3 Leo mae ita tao tuka Musa Atoran a, ria ta bisa po'i-tata naa ita teme sala-siko' a kuasa na, nana huu ita noi lahenda dae-bafo' biasa fo tao sala' la'o naroo. Tehuu Manetualain soi eno kalua. Ana fee Ana boki Na mai dadi lahenda dae-bafo' sama leo' ita. Leo mae lahenda dae-bafo' feke' a tao sala rupa', tehuu Yesus ta parnaa tao sala' hata-hata esa boe'. Lena-lena' bali, Ana dadi tutunu-hohotu' ela sae-safe heni ita sala-sikon. 4 Manetualain fee Kristus mai, de Ana mate ela ita bisa tao tuka basa hihii-nanau' roo-tetu' a, tuka Manetualain hihiin nai Ria Atoran nara. De besa' ia ita ta tao tuka ita hihii-nanau mesan, tehuu tao tuka Manetualain Dula-dale Na hihii-nanaun.

5 Lahenda fo rasoda tuka sira hihii-nanau mesan, soda' leo naa' nana huu ara afi raroo noi hihii-nanau' tadalu'. Tehuu lahenda fo nasoda tuka Manetualain Dula-dale Na hihii-nanaun, ara afi noi hihii-nanau' fo ri' tao namaho'o Manetualain Dula-dale Na. 6 Lahenda fo nataa' hihii-nanau' tadalu' a ator ria dudu'a-aafin, sama leo' lahenda fo ta namanene neu' Manetualain Dula-dale Na, huu ria naa ria dale na nana ena' soa-neu' Manetualain. Tehuu lahenda fo nataa' Manetualain Dula-dale Na ator ria dudu'a-aafin, de ana hapu soda matetu' ma dale na tama.

7 Ita lahenda dae-bafo' a hihii-nanaun soa' Manetualain hihii-nanaun. De ita ta bisa taloe ao' ara fo tamanene neu' Manetualain. 8 Lahenda fo rataa' sira hihii-nanaun nara ator asa, nau do ta nau, ta bisa tao namaho'o Manetualain dale Na.

9 Tehuu emi lahenda fo ta masoda tadalu' tuka emi hihii-nanau mesa mara. Kalu Manetualain Dula-dale Na nasoda nai dale mara, emi tao hihii-nanau' fo ri' tao namaho'o Ni. (Tehuu kalu lahenda fo Kristus Dula-dale Na ta nasoda nai ria dale na, ria ta dadi Manetualain nuu-enan.) 10 Emi ao-paa ma neu' ko mate, nana huu emi tao sala' neme ulu' mai. Tehuu no besa' ia Kristus nasoda nai emi dale mara, emi sumane ma neu' ko nasoda naroo, nana huu Manetualain tao emi neu' lahenda dale roo-tetu', de emi malole selu' mo Ni. 11 Manetualain fee Yesus nasoda selu' neme mamate Na mai. De kalu Manetualain Dula-dale Na nai ita dale na, leo mae ita mate boe, neu' ko Ria tao na ita tasoda selu'. Ria sosoa na nae, Ana fee ita soda', sama leo' Ana fee Kristus nasoda selu'.^a

12 De leo ia', toranoo kara! Ita tanuu huta'. Ta huta' fo tasoda tuka ita lahenda dae-bafo' a hihii-nanaun, tehuu huta' fo tasoda tuka Manetualain hihii-nanaun. 13 Kalu ita tasoda tuka noi tadalu' fo nai ita dale na, tantu Manetualain hiru nasadea ita, ma huku namate ita! Tehuu kalu ita tataa' Manetualain Dula-dale Na tao nalulutu' tadalu' fo nai ita dale na, besa' ko ita bisa hapu soda matetu' mana basa taa'.

