Lahenda bisa malole ro Manetualain sadi ara ramahere Yesus Kristus
5
Huu no ita tamahere Manetualain, de Ana tao ita neu' lahenda dale roo-tetu'. De ita dale na boe dadi lalao-lalafu' soa-neu' Manetualain, nana huu ita Ramatuan Yesus Kristus, fo ri' Manetualain fee Ni mai, Ana soi eno' ela ita bisa tamole-tadame ao. 2 Kristus natudu dale malole Na neu' ita leo' naa, nana huu ita tamahere Ni. Huu ria naa, ita dale na bisa dadi tea-mepe'. Ma ita tamaho'o-tatadale, nana huu ami bubulu' neu' ko Manetualain so'u na ita fo tameda tita Ria marela-masa'an.3 Leo mae ita hapu susa-lela rupa', tehuu ita tamaho'o-tatadale taroo. Ita bubulu' ita tanori neme susa-lela a mai, ela ita bisa boe-boe tatea-tamepe bali. 4 Kalu ita tanenete nai susa-lela dale', ria ta natuda ita, ma ita soda na tao na Manetualain namaho'o. Kalu ita tasoda tea-mepe' leo' naa, ria tao na ita tamahere tetea' tae, neu' ko Manetualain natudu dale malole Na neu' ita. 5 Kalu ita tamahere tetea' leo' naa, ita ta mae' fa. Huu fo Manetualain fee ita Dula-dale Malalao-malalafu Na, ela ita bisa bubulu' nai ita dale na tae, Ana sue na ita seli.
6 Ana natudu susue-lalain, leo ia': tepo' fo ita bei ta tabe'i tao ao-ina' ara malole to Manetualain, te Ana fee Kristus mai ela mate soa-neu' ita fo ri' tasoda ta tao dale' neu' Manetualain. Manetualain here na ledo-fai matetu-maraa' leo naa'. 7 Afi matalolole! Ta hapu lahenda sadia mate kati ria tia-lain madale roo-tetu'. Bate lahenda ruma sadia mate, ela tulu-fali lahenda dale malole a. 8 Tehuu Manetualain natudu dale susue-lalai kadodou Na neu' ita, nana huu tepo' fo ita bei tao sala' a, Kristus mate soa-neu' ita.
9 Manetualain tao ita neu' lahenda dale roo-tetu' fo malole to Ni, nana huu Kristus fee daa Na faa ela mate soa-neu' ita. Sekonaa te, kalu lahenda tao sala', sona Manetualain namanasa. Tehuu no Kristus tataon ria, ita fo tao sala' a, ta hapu huhuku'.
10 Fai a ulu na, ita musu to Manetualain. Tehuu Manetualain Ana Na mate fo tao masufu Manetualain dale Na, ela ita bisa mole-dame to Ni. De besa' ia ita ta musu-noo' so', tehuu malole selu' so. Lena-lena' bali, nana huu Kristus nasoda selu', neu' ko nai dae-bafo' a nonoe na, Ana po'i-tata na ita, ela boso' hapu Manetualain huhuku na bali. 11 Ta noi ria fa! Ita bisa tamaho'o-tatadale tae, “Manetualain nana, marela-masa'a!” nana huu ita tabua-taesa to Ni. Ita bisa dadi teu' Ria lahendan, nana huu ita Ramatuan Yesus Kristus, mate soa-neu' ita, de tao na ita mole-dame to Manetualain.
Kalu ita tararaa' Adam no Kristus, sona sama, tehuu esa' ko enon
12 De neme fai a ulu na mai, lahenda dae-bafo' masososa', ri' ba'i Adam, ana tao sala'. Huu ria naa, Manetualain ta nataa' ana nasoda naroo. Mulai tepo' ria, basa lahenda nai dae-bafo' ia tao sala' sama leo' ria boe. Ma huu no ara tao sala' sama leo' ria, de basa si muste mate bela' a.a 13 Fai a ulu na, tepo' fo Manetualain bei ta naonda Atoran nara, lahenda tao sala' nai dae-bafo' ia katema'. Tehuu no bei ta hapu Atoran, de ta hapu esa reke lahenda sala-sikon boe'. 14 Neme ba'i Adam mai, losa ba'i Musa sipo Manetualain Atoran Na, basa lahenda tantu mate. Leo mae ara ta ralena laka Manetualain paretan fo ri' Ana feen neu' Adam, tehuu ara bei tao sala-siko rupa feke' ara. Huu ria naa, ara muste mate, sama leo' Adam.
