Nai pulu Malta
28
Ami basa losa mada' lain no soda', besa' ko ami bubulu' ria nana pulu Malta. 2 Nusa' ria lahenda nara sipo' ami no malole. Huu no uda ma masufu na seli, de ara ratutu' ai nai tasi suu', ara hule ami mamaneru ai. 3 Paulus boe tuka neu hehere ai fo tutu'. Ana fua ai natutu' ara reu' ai-pila' lain, kekeneu te, meke manuu raso esa lodo mai, huu no ai-pila' ria nahaa na, boe ma meke ria aa na Paulus lima na diti nahere. 4 Lahenda Malta ra rita meke manuu raso' a diti nahere Paulus lima na, boe ma esa dedea no esa rae, “Lahenda ia, tantu lahenda kanisa'. Leo mae ana lui na aon neme nafa-ani mai, mema' ria ua-nalen leo naa'. Te bea ri' tao sala', ria muste lepa na selu' ana, de ta bisa nasoda so'.” 5-6 Lahenda sira afi rae, selu' bai' te Paulus lima na peta ma kekeneu te mate ni.
Tehuu Paulus nala pisi heni meke ria leo ai-pila' lain neu, ma ana ta nameda hedis bai' boe'. Lahenda sira rahani doo-doo, tehuu Paulus lima na ta nasala hata esa boe', de ara afi rae, “Bate ria nana dewa!”
7 Gubernor uma nara ma dae maloa na, ta doo' a neme mamana' ria mai. Gubernor ria, nade Publius, mai soru' ami nai tasi suu', ana hule ami leo lalai nai ria uma na. Nai naa, ana urus ami fai' telu.
8 Fai ria, gubernor papa boki na namahedi ao luumai', ma ana sali-sali mesan. Paulus neu dama ni nai kaman dale', de fua lima na neu' lahenda kamahedis ria ma hule-haradoi feen, boe ma te'e na aon. 9 Ara rita gubernor papa na te'e aon, boe ma lahenda kamahedis feke' ara leo Paulus mai, ara hule ni puli na si. 10a Lahenda sira ratudu dale makasi nara, de reni hata parseen dodou-ina' fee ami.
Paulus asa reme Malta mai, leo Italia reu
10b-11 Ami leo nai Malta bula' telu, losa' basa fai nafa-ani. La'e fai nafa-ani ria, ofa' esaa neme Aleksandria mai nafu nai pulu ria. Ofa' ria nade ‘Ana Kadua'’, nana huu ara pasa' patung dewa ana kadua' nai ofa laka'. Ami nau sa'e ofa' ria leo Roma meu. Ami saka' sa'e, boe ma lahenda Malta ra reni fee ami tua-lepa ma hata feke' fo ri' ami parluu nai ofa' lain.
12 Ami ofa ma bai-bai, losa kota Sirakusa nai pulu Sisilia, de nafu nai naa fai' telu. 13 Neme naa' mai, ami tuka-tuka tasi' Sisilia suu na, ami losa kota Regium. Balahaa', ani onas a fufuu na nasa' a, de ami ofa ma lai' mesan. Binesa' boe ma ami losa kota namo-sesee' esa, nade Putioli. 14 Nai naa, ami onda ofa' ria, de ami meu saka Yesus lahenda nara. Ami maneta mo si, boe ma ara hule ami leo mo si. Ami leo mo si mamaso' esa, boe ma ami moi lako' a leo Roma meu.
15 Yesus lahendan fo rai Roma ramanene ami saka' leo naa' meu, boe ma ara mai soru' ami nai eno talada'. Ruma hapu ami nai Pasar Apius; ruma hapu ami nai mamana' esa, nade Pasanggrahan Tiga.b Paulus nita si, boe ma ana hule makasi dodou' neu' Manetualain, ma dale na tama.
