Manetualain kasian neu' lahenda Israel ara
11
De au saka' atane leo ia': bate emi afi mae, “Huu no lahenda Israel ara ta ramanene neu' Manetualain, de Ana tipa-tola' asa.” Leo naa', do? Ta'a! Au boe dadi eme sira mai! Au eme leo Benyamin mai. Benyamin papa na ri', Yakob. Ba'i na ri', Isak. Isak papa na ri', Abraham, fo ri' basa lahenda Israel ara bei-ba'in.a 2 Manetualain ta tipa-tola' Ria lahenda nara. Sira nana, Ana nalela' mema' asa neme fai a ulu na mai. Emi bei mafarene hata fo mana dui' nai Manetualain Susura Makamoi Na la'e-neu' ba'i Elia, do? Ana namumuu nai Manetualain la'e-neu' lahenda Israel, boe ma ana hule fo Manetualain fee si huhuku' 3 nae,“Ramatua'! Lahenda ia ra raisa mana nesi mata,
fo ri' Ramatua' a fee si mai.
Ara fate ralutu mei tutunu-hohotu',
nai mamana' fo lahenda do'o-tabe neu' Ramatua' a.
Neme basa Ramatua' a mana nesi mata nara mai,
noi au mesa' ka ri' bei asoda.
Tehuu sira boe saka eno',
fo raisa au!”b
4 Tehuu Manetualain nataa nae, leo ia': “O dedea ma, sala! Au lahenda Ki fo ri' do'o-tabe neu' Au, bei rifun hitu bali. Ara ranenete raroo, ma ara ta soko neu' Ba'al!”c
5-6 Leo' naa boe, besa' ia. Ta basa lahenda Yahudi ra hiru rasadea Manetualain. Bei ela noi lahenda baiana' neme ami mai, ri' Manetualain here nau po'i-tata na si, nana huu Ana natudu dale malole Na neu' ami, ta huu no ami tao hihii-nanau' malole! Kalu Ana muste here na ami, nana huu ami nonoi-tatao malolem, ria sosoa na nae, Ana ta bisa naetu' nau natudu, do ta natudu, Ria dale malole Na neu' ami. Kalu leo' naa, sona ria ta nade ‘natudu dale malole Na’ so'.d 7 De mate'e na leo ia': lahenda Yahudi dodou' saka eno' ela Manetualain natudu dale malole Na neu' asa, fo sira boe bisa malole ro Ni. Tehuu ta dadi, nana huu sira laka batu, ma ta nau ramanene neu' Ana. Tehuu ruma bali hapu eno', nana huu Manetualain here mema' asa. 8 Nai Manetualain Susura Makamoi Na mana dui' la'e-neu' lahenda laka batu' sira nae,
“Manetualain fee si,
mata' fo ri' ta bisa rita,
ridoo' fo ri' ta bisa ramanene,
ma dodole' fo ri' ta bisa du'a-afi.
De ara ta bubulu' roo-tetu' a,
losa' fai' ia boe.”e
9 Mane' Daud boe dui' la'e-neu' lahenda Yahudi ra nai Susura Makamoi' a dale' nae,
“Neme' naa ela ara raa ao nara feta-doten.
Sira fetan ria nala selu' asa,
te ara afi rae basa-basan malole a.
Ma sira hata-heto nara tao na si ratundu.
10 Neme' naa ela sira mata nara dadi ma'iu,
fo boso' rita hata-hata esa boe!
Neme' naa ela ara lepa raroo lelepa mabera a,
ela koti'ai nara boe-boe pukudou!”f
Manetualain po'i-tata na lahenda fo ta Yahudi
11 De au atane leo ia': ubea' taon lahenda Yahudi ra ratundu? Ara tu'u reu, do? Ta'a! Tehuu ara ta nau ramanene neu' Manetualain, ma ta nau ramahere Kristus. No eno' ria, de soi eno' fee lahenda fo ta Yahudi, ela bisa hapu popo'i-tatata' neme sala-siko nara mai. Ma Manetualain tao leo naa', nana huu Ana nau lahenda Yahudi ra ramuti, de ara ratafali mai tuka selu' Ana. 12 Huu fo lahenda Yahudi ra ralena laka hata roo-tetu' a, de lahenda feke' reme dae-bafo' ia katema' bisa rameda rita Manetualain dale malole Na. Lahenda Yahudi ra rugi bau-ina'. Tehuu ria ri' tao na lahenda fo ta Yahudi raua-ranale bau-ina'. Boe ma kalu basa lahenda Yahudi ra boe malole selu' ro Manetualain, ria malole lena bali!
