Kalu ita tabua-taesa to Kristus, ita masoda bebeu na muste dadi leo bea'?
12
Toranoo susue kara emin! Huu no Manetualain natudu dale kasian Na neu' ita, de au hule emi fee heni ao-ina katematua mara neu' Ana, sama leo' tutunu-hohotu masoda'. Ria ri' tao na Manetualain dale Na namaho'o. Mahehere ao mara, fo tao tuka Ria hihii-nanaun, ma masoda lalao-lalafu', ria ri' natudu emi susue-lalaim ma hada-horomatam neu' Ana. Mema' naraa emi do'o-tabe Ni leo' naa. 2 Boso' mataa' lahenda dae-bafo' besa' ia a radenu emi muste tao leo bea', do masoda leo bea', tuka sira hihii-nanaun. Boso' moi tuka-tuka' sira dudu'a-aafin, sira masodan, do sira hadas na. Tehuu malole lena', emi mataa' Manetualain tao na dudu'a-aafi mara dadi bebeu', ela emi du'a-afi basa-basan tuka eno bebeu'. No ria naa, emi bisa bubulu' Manetualain hihii-nanaun neu' emi a. Manetualain hihii-nanaun malole a, tetu-tema', ma tao mamaho'o dale Na.3 Huu no Manetualain nadenu au, ma natudu dale malole Na neu' au, de au afada emi leo ia': uku-sudi ao-ina mara neni' eno roo-tetu'! Boso madedema ao mara lena neme roo-tetu' a mai. Boso' pake uuku-susudi' fo ta nanuu dasar. Lahenda ra muste esa' ko bubulu' aon babati-papala' fo ri' Manetualain fee ni, nana huu ana namahere Kristus.
4 Hai conto neme lahenda ao-paa na. Ao-paa' esa nanuu babati' rupa' ara. Ma babati' ara esa' ko nonoi-lakan. 5 Leo' naa boe neu' ita fo tabua-taesa to Kristus. Ita lahenda dodou', tehuu ita dadi sama leo' ao-paa' esa. Ma lahenda ra esa' ko nonoi-lakan, sama leo' ao-paa' a babati nara. Esa parluu neu' esa. Conto leo-leo' lima' a tete henin neme ao-paa' a mai, ta nanuu sosoa-raraa' so', hete?a
6 Au maksud ka leo ia': Manetualain fee kuasa neu' ita basa, ela talala'o nonoi-laka rupa', nana huu Ana nahii' natudu dale malole Na neu' ita. Conto leo-leo' kalu Manetualain fee o kuasa fo tui-beka Ria hehelu Na, sona o muste tui-beka katema' hehelu' ria. Tehuu boso' tui-beka mala lena' neme hehelu' ria mai. 7 Kalu Manetualain fee o babati-papala', fo malalau' lahenda feke', sona muste malalau' pake kuasa ria. Kalu Ana fee o babati-papala', fo manori-mafada lahenda la'e-neu' Ana, sona muste manori-mafada lahenda pake kuasa ria. 8 Kalu Ana fee o babati-papala', fo mafofoa lahenda, sona o muste mafofoa pake kuasa ria. Kalu Ana fee o babati-papala', fo bisa tulu-fali lahenda feke' muni' hata fo manuu a, sona fee o hata-hetom ela tulu-fali si. Kalu Ana fee o babati, fo mauli-malaka lahenda ela ara ralala'o Ria nonoi-tataon malole lena, sona o muste makate fo mauli-malaka si pake kuasa ria. Kalu Ana fee o dale kasian, fo tulu-fali lahenda mana susa' a, sona muste tulu-fali si no namaho'o-natadale'.b
Kristus lahenda nara, muste rasoda leo bea'?
9 Kalu emi matudu susue-lalai' neu' lahenda, sona matudu susue-lalai' roo-tetu': boso' dea-mata'. Hiru masadea basa hihii-nanau' tadalu' ara, ma homu mahere basa hihii-nanau' malole. 10 Emi lahenda sarani' a muste masue-malai ao. Emi boe muste tebe-tebe matudu hada-horomata esa no esa. 11 Kalu emi moi-tao soa-neu' ita Ramatua na, sona no ao masee' ma mamaho'o-matadale, boso no dale poo seseri'. 12 Emi dale ma muste namaho'o hatu-leledon, huu fo emi bubulu' Manetualain tao leo bea' soa-neu' emi. Kalu hapu susa, manenete. Hule-haradoi hatu-leledon; boso' sota. 13 Pake emi hata-heto mara, ela tulu-fali lahenda sarani' fo parluu a. Kalu lahenda neme mamana feke' mai, sona fee si raa-rinu, do leo lalai reu' emi uma mara. No ria naa, emi matudu susue-lalaim neu' asa.
14 Kalu lahenda tao rasususa' emi la'o naroo, hule fo Manetualain tao hihii-nanau' malole fee si. Tebe! Boso' fee si kutuk!c 15 Kalu lahenda dale na namaho'o, sona mamaho'o bela' a. Ma kalu lahenda dola nana huu dale hedi, sona dola bela' a. 16 Masoda masue-malai ao ma dale' esa. Boso' koao. Malole lena', emi matia' mo lahenda mana dadi taa' ara. Boso' matutua-madedema aom fo afi mae, noi o ri' malela'.d
17 Kalu lahenda tao tadalu' neu' o, sona boso' balas muni' tadalu'. Tehuu o muste saka soba eno malole, fo basa lahenda bisa sipo'. 18 Kalu bisa sona saka eno' fo masoda mole-dame mo basa lahenda ra.
19 Toranoo susue kara emin! Boso' balas tadalu'. Neme' naa ela Manetualain ator. Kalu lahenda tao tadalu', sona Ana namanasa, sama leo' mana dui' nai Susura Makamoi' dale' nae,
“Ita Manetualain na dedea nae,
Au ri' anuu haak fo balas.
Au ri' huku lahenda mana tao tadalu' ara.”e
20 Malole lena', tao tuka hata fo Susura Makamoi' a nafada neme ulu' mai nae,
“Kalu o musu-noo ma namalaa,
sona, fee ni naa.
Kalu o musu-noo ma, maa na mada' a,
sona, fee ni ninu.
Kalu tao leo naa', neu' ko ana mae',
ma hada-horomata natafali' o.”f g
21 Boso' mataa' hihii-nanau' tadalu' ara ator o. Malole lena', hihii-nanau' malole ra ator o. No ria naa, o bisa maseki hihii-nanau' tadalu' ara.