, nana huu o nau mua hata esa! Huu fo Kristus mate soa-neu' lahenda ria boe. 16 Ta malole a kalu o tao hihii-nanau' fo ri' o mae malole a, tehuu lahenda feke' a dedea namamae' nade ma, nana huu ara afi rae o tataom ria tadalu'.
17 Afi matalolole! Manetualain nana, ita Mane' na. Tehuu ita dadi teu' Mane' a lahendan, nana ta huu ita taa-tinu tuka noi atoran a. Ta'a! Kalu ita nau dadi teu' Mane' a lahendan, ita muste tao roo-tetu', ita dale na lalao-lalafu', tasoda roo-tetu' ma mole-dame, ma ita dale na namaho'o. Basa ia ra bisa dadi, kalu ita tabua-taesa to Manetualain Dula-dale Malalao-malalafu Na la'o naroo. 18 Lahenda fo nalalau' Kristus leo naa', tao namaho'o Manetualain dale Na. Ma lahenda feke' a boe parisa' natalolole lahenda ria masoda na, boe ma io ni nae, “Ria, lahenda malole!”
19 De ita muste tahehere ao' ara tasoda mole-dame, ma tatetea esa no esa. 20 Boso' tao malutu Manetualain nonoi-tataon nai lahenda feke' a masodan, nana huu nanaa-nininu'. Manetualain nae bole mua sudi la'e ubea', huu fo basa-basan malole nai Manetualain matan. Tehuu kalu o malelena ao' mo toranoo ma nana huu nanaa-nininu', sona o sala ria. Boso' leo naa'!
21 Malole lena', o manenete! Boso' mua paa', minu anggor, do mua-minu hata feke' fo tao na o toranoo mara ratundu. 22 Au maksud ka leo ia': kalu o hule-haradoi neu' Manetualain, boe ma maetu' mae, o mamahere Ni la'e-neu' nanaa-nininu', sona maua-manale, huu fo dai ria so. Boso' aafi nau bubulu' o tao sala', do ta'a. Huu fo o maetu' maan leo naa'. 23 Tehuu kalu o dale ma kadudua, boe ma mua hata fo mameda maan bisa neni fee o makekeo-makakanu', Manetualain sale o, nana huu fai fo mua-minu o ta tao tuka dale namahere ma. Kalu o nau tao sudi ubea', tehuu o mamahere mae, ria ta matetu' nai Manetualain matan, sona sala ria so.