13 Au afada emi fo ta lahenda Yahudi leo ia': Manetualain nadenu au uu tui-beka fee emi la'e-neu' Ria Tutui Malole Na. Huu ria naa, au oi-tao tebe-tebe alala'o nonoi-tatao malole ina' ia. 14 Kalu au alala'o nonoi-tatao' ia no malole, boso' losa au tao a lahenda Yahudi kara ramuti, losa' sira ruma' a hapu popo'i-tatata' reme sala-siko nara mai. 15 Tepo' fo Manetualain tipa-tola' lahenda Yahudi nara, ria soi eno' fo lahenda feke' ara hapu lela' ela ara bisa dadi Manetualain lahendan. Tehuu uni' ko leo lahenda Yahudi ra mole-dame selu' ro Manetualain, sona malole na seli. Ria sama leo' ara rasoda selu' reme mamate nara mai!
16 Hai conto neme lahenda tao roti. Kalu ana hai na uu' bai' feen neu' Manetualain, neu' ko roti ria katema' dadi neu' Ria nuu-ena lalao-lalafun. Ma kalu lahenda fee ai huu' a okan esa soa-neu' Manetualain neu' ko ai huu' ria katema' dadi neu' Ria nuu-ena lalao-lalafun.
17 Au nau araraa' lahenda nusa Yahudi ra ro ai huu saitun esa, nasoda nai oka' dale'. Manetualain beta heni ai huu' ria ranan ruma so. Tehuu emi fo ta Yahudi, sama leo' saitun nura. Boe ma Manetualain beta na emi ranam ruma, de nadite' asa reu' ai huu' fo ri' nai oka' dale'. No ria naa, rana' neme ai huu' fo nai dea' a, nasoda neme ai huu' fo nai dale' a. Ria sama leo' emi fo ta Yahudi boe sipo Manetualain dale malolen fo Ana feen neu' Ria lahenda Yahudi nara. 18 Tehuu besa-besa! Boso' koao, afi mae emi meme dea' mai a, malole lena neme ai-rana' fo ri' Manetualain beta heni si. Kalu o io ao ma, boso' mafarene henin, te o noi ai-rana' esa' a! O ta tao ma ai huu' ria natea-namepe. Ai oka' a ri' tao na huu na, natea-namepe!
19 Bate o mae, “Manetualain beta heni ai-rana' esa neme ai huu', fo nasoda nai Ria oka Na dale', de Ana bisa nadite' fali' au nai naa, ela kati ai-rana paraa' a.” 20 Tebe ria. Tehuu boso' mafarene henin mae, Manetualain beta heni ai-rana' sira, nana huu ara ta ramahere Kristus. Ma o kati si, nana huu o mamahere Ni. De boso' koao! Malole lena', o besa-besa ma boso' rupa-rupa' ara! 21 Lahenda Yahudi ra, sama leo' ai-rana tetea' fo natabuku naulu'. Tehuu Manetualain ta nataa' asa ranenete rala' doo' a nai naa. De kalu o ta mamahere maroo Ni, boso' mamahena Ana nau nataa' o manenete nai naa!
22 De emi muste afi matalolole dei. Manetualain nanuu dale malole. Tehuu Ria fee huhuku mabera a boe. Neu' ko Ana huku lahenda kamahere taa', fo ri' ta malole ro Ni. Tehuu soa-neu' emi fo ta lahenda Yahudi, Manetualain natudu dale malole Na, sadi emi mabua-maesa maroo mo Ni, ma mataa' Ana tao malole soa-neu' emi. Tehuu kalu emi ta mataa' Ana tao leo naa', Ria boe beta heni emi neme huu Na mai.