14 Lahenda fo ramania-ramanene Manetualain Dula-dale Na fo Ana ator asa, sona sira nana, Manetualain ana nara. 15 Kalu ita tataa' Manetualain Dula-dale Na ator ita, sona ita ta sama leo' fai ulu na ita dadi ata fo tasoda no bibii-namata'u. Tehuu no ita sipo' Manetualain Dula-dale Na ator ita, de bubulu' ita dadi Manetualain ana nara. Huu ria naa, neu' ko Ana namanene ita, kalu ita taloo neu' Ana tae, “Papa Boki'!”^b

16 Ita dale na ri' nafada nae, ita dadi Manetualain ana nara. Ma Manetualain Dula-dale Na boe nafada leo naa'. 17 Kalu ita dadi Manetualain ana nara, ma Manetualain dadi ita Aman, sona sosoa na nae, neu' ko ita sipo Ria posaka Na. De kalu Ama' a fee posaka neu' Ria Anan Kristus, ita boe sama-sama sipo Ria posaka Na. Tehuu bei hihii-nanau' esa bali: Kristus doidoso, de ita boe muste doidoso, ela Manetualain bisa nadedema ita, sama leo' Ana nadedema Kristus.^c

18 Tehuu tuka au sona, doidoso fo besa' ia ita hapu ni a sosoa-raraa' ta'a, kalu nararaa' ana no basa hihii-nanau' marela-masa'a fo neu' ko Manetualain natudun neu' ita. 19 Basa-basan fo Manetualain adu naa si rai lalai ma dae-ina' a, rahani ma rahii' rita Ni natudu Ria ana matetu nara si' bea. Ana nau natudu neu' asa no namaho'o-natadale'. 20 Huu fo Manetualain nataa' dae-ina' a no oe-isin ela ara ta dadi malole sama leo' hata fo Manetualain nau taon soa-neu' asa nai ledo-fai mana mai a. Manetualain nataa' leo naa', ta tuka dae-bafo' a hihiin, tehuu tuka Manetualain hihii Na. Leo mae leo' naa, tehuu bei hapu namahena'.^d 21 Dae-bafo' a oe-isi nara ruma puru si, ruma tadalus ma ruma mate si, tehuu Manetualain po'i-tata naa dae-bafo' a oe-isin ela boso' boe dadi leo naa' bali. Ana nadedema ana nara ma po'i-tata na si ela boso' tadalus.

22 Ita bubulu' susa-lela ma doidoso dodou' nai dae-bafo' ia. Neme fai a ulu na mai losa' besa' ia, basa-basan fo Manetualain adu a, rahoo nana rameda hedis, tepo' fo rahani ela Manetualain tao na basa-basan dadi bebeu'. Ria sama leo' ina' fo nahoo nameda hedi boboki'. 23 Ta noi dae-bafo' a ri' nahani, tehuu ita boe tahani leo' naa. Leo mae Manetualain fee naulu' Dula-dale Na neu' ita, ita boe tahoo nai dale' ara. Ita tahani Manetualain so'u na ita dadi teu' Ria ana matetu nara, ma po'i-tata na ita teme ao-paa fo ri' neu' ko nalulutu'.^e

24 Tepo' fo Manetualain po'i-tata na ita, Ana helu nau fee ita hata malole ra. Tehuu besa' ia ita bei tahani, nana huu bei ta dadi. Kalu tita hihii-nanau' mana dadi' esa, sona ta parluu ita tahani fo mete-relu hihii-nanau' ria bali. Lahenda ta nahani ela nita hihii-nanau' fo dadi a, hete? 25 Tehuu kalu ita tahani ela tita hihii-nanau' esa fo ri' bei ta dadi, ita bei bisa sabar.

26 Leo' naa boe, tepo' fo ita tahani a, Manetualain Dula-dale Na boe tulu-fali ita, nana huu ita ta tabe'i, ma ta hule-haradoi no matetu'. Tehuu Manetualain Dula-dale Na ri' hule-haradoi kati ita, ela ita talela' noi nahohoo' a, ma ta bubulu' hule-haradoi tae ubea'. 27 Manetualain bubulu' basa-basan fo ita dedean nai ita dale na. Ria boe bubulu' Dula-dale Na dudu'a-aafin. Huu ria naa, Ana bubulu' basa hihii-nanau' fo ri' Ria Dula-dale Na dedean, ela tulu-fali ita. Manetualain Dula-dale Na dudu'a-aafin, sama leo' Manetualain dudu'a-aafin. Ma Ria Dula-dale Na hule-haradoi neu' Manetualain, hule fo Manetualain tulu-fali lahenda kamahere' ara. Dula-dale' a hule-haradoi tuka Manetualain hihii-nanaun.

