Conto neme ba'i Abraham. Ana malole no Manetualain nana huu namahere Manetualain
4
De hai conto neme lahenda Yahudi ra ba'in Abraham. Ita bisa tanori ubea' neme' ana mai, la'e-neu' lahenda malole ro Manetualain, nana huu ramahere Kristus?2 Ita bisa tanori leo ia': kalu Abraham bisa malole no Manetualain nana huu ana tao hihii-nanau' malole, sona ria boe hapu dasar fo bisa dedea bau-ina' nai lahenda dae-bafo' a matan. Tehuu nai Manetualain matan, ana ta bisa dedea hata-hata esa boe'. 3 Huu fo mana dui' nai Manetualain Susura Makamoi Na dale' nae,
“Huu no Abraham namahere Manetualain,
de Manetualain tao ni neu' lahenda dale roo-tetu' fo malole no Ni.”a
4 Lahenda fo noi-tao, sona ana sipo kadi. Kadi ria nana ta doi parseen, tehuu doi' fo malaka a bae lahenda ria sosota na. Huu fo lahenda mana noi a haak na ria. 5 Manetualain ri' nanuu haak de nae, lahenda fo namahere Yesus Kristus bisa malole selu' no Ni, leo mae maulu na lahenda ria tao sala', ma ta tao dale' neu' Manetualain. Ta hapu hihii-nanau' esa lahenda bisa taon, ela ana malole no Manetualain. Lahenda muste namahere Yesus Kristus, besa' ko Manetualain tao ni neu' lahenda dale roo-tetu, ma sipo' ana.
6 Mane' Daud boe nafada nae, lahenda ramaho'o-ratadale tepo' fo Manetualain tao si reu' lahenda dale roo-tetu', leo mae ara ta tao hata-hata esa boe'. Huu fo Daud dui' nae:
7 “Leo mae lahenda ia ra ralena laka neu' Manetualain Atoran Na,
tehuu Ana sae-safe heni sala-siko nara.
Huu ria naa, ara raua-ranale raan seli!
Lahenda fo tao tadalu' ara,
Manetualain nafarene heni sala-siko nara.
8 Kalu Ramatua' a ta bareken lahenda sala-sikon,
sona lahenda ria naua-nanale matetu!”b
9 Bate emi afi mae, noi lahenda Yahudi fo sunat, bisa naua-nanale, de malole no Manetualain, hete? Ma lahenda nusa feke' fo ta sunat, ta bisa fa, hete? Ta'a! Dudu'a-aafi leo naa' a, sala! Huu ria naa, ami fee emi nafarerene' mae, huu no Abraham namahere Manetualain, de Manetualain tao ni neu' lahenda dale roo-tetu' fo malole no Ni. 10 Fai bea ri' Manetualain tao Abraham leo naa'? Fai fo ana sunat, do fai fo ana bei ta sunat? Matetu na, nana ta fai fo ana sunat basa, tehuu fai fo bei ta sunat.
11 Tebe! Tepo' fo Abraham bei ta sunat, Manetualain tao ni neu', lahenda dale roo-tetu', de malole no Manetualain. Nai mabui besa' ko ana sunat ela dadi tanda nae, ana namahere Manetualain. No ria naa, Abraham ri' soi eno' fee basa lahenda fo ramahere Manetualain. Manetualain sipo' basa lahenda fo ramahere Ni, ela ara malole roon, leo mae ara sunat, do ta'a.c 12 Abraham boe soi eno' fee ami lahenda Yahudi fo sunat. Nana ta huu no ami sunat, tehuu no ami mamahere Kristus sama leo' Abraham namahere Manetualain, tepo' fo ana bei ta sunat.
Kalu ita tamahere Manetualain, sona ita sipo hata fo Ana helu a
13 Manetualain helu-barataa neu' Abraham no tititi-nonosi nara nae, neu' ko dae-bafo' a katema' dadi neu' sira posakan. Manetualain helu leo' naa, nana huu Abraham namahere Ni, de tao ni neu' lahenda dale roo-tetu' fo malole no Ni. Tehuu Manetualain helu leo naa', nana ta huu Abraham tao tuka Ria Atoran Nara.d
14 Kalu lahenda tao tuka noi Manetualain Atoran Na bisa sipo posaka fo ri' Manetualain helu a, sona ria sosoa na nae, namahere na neu' Manetualain mana dadi taa'. Ma Manetualain hehelun ria, boe ta nanuu sosoa-raraa'.e 15 Manetualain Atoran Na nai bea, sona nai naa boe lahenda ralena laka neu' Atoran ria. Kalu lahenda ralena laka neu' Manetualain Atoran Na, sona Ana namanasa, de Ana huku si. Kalu ta hapu Manetualain Atoran Na, sona tantu ta hapu lahenda nalena-laka neu' Atoran ria.
16 Huu ria naa, ita muste tamahere Ni, lena heni basa-basan. Manetualain natudu dale malole Na neu' lahenda fo ramahere Ni. Ma kalu ita tamahere Ni sama leo' Abraham, tantu ita sipo hata fo ri' Ana helu, leo mae ita lahenda Yahudi fo tao tuka Ria Atoran Na, do ta'a. De ita basa fo ri' tamahere a, sama leo' Abraham tititi-nonosin.f 17 Nai Manetualain Susura Makamoin dale', Ana helu neu' Abraham nae, “Au tao o dadi muu' lahenda nusa' dodou' bei-ba'in.” Abraham namahere Manetualain, de Ana tao natetu hehelu-barataan. Ria ri' fee lahenda mana mate' ara rasoda selu'. Ana noi dedea' a boe, tantu basa-basan dadi.g
18 Abraham namahere, de nahani Manetualain tao natetu Ria hehelu-barataan, leo mae bei ta nanuu ana'. Huu ria naa, Manetualain tao naan dadi neu' “lahenda nusa' dodou' bei-ba'in.” Ria sama leo' mana dui' nai Manetualain Susura Makamoi Na dale' nae, “Neu' ko tititi-nonosi' dodou' reme' o mai.”h 19 Abraham namahere tebe-tebe Manetualain, leo mae ana bubulu' namalasi naan seli, teu ni natun esa so. Ma Sara boe tedi ni, ma namalasi kokoo so.i 20 Tehuu Abraham namahere na ta natakeko. Ana namahere tebe-tebe nae, Manetualain tantu tao natetu Ria hehelu-barataan. Ana namahere tebe-tebe Manetualain, de ana nadedema Manetualain nade Na. 21 Abraham namahere tebe-tebe nae, hata fo Manetualain helu a, Ana nabe'i tao tukan. 22 Huu ria naa, Manetualain tao Abraham neu' lahenda dale roo-tetu' fo malole no Ni.
23 Tehuu Manetualain Susura Makamoi Na nae, Manetualain tao leo naa' ta noi neu' Abraham mesa' ana, 24 tehuu neu' ita boe! Kalu ita tamahere Ni, Ana tao ita neu' lahenda dale roo-tetu' fo malole to Ni. Manetualain fee ita Ramatuan Yesus nasoda selu' neme mamate Na mai. 25 Yesus mate, nana huu ita tatao sala-sikon. Boe ma Ana nasoda selu', de soi eno' fo ita bisa malole selu' to Manetualain.j