Paulus nai Roma
16 Losa Roma, boe ma [soldadu ra ena lahenda mana huku' ara reu' bui dale']c tehuu Paulus sona ta'a. Ara fee ni seba uma. Nai naa, ana leo no soldadu esa ela nanea nahere ni. Ara heke rabua dua si lima nara bei esa' pake rante.d
17 Basa fai' telu, boe ma Paulus naloo lasi' Yahudi fo rai naa mai dama ni. Ara tesa boe ma nafada si nae, “Basa toranoo kara emin! Au nai ia, nana huu lahenda Yahudi ra malaka nara hopu ra au nai Yerusalem. Ara fee au leo mana pareta Roma uu. Sekonaa te au ta asala' hata esa boe'! Au ta alena-laka neu' ita nusa na, ma neu' atoran hadas fo ri' ita sipo neme ita bei-ba'in. 18 Mana pareta parisa' au dedea ka nai naa, tehuu ara ta hapu sala' esa boe', fo naraa huku raisa au. Huu ria naa, ara nau po'i au. 19 Tehuu no lahenda Yahudi ra malaka nara ta sipo' mana pareta naeetun ela po'i au, huu ria naa, nau do ta nau, au muste aae' dedea' ia leo nusa' a huu na mai. Au tao leo naa', tehuu au ta anuu dale' kolaa' au nusa ka.e 20 Huu no dedea' ia, de au abua a toranoo ara nai ia, ela ita bisa dedea-rao' la'e-neu' hata fo lahenda Yahudi ra rahani; ri' ita basa tamahehena' Mane' fo Manetualain feen mai ela po'i-tata na ita lahenda nusa' Israel. No eno' ria, ara heke au pake rante ia.”
21 Ara rataa rae, “Losa besa' ia, ami bei ta sipo susura' esa neme Yudea mai fo tui toranoo' a dedea ma. Leo' naa boe, ta hapu toranoo' esa neme naa' mai, tui hata-hata esa la'e-neu' toranoo' Paulus. 22 Tehuu ami mahii' mamanene hata fo toranoo' a mamahere, nana huu ami mamanene nai basa mamana ain rae, lahenda ra ta sipo' hata fo partei Kristen ara ranori-rafada. Tehuu tea na ri' ubea', ami bei ta bubulu', de toranoo' a mafada fee ami dei.”
23 Boe ma basa si rala hara', here ra fai' esa fo rabua selu'. Losa fai na, boe ma lahenda dodou' mai tesa nai Paulus uma na, de ana tui fee si Manetualain pareta Na, neme balahaa anan ria losa ledo leodae'. Ana hain neme ba'i Musa susura na isi na, ma neme Manetualain mana nesi mata feke nara susuran, fo nau lea-nore si ramahere Yesus.
24 Ara ramanene basa Paulus dedea na, boe ma ruma ramahere, tehuu ruma ta ramahere. 25 Ara ralelena ao' esa no esa, losa' ruma fali reu si. Tehuu Paulus dedea nae, “Tebe emi malelena ao' ia, natetu na hata fo fai a ulu na Manetualain Dula-dale Malalao-malalafu Na nafada ba'i Yesaya 26 nae,
‘O muu mafada nusa' Yahudi ia mae,
“Neu' ko emi mamanene Au dedea Ka la'o naroo,
tehuu emi ta bubulu' bai' boe'!
Emi mita la'o naroo hata fo Au taon,
tehuu emi ta tao dale' neu.”
27 Nana huu nusa' ia dale nara tea-mepe.
Ridoo nara ta ramanene!
Ma mata nara ta rita!
Neme' naa ela boso' ramanene;
Ma neme' naa ela mata nara boso' rita.
Ma neme' naa ela dale nara poke raroo leo.
Losa' ara ta bubulu' eno' ratafali leo Au mai,
De tao leo bea' fo Au bisa puli a si?’”f
28 Paulus nate'e dedea na nae, “Leo ia', toranoo kara! Emi muste bubulu' besa' ia Manetualain sadia po'i-tata lahenda nusa' fo ta Yahudi, nana huu sira ramanene neu' Ana.” 29 [Paulus dedea basa nae leo' naa, boe ma lahenda sira fali reu si. Ara ralelena ao' esa no esa, nana huu sira esa' ko dudu'a-aafin].g
30 Paulus leo teu' dua nai uma fo ana seba a. Basa lahenda fo mai dama ni a, ana sipo' asa no namaho'o.
31 No ria naa, ana hapu lela' fo tui fee si Manetualain pareta Na, ma nanori-nafada si Ramatua Yesus Eno Masoda Na. Ana naparani dedea leleka', ma ta hapu hata esa namakee ni boe'.
Papa Teofilus malole! Au tutui ka te'e naa' so.
Makasi.
Neme au, Lukas