Leo mae lahenda Yahudi ra ranuu haak sipo posaka neme Manetualain hehelu na, ria ta po'i-tata naa si
3
Kalu leo' naa, sona lahenda Yahudi fo sunat a, onto ubea'? Bate emi afi mae, lahenda Yahudi ra hapu dodou' ma malole lena, neme lahenda fo ta Yahudi, hete? 2 Tebe! Lahenda Yahudi ra hapu oonto' nai hihii-nanau' dodou'. Masososan, huu no Manetualain fee lahenda Yahudi ra nonoi-laka', ela dui' ma ranea ratalolole Ria Hara-dasin. 3 De leo' bea? Bate emi afi mae, Manetualain ta bisa tao tuka hata fo ri' Ana nafada, nana huu lahenda Yahudi ruma ta ramahere Ni, do? 4 Ta bisa fa! Leo mae basa lahenda rai dae-bafo' ia mapuputa' ara, tehuu Manetualain dedea roo-tetu' la'o naroo! Mafarerene' hata fo mana dui' nai Susura Makamoi' dale' la'e-neu' Manetualain nae,“Lahenda fo ri' sale a nae,
Ana ta naetu' dedea' no matetu'.
Tehuu neu' ko ara bubulu',
hata fo Ana dedea ni a, mema' tebe.
Tantu Ana naseki,
nana huu Ana ta bisa dedea sala.”a
5 Kalu ita tao sala', tehuu Manetualain bei tao malole la'o naroo neu' ita. Ria natudu ledo-ledo neu' basa lahenda ra nae, hata fo Manetualain taon mema' tebe natetu na Ria dedea-nafadan. Kalu leo' naa, sona ita bei tae ubea' bali? Saka' tae, kalu Manetualain naetu' huhuku' neu' ita, sona ta matetu', do? (Huu fo lahenda ruma dedea rae leo' naa.) 6 Ta bisa fa! Kalu Manetualain fee ita huhuku', sona Ana ta sala. Huu fo Ana nanuu haak huku lahenda fo tao sala' nai dae-bafo' ia.
7 Kalu au ta atetu a hehelu ka, tehuu Manetualain natetu na hehelu Na la'o naroo, sona ria natudu nae, Ria nana marela-masa'a. Ubea' taon de Ana parisa' au soda ka, boe ma naetu' au dedea ka nae, hata fo au tao ni a, sala? 8 Boso' leo naa'! Kalu tuka dudu'a-aafi leo naa', emi tuka lahenda fo ri' nae, “Neme' naa ela ita tao sala' dodou-ina', fo malole a boe tamba dodou'!” Lahenda fo dedea nae leo' naa, naraa hapu huhuku'. Tehuu lahenda ruma ramumulu-ramamae' au rae, au anori-afada lahenda leo naa'.
Ta hapu lahenda esa dale na roo-tetu' boe', huu fo basan tao sala'
9 De leo' bea? Emi afi mae ita lahenda Yahudi a malole lena neme lahenda ta Yahudi? Ta bisa fa! Huu fo au atudu neu' emi ae, basa lahenda ra tuda rala sala' dale', leo mae ria lahenda Yahudi, do ta Yahudi. 10 Sama leo' mana dui' nai Manetualain Susura Makamoi Na nae,
“Ta hapu lahenda nasoda roo-tetu' la'o naroo.
Ta hapu esa boe'!
11 Ta hapu lahenda bubulu' matetu' la'e-neu' Manetualain.
Ta hapu esa saka Manetualain boe'.
12 Basa si heo reme eno masoda roo-tetu' a mai.
De ara ta dadadi' so'.
Ta hapu lahenda natudu dale malole.
Ta hapu esa boe'!b
13 Sira dedea-nafadan, naboo puru,
sama leo' rates fo lahenda ali selu' ana.
Sira bafa nara kalua noi napuputa'.
Sira dedean fo kalua neme bafa nara mai,
sama leo' meke a raso na.c
14 Sira bafa nara ralela' noi do'i lahenda,
ma dedea tadalu' fo tao fee lahenda dale hedi,
huu fo ria ri' kalua neme sira dale tadalu nara.d
15 Ara ta bii' raisa lahenda.
16 Ara leo bea' reu sona,
ara tao kaco nai naa,
ma tao susa rupa' ara neu' lahenda.