Kalu ita tararaa' ba'i Adam no Ramatua Yesus, sona dua si sama, ma dua si esa' ko enon boe. Adam sama leo' gambar esa, de natudu Yesus rupa-lolen, fo ri' neu' ko toda mai. 15 Tehuu Adam tatao sala-siko na, ta sama leo' Yesus tatao malole na soa-neu' ita a. Lahenda esa, fo ri' Adam, nalena-laka Manetualain pareta Na. Huu ria naa, basa lahenda muste mate. Tehuu Lahenda esa bali, fo ri' Yesus Kristus, tao malole rupa' soa-neu' ita, ma ta nahani lahenda balas Ria malole Na. Lahenda ise' ria tatao na, namadai soa-neu' basa lahenda ra, huu fo Manetualain tao malole fee ita. 16 Manetualain fee ita a, feke' neme sala' lahenda kaise', fo ri' Adam tao a. Tepo' fo ana tao sala', Manetualain naetu' nae, “O sala. De o muste hapu huhuku'!” Tehuu leo mae lahenda tao sala' mauunu', Manetualain ri' parisa' basa lahenda ra masoda na, bei nau natudu dale malole Na, ma naetu' nae, “Au tao o neu' lahenda sala taa'. De besa' ia o po'iloa', ma ta hapu huhuku' so'. Mai fo malole selu' mo Au!” 17 De lahenda esa, fo ri' Adam tao sala', ma nalena-laka Manetualain pareta Na. Huu ria naa, besa' ia basa lahenda ra muste mate. Tehuu Lahenda esa bali, fo ri' Yesus Kristus, tao malole. Huu no tatao Ni ria, de ita bisa malole to Manetualain. Ria sama leo' Ana parseen fee ita hata esa. Ana nau ita hapu soda matetu', sama leo' ita hapu kuasa, de pareta nai dae-bafo' a sama-sama to Kristus.
18 De lahenda esa tatao sala-sikon, soi eno' fo basa lahenda ra muste hapu huhuku' neme Manetualain mai. Ma Lahenda esa tatao roo-tetu Na ri' soi eno' fo basa lahenda ra bisa malole selu' ro Manetualain, ela hapu soda matetu' mana basa taa'. 19 Au maksud ka leo ia': Adam nana, lahenda esa rian fo ta namanene neu' Manetualain, de nalena-laka pareta Na. Ma lahenda dodou' tao sala' sama leo' ria boe. Boe ma Yesus nana, Lahenda esa rian fo namanene neu' Manetualain, ma tao tuka Ria hihii-nanaun. Ria ri' soi eno' de lahenda dodou' bisa malole selu' ro Manetualain.
20 Manetualain naonda Ria Atoran Na neu' ba'i Musa, ela basa lahenda ra bubulu' matetu', bea ri' sala. Tehuu nai mamana' bea lahenda sala na tamba dodou', nai naa boe Manetualain natudu dale malole kadodou-ina Na. 21 Fai a ulu na, tadalu' nai lahenda dalen nanuu kuasa de ator neu' asa, losa' ara tao sala' fo neni huhuku mamates. Tehuu besa' ia, hihii-nanau' malole fo ita Ramatuan Yesus Kristus tao ni a, Manetualain pake ni, fo natudu dale malole Na neu' ita. Ma hihii-nanau' malole ria nanuu kuasa fo ator ita, boe ma ita bisa malole to Manetualain, de hapu soda matetu' mana basa taa'.