Lahenda Yahudi ra mai radedea ro Paulus nai Kaisarea
24
Basa fai' lima, boe ma lahenda Yahudi fo ri' radedea ro Paulus a, ara losa kota Kaisarea. Lahenda sira ro Ananias, malaka agama Yahudi malaka bau-ina na, ma malaka feke' ara boe. Ara ro lahenda malela dedea' esa, nade Tertulus. Ara pake ni dadi sira mana nesi matan fo soa' Paulus. 2-3 Fai ria basa si tesa rai mamana parisa dedea' a, boe ma gubernor nadenu fo roo Paulus leo dale' neu. Tertulus foa napadei, fo saka' kolaa' Paulus. Ana fee hada-horomata neu' gubernor ma ana dedea nae,“Papa gubernor, fo au hada-horomata! Doo-naru basa ia, mulai neme papa pareta nai ia, papa bubulu maulu' hata malole ubea' soa-neu' ami. Ma papa tao hihii-nanau' malole dodou', losa ami lahenda Yahudi a leo no mole-dame, namaho'o ma tesatei-tamadale'. De ami pake ledo-fai ia fo ami hule makasi dodou' neu' papa gubernor. Bea ri' bei sama leo' papa fo tao malole nai basa mamana' ain. 4 Au ta ananaru dedea ka so', au aroon leo dedea' a isi na neu. De au hule papa nenene matalolole hihii-nanau' fo au afadan la'e-neu' Paulus ia.
5 Leo ia' papa. Soa-neu' ami lahenda Yahudi, Paulus ia sama leo' hedis nafudi ao', neme esa mai leo esa neu. Ana nalena-laka ami agama ma, ana tao kaco ami hadas ma nai basa mamana' ain. