Ita muste foa ela sala-siko' ara, fo tasoda tuka Manetualain hihii-nanaun
6
De besa' ia ita tae ubea? Bate emi afi mae, “Manetualain nafarene heni ami sala-siko mara, nana huu dale malole Na. Huu ria naa, malole lena' ami tao sala' la'o naroo, ela Manetualain natudu dale malole Na, lena-lena' neu' ita.” 2 Ta bisa fa! Ta naraa kalu ita tao sala' la'o naroo, huu fo taetu' tae, ita foa ela sala-siko' ara. Ita ta lili-ne'a nai tadalu' a so', de ria sama leo' ita mate! Lahenda mana mate' a, ta bisa tao sala', hete? Kalu ita mate, sona tao leo' bea de ita bisa tao sala' bali? Ta bisa fa, hete?3 Bate emi ta bubulu' fai fo ita sarani a, ria dadi tanda nae, ita foa ela masoda paraa' a, de dadi lahenda bebeu', fo ri' tabua-taesa to Yesus Kristus. Ria sama leo' ita mate sama-sama to Ni. 4 Fai fo Kristus mate, ara ratoi Ni. Ma fai fo ita sarani, ria sama leo' ita masoda paraa na boe maten, de ratoin. Ama' Manetualain pake kuasa marela-masa'an, de fee Kristus nasoda selu' neme mamate Na mai. Ama' Manetualain nau ita sipo' Ria kuasa Na, ela tasoda dadi lahenda bebeu'.a
5 Ria sama leo' ita mate sama-sama to Yesus. De ita fo ri' tabua-taesa to Ni, neu' ko ita boe tasoda selu' teme mamate ara mai, sama leo' Ana nasoda selu'.
6 Fai a ulu na, ita dadi lahenda fo ri' tao sala rupa'. Tehuu ita masoda paraa na, nalulutu' sama leo' ara paku raisa ita nai ai kake' a sama-sama to Kristus. Besa' ia, tadalu' nai ita dale na ta nanuu kuasa, fo ator ita. Besa' ia, ita ta lili-ne'a to sala' so'. Ita ta sama leo' ata fo ta nanuu haak ela nau tao ubea'. 7 Kalu lahenda a mate, sona ria po'ilota', hete? Ta hapu esa bisa naseti ni fo ana tao sala' bali.
8 De huu no ria sama leo' ita mate sama-sama to Kristus, sona ita tamahere tae, neu' ko ita tasoda to Ni la'o naroo. 9 Ita bubulu', huu no Kristus nasoda selu' neme mamate Na mai, Ana ta mate nasarerei so'. Ta hapu hata esa nanuu kuasa, tao namate Ni. 10 Fai a ulu na, Ana mate lai' esa, fo fe'a heni sala' a kuasa na. Tehuu besa' ia, Ana nasoda fo natudu hada-horomata neu' Manetualain.
11 Emi muste tao ao mara leo naa' boe. Sama leo' emi mate, huu ria naa sala' a ta nanuu kuasa neu' emi. De besa' ia, emi muste leo-la'o matudu hada-horomata neu' Manetualain, nana huu emi mabua-maesa mo Yesus Kristus.
12 Boso' mataa' tadalu' kuasa nai o dale ma fo ator o, ela tuka noi ao-ina ma hihii-nanaun, fo tao tadalu' ara. Huu fo neu' ko o ao-ina ma mate. 13 Ma boso' fee heni ao-ina ma, fo tao hihii-nanau' ta matetu ara, te ria sala boe. Tehuu fee ao-ina ma neu' Manetualain, ela Ana ator o, nonoo' leo o mate, boe ma masoda selu'. De pake o ao-ina katematua ma fo tao hihii-nanau' roo-tetu' soa-neu' Manetualain. 14 Boso' mataa' sala' a ator emi, sama leo' sala' a dadi neu' emi malaka ma. Besa' ia ta parluu emi leo-la'o tuka Musa atoran nara, ela malole selu' mo Manetualain. Emi masoda roo-tetu', nana huu Manetualain natudu dale malole Na neu' emi. De besa' ia, dale malolen ria, ri' ator emi.
Ita dadi sama leo' ata fo toi-tao tuka Manetualain hihii-nanaun
15 De leo bea'? Emi bate afi mae, “Ta parluu ita tao tuka ba'i Musa atoran na, ela malole to Manetualain. Kalu leo' naa, sona ela ita tao sala' la'o naroo leo. Huu fo Manetualain bei nau natudu Ria dale malole Na neu' ita!” Emi afi leo naa', hete? Au afada! Ria nana, sala!
16 Au hai conto neme malaka ma ata. Kalu emi fee heni ao-ina mara, fo moi-tao fee lahenda esa, sona emi muste mamanene neu' ana, ma tao tuka ria hihii-nanaun. Huu fo ria nana emi malaka ma. Ma emi nana, ria ata na. Leo' naa boe, emi bisa here nau tuka bea. Emi bisa here tao sala', boe ma emi dadi meu' sala' a atan. Tehuu kalu emi here leo naa', sona emi tao ma ao-ina mara bika-bati meme Manetualain mai. Do, emi bisa here tao roo-tetu', ma dadi ata de tao tuka hata fo ri' Manetualain nadenu emi. Kalu emi here leo naa', sona emi bisa malole mo Ni!
17 Fai a ulu na, emi moi mataa' sala' a ator emi, tehuu besa' ia emi mamanene neu' dale mara, de tao tuka hata fo ri' lahenda sarani' ara ranori-rafadan neu' emi. Huu ria naa, au hule makasi neu' Manetualain. 18 Manetualain po'i-tata na emi meme sala' a kuasa na, losa' sala' a ta ator emi so'. De besa' ia, hihii-nanau' roo-tetu' a ator emi.
19 Au dedea ia, pake conto fai-fai' neme malaka ma ata, ela emi bubulu' au maksud ka. Fai a ulu na emi fee heni ao-ina mara dadi sala-siko' a atan de masoda tao sala'. No ria naa Musa atoran na ri' nafada nae, emi dadi makekeo-makakanu'. Tehuu besa' ia emi muste fee heni ao-ina mara dadi roo-tetu' a atan de masoda tao noi roo-tetu', no ria naa emi dadi lalao-lalafu' nai Manetualain matan.
20 Fai a ulu na, tepo' fo emi noi mamanene' a, ma tao tuka sala' a hihii-nanaun, de emi ta nau mamanene ma tao tuka roo-tetu' a. 21 Au atane leo ia': Emi hapu buna-boa malole ubea' neme emi tataom ria mai? Ta'a, hete? Sekonaa te buna-boa' fo emi hapu a, tao namamae' emi. Neme emi nonoi-tatao sala' leo' naa mara, de mate'e na Manetualain hiru nasadea emi.
22 Tehuu besa' ia Manetualain po'i-tata na emi meme malaka paraa' a mai, de emi boso' tao sala' bali. Besa' ia emi muste dadi Manetualain atan. Neu' mate'e na, emi dadi Ria lahenda malalao-malalafun, ma hapu soda matetu' mana basa taa'. 23 Fai fo ita tao sala', ria seseba na, ri' Manetualain nasadea ita losa doo na neu. Ita mate so! Tehuu Manetualain sadia eno kalua esa fee ita. Ana parseen fee ita soda' matetu' mana basa taa'. Ma ita hapu soda' ria, kalu dadi teu' Ramatua Yesus Kristus lahendan.