Manetualain teka-here lahenda Israel ara
9
Ita fo ri' tabua-taesa to Kristus, dedea matetu'. De au ta dedea fufudi' neu' emi. Au dale ana boboko ka boe nafada au nae, Manetualain Dula-dale Na ator au dale ka. 2-3 Au afada leo ia': au dale ka susa. Au ameda aan bera' a leo' naa, nana huu au afarene lahenda kara. Au nau lahenda nusa Yahudia kara boe rabua-raesa ro Kristus, tehuu dodou' ta ramahere Ni. Uni' ko leo au bisa soi eno' fee si, au sadia hule Manetualain huku au, ela kati si. Ma au boe sadia hule Manetualain heo heni au eme Kristus mai, ela au lahenda kara bisa rabua-raesa ro Ni. 4 Sekonaa te sira nana, lahenda Israel, ri' lahenda nusa' esa fo naua-nanale naan seli. Neme fai a ulu na Manetualain so'u na si dadi Ria ana nara. Ana natudu kuasa marela-masa'a Na soa-neu' asa. Ana tao hehelu-barataa rupa' no si. Ana fee Atoran Na neu' asa. Sira si' do'o-tabe neu' Ana ma ralalau Ni. Ana helu natudu dale malole Na neu' asa.b 5 Sira tititi-nonosi' reme ami bei-ba'im, si' ba'i Abraham, ba'i Isak ma ba'i Yakob (lahenda hai nade ‘Israel’ neme ba'i Yakob). Ma Kristus, nana ri' Manetualain helu mema' neme fai a ulu na fo feen mai, Ria boe tititi-nonosi' neme ami lahenda nusa' Yahudi a bei-ba'i mara. Kristus nana ri' Manetualain fo pareta basa-basan. De naraa kalu lahenda io-oa Ni losa doo na neu. Tebe!c6 Leo mae lahenda Israel dodou' bei ta sipo' Kristus, tehuu lahenda ta bisa rafada rae, Manetualain hehelu-barataa Na ta dadi. Huu fo ta basa lahenda fo dadi reme bei-ba'i Israel nana, Manetualain lahendan fo ri' Ana teka-here si. 7 Conto leo-leo', lahenda dodou' dadi reme ami bei-ba'im, ri' ba'i Abraham. Tehuu sira basa ta Abraham tititi-nonosin fo ri' Manetualain teka-here a. Manetualain nafada Abraham nae, “Au alela' noi o tititi-nonosim fo ri' dadi reme o anam Isak mai.”d
8 Ria sosoa na nae, neme fai a ulu na mai losa' besa' ia, ta basa tititi-nonosi' fo reme ita lahenda Yahudi a ba'in Abraham, ri' dadi Manetualain ana Nara. Noi tititi-nonosi' neme Manetualain hehelu Na neu' Abraham, ri' Manetualain reke' asa reu' Ria ana matetu nara. 9 Manetualain tao hehelu-barataa' no Abraham nae, “Teu mana mai' ia te, Au atafali selu' mai. Tepo' ria te, o saom Sara boki na ana tou' esa so.”e
10 Ta noi ria fa. Ami ba'im Isak no saon Ribka boki ana kadua'. 11-12 Tepo' fo Ribka bei ta boki si, ara bei ta tao hihii-nanau' malole, do hihii-nanau' tadalu'. Leo mae leo' naa, tehuu Manetualain nafada mema' Ribka la'e-neu' ana fo ri' kalua naulu' nae, “Neu' ko a'a a noi-tao fee fadi na.” Manetualain nafada leo' naa, ela natudu nae, kalu Ana teka-here na lahenda esa, Ana bubulu' pake lahenda ria fo tao leo bea'. Boe ma Manetualain teka-here na fadi' a ela dadi Ria lahendan. Ana ta nahani nau nita fadi' a tao leo bea', nana huu Manetualain bubulu' mema'.f 13 Sama leo' Manetualain nafada nai Ria Susura Makamoi Na la'e-neu' ana kadua' sira nae,
“Au teka-here Yakob,
tehuu Au tipa-tola' Esau.”g
14 De ita bei tae ubea'? Bate ruma rae, “Manetualain naetu' dedea' ta beibebera'?” Ta bisa fa! 15 Fai a ulu na Manetualain nafada neu' ba'i Musa nae,
“Au atudu dale kasian Ka neu' lahenda fo Au teka-here a.
Ma Au sue-lai lahenda fo Au tudu a.”h
16 De Manetualain natudu dale kasian Na neu' lahenda, ta huu lahenda ria hihii-nanaun, do nonoi-tataon, tehuu no Manetualain hihii-nanaun. 17 Sama leo' mana dui' nai Susura Makamoi' a, Manetualain dedea no mane' Masir nae, “Au so'u o dadi mane', nana huu Au pake o, fo atudu kuasa Ka neu' lahenda dodou'. No ria naa, lahenda rai dae-bafo' ia katema' bisa so'u-fua Au nade Ka.”i
18 De kalu Manetualain tao na lahenda esa laka batu, sona Ana tao tuka Ria hihii Na. Ma kalu Ana natudu dale kasian Na neu' lahenda esa, sona Ana tao tuka Ria hihii Na boe.j
Manetualain bisa natudu dale kasian Na, tehuu Ana ta sipo' tadalu' a
19 Uni' ko leo lahenda nadedea laka neu' au nae, “Kalu leo' naa, sona Manetualain tao hihii-nanau' esa, bea ri' bisa soa' Ana? Ta'a, hete? Ubea' taon de Ana sale ita? Ria nabenu'!”