28 Besa' ia ita bubulu leo ia': Hihii-nanau' tadalu' ma hihii-nanau' susa fo tameda taan nai ita masoda na, ita bubulu' neu' ko Manetualain tao naa basa-basan dadi malole. Neme fai a ulu na mai Manetualain ator mema' leo naa' soa-neu' lahenda fo sue-lai Ni. Ma Ana naloo si nae, “Mai dadi meu' Au lahenda Ki leo!” 29 Fai a ulu na, Ana nalela' mema' asa, ma here na si fo taos sama leo' Ria Anan Kristus. No ria naa, Kristus nana ulu bau-ina' ma feke' ara dadi reu' Ria fadi nara. 30 Lahenda fo ri' Manetualain nalela' asa neme fai a ulu na Ana naloo naa si, fo dadi reu' Ria lahendan. Fai a ulu na lahenda masala-masiko' sira, tehuu Ana tao si dadi lahenda dale roo-tetu', ela ara malole selu' ro Ni. Ma Ana nadedema si.

31 De ita tae ubea' la'e-neu' hihii-nanau' ia ra bali? Manetualain nasuru-nahapa' ita. Ma kalu leo naa', sona bea ri' bisa soa' ita bali? Ta'a, hete? 32 Manetualain ta ena-natabaa Ana mane ise Na. Tehuu Ana fee heni Ni, fo mate dadi tutunu-hohotu', ela tulu-fali ita basa. Huu no Manetualain ta ena-natabaa Ana Na, de ita bisa bubulu' neu' ko Ana parseen fee ita, basa hihii-nanau' malole ra. Tebe, hete?

33 Bate emi afi mae, bei hapu lahenda bisa sale lahenda fo Manetualain here na si aa? Tehuu ta'a, hete? Manetualain tao ita neu' lahenda dale roo-tetu' sala' taa', de ita malole to Ni.

34 Bate emi afi mae, lahenda ruma bisa rae Manetualain muste huku lahenda fo Ana here na si a. Tehuu ta bisa fa! Yesus Kristus mate so. Lena-lena' bali, Manetualain fee Ni nasoda selu' neme mamate Na mai. Manetualain so'u Ni, fo natuu' nai mamana hada-horomata naan seli nai Ria boboa ona Na. Nai naa Ria ri' hule-haradoi fee ita la'o naroo.

35 Bate emi afi mae, lahenda do, hihii-nanau', bisa raseti Kristus losa' Ana ta sue-lai ita, do? Ta bisa fa! Leo mae ita hapu eese-rurumu', susa-lela, doidoso, laa-roes, kakao-papake' ta'a, hapu soe, do lahenda nau raisa ita, tehuu Kristus sue-lai ita la'o naroo. Ta hapu esa bisa tao naan, hahae sue-lai ita! 36 Sama leo' mana dui' nai Manetualain Susura Makamoi Na nae,

37 De leo mae ita hapu susa leo' bea boe, tehuu ita taseki, nana huu Kristus sue na ita seli!

38 Au bubulu' matetu' leo ia': ta hapu hihii-nanau' esa bisa tao na Manetualain hahae sue-lai ita. Leo mae ita tasoda, mate, eila'o-limalope rai nusatetu-ikutema' a, mana homu pareta, kuasa, hata mana dadi besa' ia, hata mana dadi nai fai mana mai' a, 39 kuasa nai lalai, kuasa nai dae-ina' a, do hata feke' fo ri' Manetualain adu naa si — ta hapu esa bisa heo heni ita teme Manetualain mai, de Ana ta sue-lai ita so'! Huu no ita tabua-taesa to ita Ramatuan Yesus Kristus, fo ri' Manetualain fee Ni mai a.