17 Ara ta rasoda no mole-dame,
ma ta rasoda no tesatei-tamadale'.e
18 Ara ta bisa ranenete rala ao nara,
nana huu ta bii Manetualain bai' boe'.”f
19 No ria naa, ta hapu lahenda esa bisa nae, ria salan ta'a. Huu fo ita bubulu' Manetualain fee Atoran Na neu' lahenda, ela tao tukan. Neu' ko dae-bafo' ia noe, te basa lahenda nai dae-bafo' ia muste reu rataa Manetualain, ela Ana naetu' sira dedea nara nae, ara sala, do ta'a. 20 Huu ria naa, ta hapu lahenda esa bisa nafada nae, “Manetualain tao au neu', lahenda dale roo-tetu', nana huu au tao tuka Ria Atoran nara katema'.” Ta bisa fa! Huu fo Manetualain Atoran Na natudu nae, ita basa tao sala'.g
Ita muste tamahere Ramatua Yesus, besa' ko Manetualain tao ita neu' lahenda dale roo-tetu'
21 Boso' moi patararaa' a la'e-neu' Manetualain eno Na ela ita bisa malole selu' to Ni. Matetu na, ita bisa malole to Ni, ta huu ita tao tuka Ria Atoran Na. Ria Atoran na mana dui' leo naa', ma Ria mana nesi mata fai ulu nara boe rafada leo' naa nai Manetualain Susura Makamoi Na dale'. 22 Manetualain tao ita neu' lahenda dale roo-tetu', de malole to Ni, fai fo ita tamahere Yesus Kristus. Ana ta mete mata', nana huu Ana tao leo naa' soa-neu' basa lahenda fo ramahere Yesus.h
23 Manetualain lalao-lalafu'. No ria naa, ita boe muste lalao-lalafu', besa' ko Ana bisa sipo' ita. Tehuu basa lahenda tao sala'. Huu ria naa, lahenda fo soba-soba tao aon malole no Manetualain, ta bisa lalao-lalafu' sama leo' Manetualain. 24 Leo mae leo' naa, tehuu Manetualain natudu dale malole Na, ma naetu' nae, ita sala' ta'a so. Ana sipo' ita leo' naa, nana huu Yesus Kristus soi-tefa na ita teme sala-siko' ara mai.
25-26 Manetualain tudu na Yesus dadi tutunu-hohotu, tifa-bae ita huta na, ela sae-safe heni ita sala-sikon. Tehuu ita muste tamahere Ni tae, Ana sipo na ita huhuku na. De Ana fee daa Na faa, ma mate kati ita. No ria naa, Manetualain natudu nae, hata fo Ana naetu' basan a, tebe. Fai a ulu na, Ana sabar naan seli, de Ana nafarene heni sala-siko' fo ri' maulu na lahenda tao a. Tehuu kalu Ana ta huku lahenda masala' a, sona Ria ta matetu'. De Ana soi eno' fo ela Yesus Kristus bisa lepa-nasaa ita lahenda masala' a huhuku na. Besa' ia, Ana natudu neu' basa lahenda ra nae, Ana tao malole la'o naroo. Basa lahenda masala' fo ramahere Yesus, Ana naetu' naan tao si reu' lahenda dale roo-tetu'.
27 De leo' bea? Bate afi mae emi bisa dedea bau-ina', nana huu Manetualain sipo' emi, do? Ta bisa fa! Nau natudu Atoran esa, fo tao na emi malole mo Manetualain, do? Bate mae Manetualain sipo' emi, nana huu emi tao hihii-nanau' malole, do? Ta bisa fa! Ita bisa tatudu noi Atoran fo nae, Manetualain sipo' ita nana huu tamahere Yesus. Noi ri naa' so!
28 Huu ria naa, besa' ia ita bubulu' leo ia': lahenda bisa malole no Manetualain, nana huu ara ramahere Ni, ta huu ara tao tuka Ria Atoran Na.
29 Au atane leo ia': Manetualain sipo' noi lahenda Yahudi ra, do Ana sipo' lahenda feke' ara boe! Tebe! Ana sipo' basa-basan!
30 Manetualain noi esa' a. Ma Ana sipo' noi eno' esa, fo ita lahenda dae-bafo' a bisa malole to Ni, nana ri' ita tamahere Kristus. Eno' ria ri', soa-neu' lahenda Yahudi ma lahenda ta Yahudi.i
31 De au atane leo ia': kalu ita tamahere Kristus, sona ose heni Manetualain Atoran Na, do? Ta'a! Matetu na, tamahere Kristus ri' tao tatetea Manetualain Atoran Na.