Manetualain namanasa no lahenda nusa Yahudi fo Ana here naa si a
2
O mamanene la'e-neu' bisinaa' a tadalu rupa' ara, hete? De bate o afi mae, “Lahenda sira tadalu nara talalu!” Kalu o afi leo naa', sona mataneneu! Huu fo o tadalu' leo naa' boe. Huu ria naa, o ta hapu eno' fo masala'e ao ma, leo mae o nana, bea. Kalu o mae lahenda feke' ara tadalu' a ma naraa hapu huhuku', boso' mafarene henin mae, o sale selu' ao-ina heheli ma. Huu fo o tao sala' leo' naa boe!a 2 Tehuu ita bubulu', kalu Manetualain huku lahenda mana tao tadalu' ara, tantu Ana naetu' sira dedea no matetu'. 3 Do, leo' bea? Bate o afi mae, “Lahenda mana tao tadalu' ara, naraa hapu Manetualain huhuku Na.” Sekonaa te o tao tadalu' sama leo' sira boe. Tehuu o afi mae, “Manetualain huhuku Na ta la'e au.” Dudu'a-aafi leo naa' a neme bea' mai?4 Manetualain natudu dale malole Na neu' o. Ma Ria sabar la'e-neu' o nonoi-tataom. Tehuu ubea' taon, de o mete Ni muni' mata i'o ma? Bate o ta bubulu' Ana natudu dale malole ina Na neu' o, fo foa ela sala-siko mara, ma matafali leo Ria muu.
5 Tehuu o laka batu', ma ta nau mamanene! Ma o ta nau foa ela sala-siko mara bai' boe'! De o tao ma huhuku-lalakem boe-boe nambera. Huu fo kalu dae-bafo' a noe, neu' ko Manetualain uku-sudi basa lahenda ra soda na. Ma neu' ko basa lahenda ra bubulu' Manetualain naetu' lahenda dedea na no matetu'. Tepo' ria, te Ana huku o bera' a, nana huu Ana ta sipo' o nonoi-tataom. 6 O masoda ma leo bea', sona neu' ko Manetualain balas tuka o nonoi-tataom.b
7 Lahenda fo tao naroo hihii-nanau' malole, neu' ko Ana fee si soda matetu' mana basa taa'. Sira si' sipo hada-horomata, nade malole, ma rasoda ro Ni la'o naroo. 8 Tehuu Manetualain ta sipo' lahenda fo ri' tao tadalu'. Ana namanasa matetu' no si, huu fo ara ralela' noi nalena-laka'. Ara ta tao tuka hihii-nanau' roo-tetu', ara tao tuka noi tadalu' a.
9 Basa lahenda mana tao tadalu' ara, neu' ko hapu susa ma soe. Leo mae lahenda Yahudi, do ta Yahudi, basa si hapu bela'.c 10 Tehuu basa lahenda mana tao hihii-nanau' malole, neu' ko Manetualain nadedema si, ma fee hada-horomata neu' asa, ela rasoda no tetu-tema' ma mole-dame. Leo mae sira lahenda Yahudi, do ta Yahudi, basa si hapu bela'. 11 Huu fo Manetualain ta mete mata'!d
12 Manetualain Atoran Na, la'e basa lahenda ra. Kalu lahenda fo ta nalela' Atoran ria, ana tao sala', neu' ko bika-bati neme Manetualain mai. Ma kalu lahenda fo nalela' Atoran ria, tehuu ana tao sala', neu' ko Manetualain pake selu' Atoran ria, fo naetu' ria huhuku na. Sira boe neu' ko bika-bati reme Manetualain mai, nana huu ara ralena laka neu' Ria Atoran Na. 13 Kalu nau malole mo Manetualain, ta noi ri' mamanene Ria Atoran Na fo dai. Huu fo lahenda muste tao tuka Ria Atoran Na, besa' ko Ana sipo' asa. Boso' noi mamanene' a!
14 Leo mae lahenda fo ta Yahudi, ara ta ralela' Manetualain Atoran Na isi-liin, tehuu neme sira mai, ruma tao tuka Atoran ria. Huu fo sira dale nara ri' nafada fee si, bea ri' matetu' ma bea ri' sala. 15 No ria naa, ara ratudu rae, Manetualain Atoran Na mana dui' nai sira dale nara, sama leo' abas fo Manetualain tenu ni nai dale nara. Sira dale nara si' uku-sudi hata fo ara tao ni a. Sira dudu'a-aafi mesa nara ri' rameda raan rae, ara tao sala' do, tao roo-tetu'. 16 De kalu dae-bafo' a noe, sona neu' ko Manetualain so'u Yesus Kristus dadi Mana Ee Dedea', Ana parisa' nalulutu' hihii-nanau' nino fo nafuni' nai lahenda dalen. Au anori-afada leo naa', sama leo' Manetualain Tutui Malole Na.