23 Leo' naa boe neu' lahenda Yahudi ra. Kalu ara saledale-tu'etei nara, fo mulai ramahere Kristus, neu' ko Manetualain nadite' fali' asa reu' ai huu tea' ria. Te Ana nanuu kuasa, fo bisa tao leo naa'! 24 Emi fo ta lahenda Yahudi, sama leo' maulu na ai-rana saitun nura a mori aon nai oka' dea'. Tehuu Manetualain here na emi, de Ana nadite' emi meu' ai saitun malole fo ri' Ana selen nai Ria okan dale', neme' naa ela ai huu' sira esa' ko rupan. Huu fo kalu lahenda fo ta Yahudi boe bisa dadi leo naa', lahenda Yahudi a leo bea' bali. Lena-lena' bali, kalu Manetualain nadite' fali' lahenda Yahudi ra reu' sira huu tetea na.
Neu' ko lahenda Yahudi ra malole selu' ro Manetualain
25 Toranoo' fo rai Roma! Emi muste bubulu' hihii-nanau' ia fo ri' maulu na bei nino a. Kalu emi bubulu' ana, emi boso' koao, afi mae, emi malela'. Leo ia': besa' ia lahenda Yahudi ra laka batu', ma ta nau ramahere Kristus. Tehuu ara ta leo naa' raroo fa. Kalu lahenda fo ta Yahudi, Manetualain here na si, ela ramahere Kristus, neu' ko lahenda Yahudi ra boe ramahere Ni. 26 De kalu ledo-fai ria mai, neu' ko Manetualain po'i-tata na basa lahenda Yahudi ra reme sala-siko nara mai. Ria sama leo' mana dui' nai Susura Makamoi' a nae,
“Neu' ko Lahenda esa mai,
po'i-tata na ita teme soe a.
Ana mai neme lete Sion na, nai kota Yerusalem.
Ria ri' neu' ko tao na Yakob tititi-nonosin saledale-tu'etei nara.
Huu fo ara rasoda ta tao dale' neu' Au,
ma sira hiru rasadea Au eno masoda matetu Ka.g
27 Au sae-safe heni sira sala-sikon.
Au tao hehelu-barataa' oo si leo naa'.”h
28 Fai be ma lahenda Yahudi ra ramanene Kristus Tutui Malole Na, sira tao ao nara leo' musu-noo' fo ri' soa' Ana. No ria naa, ara fee lela' neu' emi fo ta Yahudi! Leo mae leo' naa, tehuu Manetualain bei sue-lai si, nana huu Ana sue-lai sira bei-ba'i nara, ma here na si dadi Ria lahenda Nara. 29 Kalu Manetualain fee heni hata esa, sona ta hela fali' ana so'. Ma kalu Ana naloo lahenda nae, “Mai tuka Au! Mai dadi meu' Au lahenda Ki leo!” Ana ta usi heni si so'.
30 Fai a ulu na, emi fo ta lahenda Yahudi, ta mamanene neu' Manetualain. Tehuu besa' ia, emi sipo Manetualain dale kasian Na, nana huu lahenda Yahudi ra ta ramanene Ni. 31 De sira si' besa' ia ta tao tuka Manetualain hihii-nanaun. Huu ria naa, Manetualain nau natudu dale kasian Na neu' emi. Ma neu' ko Ria boe kasian neu' asa selu'. 32 Besa' ia Manetualain nita lahenda Yahudi ra sama ro lahenda fo ta Yahudi. Sira basa ta tao tuka Ria hihii-nanaun, sama leo' sira mana ena' ma ta bubulu' eno kalua. Ana nataa' leo' naa, ela bisa natudu dale kasian Na neu' basa lahenda.
Manetualain malole na seli!
33 Manetualain malela na seli!
Ma Ria pake malela na fo tao malole.
Lahenda ta bisa nalela' matetu' Ana.
Lahenda ta nalela' matetu' la'e-neu' Ana naetu' dedea'.
Ta hapu lahenda esa bubulu',
ubea' taon de Ana tao hihii-nanau' esa.i
34 Lahenda ta bubulu' matetu' ita Ramatua na dudu'a-aafin.
Ta hapu esa bisa ranori-rafada Ni boe'.j
35 Lahenda ta bisa fee parseen hata esa neu' Ramatua' a,
Lahenda ta bisa naseti Ramatua' a ela Ana balas natafali'!k
36 Basa-basan raoka-rasamu rai Manetualain!
Basan dadi, nana huu Ria!
Basa-basan fo ita tao a,
ita toi-tao soa-neu' Ana.
Ita io-oa Ni,
losa doo na neu!
Tebe!l