2 Au hai conto neme atoran saoina-saotou'. Kalu ina' esa sao, sona tuka atoran hohoro-lalane' a, sira dua sao rahere losa' mate. Tehuu kalu sao tou na maten, sona ina-falu ria ta nanaheke' no atoran ria. Ana bole sao selu'. 3 Ma kalu sao tou na bei nasoda, tehuu ana sao lahenda feke', tuka atoran na sona ana hohoke ria. Tehuu kalu sao tou na maten, sona atoran sasao' a ta la'e ni so'. Ria po'ilota'. Ma kalu ana sao lahenda feke', sona tuka atoran na ana ta hohoke.

4 Leo' naa boe neu' emi kamahere' ara! Kristus mate so. Ria sama leo' emi mate sama-sama mo Ni, ma foa ela emi masoda paraa mara. De atoran hohoro-lalane' a, ta la'e emi so'. Besa' ia, emi po'ilota' meme atoran ria ma mabua-maesa mo Kristus, fo ri' nasoda selu' neme mamate Na mai. Ria sama leo' ina-falu fo sao selu'. Sala' ta'a. De besa' ia, basa-basan fo emi tao a soa-neu' Manetualain.

5 Fai a ulu na, ita tao tuka noi ita ao-paa na hihii-nanaun. Huu fo ita bubulu' atoran, tehuu ita bei tahii' talena laka atoran sira, de tao hihii-nanau' ta matetu'. Ita salan ria ri' tao na Manetualain hiru nasadea ita. 6 Fai a ulun na, ita muste tao tuka atoran na. Tehuu besa' ia, atoran na ta la'e ita, huu fo ita tu'u-tapa heni ita masoda paraa na so. Tuka eno paraa' a hihii-nanaun, sona Musa atoran fo mana dui' nai Susura Makamoi' a nanaheke' neu' ita. Tehuu tuka eno bebeu' a hihii-nanaun, sona ita po'ilota' teme atoran ria mai. Huu fo Manetualain Dula-dale Na ator ita! Huu ria naa, besa' ia ita tao tuka noi Manetualain hihii-nanaun.

7 De ita tae ubea'? Bate emi afi mae, “Atoran fo ri' Manetualain feen neu' Musa, nana sala!” Ta'a! Kalu au ta bubulu' atoran ria, sona au ta bisa bubulu' hihii-nanau' fo ta roo-tetu' nai au dale ka. Conto leo-leo', atoran fo ri' nae, “Boso' tendetuu hai lahenda nuu-enan.” Tehuu tao leo' bea fo au bisa bubulu' tendetuu rupa leo naa' a, nana sala, kalu au ta bubulu' ria nanuu atoran? Ta bisa fa!^a 8 Huu no hapu atoran nae leo' naa, ria sama leo' hata tadalu' nai au dale ka tao na au tendetuu hai lahenda hata-heto rupa nara. Tehuu kalu ta hapu atoran fo horo-lane, sona sala' a boe ta nanuu kuasa ator ita.

9 Fai a ulu na nai au masoda ka, au ta bubulu' matetu' Manetualain Atoran Na. Doo-doo, besa' ko au bubulu' no matetu'. Huu ria naa, besa' ko au ameda aan au alena laka Atoran ria, ma tao sala'. Ma sala' a babae na, ri' au muste mate. 10 Boe ma au dale ka nalulutu', huu fo au bubulu' au ta bisa malole oo Manetualain, nana huu noi au tao tuka Ria atoran Na. Au araa hapu Manetualain nasa-boliin, ri' huhuku mamates, huu fo au alena laka Ria Atoran Na. Sekonaa te, hapu Atoran ela tao na lahenda bisa hapu soda' matetu'. Tehuu soa-neu' au, Atoran ria ri' tao nalutu au, de tao na Manetualain hiru nasadea au. 11 Tebe Atoran ria natudu eno masoda matetu' a. Tehuu no tadalu' a nasoda nai au dale ka, au tipu selu' ao-ina ka de afi ae, au bisa malole oo Manetualain, sadi au tao tuka Ria Atoran Na. De nonoo' leo Atoran a ri' tataon losa' Manetualain nahia' au, ma ta nabua no au.^b

12 De kalu bisinaa' a lahenda rae, “Atoran fo ri'Manetualain feen neu' Musa, sala,” sona au ataa ae, “Ta'a! Manetualain Atoran Na, lalao-lalafu'!” Ma basa pareta nai Atoran ria dale', boe lalao-lalafu', la'e ma malole a.

