Mamania-mamanene neu' mana pareta ra
13
Basa lahenda ra muste ramania-ramanene neu' mana pareta ra. Huu fo ara ranuu haak ma kuasa de pareta lahenda ra. Ma ara homu pareta, nana huu Manetualain ri' fee si. Besa' ia mana homu kuasa sira, nana Manetualain ri' so'u si. 2 De kalu lahenda nalena-laka leo' naa neu' mana pareta ra, sama leo' ara ralena laka neu' hata fo Manetualain so'un. Kalu ara tao leo naa', neu' ko hapu huhuku' neme Manetualain mai.3 Kalu emi tao roo-tetu', ta parluu emi bii' mana pareta ra. Tehuu kalu emi tao tadalu', malole lena' emi bii' asa! De manea ao mara fo tao roo-tetu', sona ta parluu bii' asa. Ma kalu emi tao leo naa', sona neu' ko ara io emi. 4 Mana pareta ra nana Manetualain here si, ela ralalau' emi. Tehuu kalu emi tao sala' la'o naroo, malole lena' emi besa-besa! Sira si' ranuu haak, de ta parsuma huku emi. Sira sama leo' Manetualain atan de huku lahenda mana tao tadalu' ara. Manetualain ta sipo' hihii-nanau' tadalu' fo lahenda tao; Ana namanasa no si.
5 Huu ria naa, emi muste mamanene neu' mana pareta ra. Huu fo emi bubulu' nai dale mara mae, nonoi-tatao' leo naa' a la'e. Ma emi boe bubulu' Manetualain namanasa kalu ita ta tao roo-tetu'.
6 Leo' naa boe, emi muste bae doi-bea, nana huu mana pareta ra ralala'o Manetualain nonoi-tataon. 7 De emi muste bae basa-basan tuka matetu' na. Bae mana susu doi-bea ra, basa doi-bea fo ri' emi muste bae. Fee hada-horomata neu' basa lahenda fo muste sipo hada-horomata. Ma kalu lahenda tao naroo hihii-nanau' malole, so'u-fua nade nara ela basa lahenda bubulu' sira tao malole.a
Masue-malai ao
8 Bae etu o huta mara, fo boso' masoda no huta-bu'u. Ela ita tahuta noi hihii-nanau' esa' a, ri' nasue-nalai ao'. Kalu emi sue-lai lahenda, sona sosoa na nae, emi tao tuka Manetualain Atoran Nara. 9 Atoran sira rae, “Boso' hohoke; boso' maisa lahenda; boso' mamana'o; boso' tendetuu-dalesala lahenda feke' hata-nuun,” ma feke' bali. Kalu tao tuka basa Atoran ara, muste tao tuka Atoran esa ian, fo ri' nae, “O muste sue-lai lahenda feke' ara, sama leo' o sue-lai ao-ina heheli ma.”b 10 Kalu ita tatudu susue-lalai' ara neu' lahenda feke', ita ta tao tadalu' neu' ana, hete? De kalu ita tatudu susue-lalai' la'o naroo, ita bisa tao tuka basa Atoran neme Manetualain mai.
Ta doo' a so', te Kristus natafali mai selu'
11 Manetualain po'i-tata na ita teme lahenda nai dae-bafo' ia tadalu nara. Ma besa' ia ledo-fai popo'i-tatata Na neu' lahenda, nanenea' so lena neme kalu tararaa' ana no tepo' fo ita besa' ko tamahere Yesus Kristus. Huu ria naa, ita muste tasue-talai ao, nana huu ita bubulu' hihii-nanau' ria. Nonoo' leo maulu na, ita suku. Tehuu besa' ia losa ledo-fain so, de ita muste foa leo! 12 Ta doo' a so', te basa hatu' a, boe ma leledo' a mai. De malole lena', hahae teme ita sala-sikon mai leo. Ria sama leo' lahenda fo nasoda nai maiu' a, ma tao hihii-nanau' tadalu', huu fo ara afi rae lahenda ta rita si. Tehuu besa' ia ita muste dadi sama leo' soldadu fo pake tee-tafa musu, de nahehere aon tao hihii-nanau' malole ra, sama leo' lahenda fo nasoda nai makaledo' dale'. 13 Ita muste tasoda roo-tetu', ela basa lahenda rita ita tao hihii-nanau' malole ra. De ta malole a kalu ita noi feta-dote rame-rame, ma tinu tamafu' ao ara. Ta malole a kalu ita hohoke tao tamamae' ao' ara, ma ita tareresi' ii-ona'. Ta malole a boe kalu ita tamuti nana huu ta nau lahenda lena ita. 14 Tehuu malole lena', emi matafali dale mara fo dadi sama leo' ita Ramatuan Yesus Kristus, fo ri' Manetualain fee Ni mai. Ma kalu o mahii' maan seli nau tao hihii-nanau' ta malole, sona boso' moi mataa' a, fo o tao tuka hihii-nanau nafarara'u leo' naa ma. Manenete!