20 Kalu ruma afi leo naa', au ataa leo ia': “O afi mae o nana bea?! O madedea laka neu' Manetualain, do?” Boso' leo naa'! Huu fo nai Manetualain Susura Makamoi Na dale' mana dui' nae, “Kalu lahenda tao hata esa, hapun nai bea hata ria bisa natane natafali' lahenda fo tao ni a nae, ‘Ubea' taon de o tao au leo' ia!?’”k 21 Conto leo-leo' mana tao ure' a. Neme dae pilas kaboa' esa, ana nanuu haak tao na kusi makadila' esa, ela lahenda io ni. Ria boe nanuu haak pake dae kaboa' ria fo tao mamana kadafu', tuka noi ria hihii-nanaun.
22 Leo' naa boe neu' Manetualain. Ana nanuu haak tao tuka Ria hihii-nanaun. Ana natudu neu' basa lahenda ra nae, Ana namanasa ma ta sipo' lahenda tao tadalu' hata-hata esa boe'. Ria boe nau natudu neu' lahenda nae, Ana nanuu kuasa dodou-ina', tehuu Ana bei nanenete neu' lahenda tatao sala rupa nara. Sekonaa te lahenda fo tao sala', ara roi rahani' ledo-fai na fo ralulutu'. 23 Ana nanenete leo naa', ela natudu neu' lahenda dodou' nae, Ana natudu dale kasian Na neu' lahenda ruma. Sira nana, si' Ana here mema' asa fo nadedema si. No ria naa Ana nau lahenda bubulu' Ria marela-masa'a. 24 Ita boe nai dale' sama-sama to lahenda fo ri' Ana nadedema si a. Ana here mema' ita fo dadi Ria lahenda nara. Ita ruma teme lahenda Yahudi, ma ruma teme lahenda nusa feke' ara. 25 Fai a ulu na, Manetualain pake mana nesi matan Hosea, de dui' la'e-neu' lahenda fo ta Yahudi nae,
“Lahenda fo fai a ulu na ta Au lahenda Ki,
tehuu Au aloo si ae,
‘Emi nana, Au lahenda Ki.’
Ma lahenda nusa' fo fai a ulu na Au ta sue-lai si,
tehuu Au aloo si ae,
‘Emi nana, lahenda nusa' fo Au sue-lai.’”l
26 Ria boe dui' nae,
“Nai naa,
nai mamana' fo Manetualain nafada si nae,
‘Emi ta dadi Au lahenda Ki!’
Neu' ko Manetualain Masoda' nafada si nae,
‘Besa' ia emi dadi Au ana kara so!’”m
Ana dedea leo' naa, nana huu Ana kasian neu' lahenda fo ta Yahudi ra.
27 Manetualain mana nesi mata feken, Yesaya parnaa naloo bou-bou la'e-neu' lahenda Israel ara nae,
“Leo mae lahenda Israel ara dodou-ina' asa,
sama leo' soroae' nai tasi' a suu na,
tehuu noi lahenda baiana' a neu' ko Manetualain po'i-tata na si,
reme sira sala-siko nara mai.
28 Neu' ko losa ledo-fain,
fo Ramatua' a naetu' basa lahenda nai dae-bafo' ia dedean,
sama leo' Ana nafada mema'.
Ana ta nahani so',
tehuu Ana nalale huku si!”n
29 Fai a ulu na Yesaya boe nafada la'e-neu' lahenda Yahudi ra nae,
“Ita taua-tanale,
nana huu Ramatua' Mana Kuasa Naan Seli,
nataa' ita tititi-nonosin ruma hapu soda'.
Kalu ta leo naa', sona
ita sapu-lalo,
sama leo' lahenda kota Sodom ma kota Gomora.”o
Tutui Malole soa-neu' lahenda Israel fo ta nau ramanene Manetualain
30 De ita tae ubea'? Tae, lahenda fo ta Yahudi rai basa mamana' ain, fo ri' maulu na ta saka eno' ela malole ro Manetualain, besa' ia malole ro Ni, nana huu ara ramahere Yesus Kristus. 31 Sekonaa te lahenda Israel ara, soba nau tao tuka Musa Atoran na ela ara bisa malole ro Manetualain, tehuu ta dadi boe'.
32-33 Ubea' taon de ara ta bisa malole ro Manetualain? Nana huu ara tao tuka noi Atoran, ela Ana sipo' asa, sama leo' lahenda dale roo-tetu', tehuu ara tao Yesus Kristus neu' lahenda fo ta naraa ramahere Ni. Huu no sira namahere taan ria, de sama leo' ara ratundu nai “batu natundu'” esa. Ia ri' nai Manetualain Susura Makamoi Na nae,
“Mete-mita'!
Au peda-fua Lahenda esa
nai lete Sion, nai kota Yerusalem.
Lahenda ria sama leo' batu esa,
tao na lahenda ratundu.
Tehuu bea ri' namahere Ni, sona
ta parluu mae'.”
Batu ria, nana ri' Yesus. Tehuu lahenda Israel ara tipa-tola' Ana. Ria sama leo' ara ratundu, de ara tu'u reu nana huu batu ria.p