13 Huu fo leo mae au bubulu' Atoran ria, tehuu au bei amania-amanene neu' tadalu' fo nai au dale ka losa' au tao sala'. De au tatao sala' ka, tao na Manetualain hiru nasadea au. Mema' Atoran ria malole a huu fo ria natudu basa hihii-nanau' tadalu' fo ri' tao na ita bika-bati teme Manetualain mai. Tehuu leo mae leo' naa boe au ta bisa tao tuka ni. No eno' ria Atoran na natudu ledo-ledo hihii-nanau' tadalu' nai lahenda dale na mema' tadalu naan seli.

14 Ita bubulu' Atoran fo Manetualain feen neu' ba'i Musa, naondan neme Manetualain Dula-dale Na mai. Tehuu au noi lahenda dae-bafo' biasa de dale ka ta tea' a. De au amania-amanene neu' hihii-nanau' tadalu' fo nai dale makekeo-makakanu ka, losa' au tao sala'. Ria sama leo' sala' a dadi neu' au malaka ka, ma au dadi uu' sala' a ata na. 15 Au laka ka dile. Au ta bubulu' tao ubea'. Nana huu au ta tao tuka hata fo au nau tao ni. Tehuu au tao tuka hata fo au ta nau tao ni.^c 16 Kalu au tao tuka hata fo au ta nau taon, au manaku ae, Manetualain Atoran Na nana la'e. 17 De ta au ri' ator ao-ina ka. Tadalu' fo nasoda nai au dale ka ri' ator au!

18 Au bubulu' ta hapu hii-nanau' malole a nasoda nai au dale ka. Au lahenda dae-bafo' dale tadalu'. Nau do ta nau, au ta bisa asusuu laka, fo tao roo-tetu'. Au nau, tehuu ta dadi. 19 Au ahii' tao malole, tehuu ta taon fa. Ma au ta ahii' tao tadalu', tehuu au tao ni! 20 Kalu au tao tuka hata fo au ta ahii' taon, ria nana ta noi au hihii-nanau mesa ka, tehuu no tadalu' fo ri' leo-naparasa nai au dale ka.

21 De leo ia': leo mae au ahii' tao malole, tehuu tadalu' nai au dale ka ri' nalena-laka. 22 Sekonaa te, kalu au afi la'e-neu' Manetualain Atoran Na, sona au amaho'o. 23 Tehuu nonoo' nae hapu kuasa nai au dale ka de tao nalutu au. Au ahii' aan seli tao malole, tehuu ta dadi. Ria sama leo' kuasa tadalu' fo nai au dale ka hopu na au, de naseti au tuka noi ria mesa' ana. 24 Adoo, kasian! Au lahenda mana doidoso! Kuasa tadalu' fo ri' leo-naparasa nai dale ka tao na Manetualain nahia' de hiru nasadea au. Huu ria naa, bea ri' bisa po'i-tata na au eme kuasa tadalu' ma Manetualain huhuku Na mai?

25 Tehuu Manetualain soi eno', ela po'i-tata naa au! Makasi dodou' neu' Ana, nana huu ita Ramatuan Yesus Kristus bisa po'i-tata naa au! De kalu au asarai soda ka neu' ao-ina ka, sona au doidoso. Leo mae au ahii' tao tuka Manetualain Atoran Nara katema', tehuu kuasa tadalu' nai au dale ka de duduku-papau' au, ela tao sala' la'o naroo.