Leo mae lahenda Yahudi ra tao tuka Manetualain Atoran Na, tehuu ria ta po'i-tata' naa si
17 De emi lahenda Yahudi ra, leo' bea? Emi mahii' io ao mara mae, noi emi homu Manetualain Atoran fo ri' Ana naondan tuka ba'i Musa? Emi boe maloloa bafa mara la'e-neu' emi tututi-nanatom mo Manetualain. 18 Tebe! Emi bubulu' Manetualain hihii-nanaun. Emi bubulu', bea ri' malole a naan seli. Emi bubulu' basa hihii-nanau' ia ra, nana huu mesen nara ranori-rafada emi neme Manetualain Atoran Na mai. 19 Emi mamahere ao-ina mara mae, emi bisa matudu eno' fee lahenda fo ta bubulu' nae leo bea' neu. Emi tao ao mara sama leo' makaledo' a nahaa soa-neu' basa lahenda fo nasoda nai maiu' dale'. 20 Huu no emi homu mahere Manetualain Atoran Na, de emi afi mae malela' basa-basan, ma emi homu basa-basan fo matetu' aa? Huu ria naa, afi mae emi bisa manori-mafada lahenda pakanaa' a ma ana aana' fo ta nalela' hata-hata esa boe'.
21 De au atane leo ia': emi mahii' manori-mafada lahenda feke' ara, tehuu ubea' taon de emi ta nau manori hata-hata esa boe'?! Emi meu' kas lain, sona pareta mae, “Lahenda boso' namana'o.” Tehuu ubea' taon de emi mamana'o?! 22 Emi manori-mafada mae, “Boso' hohoke.” Tehuu ubea' taon de emi hohoke?! Emi ete' ao mara mo hata sosoko' a, tehuu ubea' taon de emi mamana'o hata-heto neme uma sosoko' a mai?! 23 Emi dedea maloloa bafa mara la'e-neu' Manetualain Atoran Na, tehuu ubea' taon de emi malena-laka neu' Atoran ria, ma tao mamamae' Manetualain leo' naa?! 24 Huu fo neme fai a ulu' na, mana dui' nai Manetualain Susura Makamoi Na nae, “Huu no emi lahenda Yahudi ra tadalu mara, de lahenda feke' ara radadae Manetualain nade malole Na.”e
Leo mae lahenda Yahudi ra sunat, ria boe ta po'i-tata naa si
25 Emi lahenda Yahudi ra muste sunat tuka Manetualain Atoran Na, hete? Mema' emi sunat. Sunat ria dadi tanda nae, emi manuu haak sipo Manetualain hehelu-barataan. Kalu emi sunat, tehuu malena-laka neu' Manetualain Atoran feke' Nara, sona Manetualain ta sipo' emi. Emi dadi sama leo' lahenda ta Yahudi, fo ri' ta parnaa sunat. 26 Afi matalolole! Kalu lahenda fo ta sunat, tao tuka Manetualain Atoran Na, neu' ko Manetualain sipo' ana, sama leo' ria nana lahenda Yahudi fo ri' sunat, hete? 27 Tehuu, besa-besa! Huu no lahenda fo ta Yahudi, ara ta tao tuka Manetualain Atoran Na fo sunat, neu' ko ara ratudu ubea? Ara ratudu emi sala mara nae, emi lahenda Yahudi fo ri' sunat a, malena-laka Manetualain Atoran feke' Nara, leo mae emi bubulu' Atoran sira neme fai a ulu na mai.
28 Boso' afi mae, lahenda fo ri' ba'i Abraham tititi-nonosin, ma sunat nai rou na, ria ri' tao naan dadi neu' Manetualain lahenda matetun. Ta'a! 29 Dadi Manetualain lahenda matetun, nana ri' lahenda fo malole no Manetualain. Sunat matetu', fo tao na lahenda dadi Manetualain anan, nana ta ri' tanda nai rou na, tehuu tanda nai dalen, fo ri' Manetualain Dula-dale Na tao a. Manetualain io lahenda dae-bafo' rupa leo naa', ta lahenda dae-bafo' a io.f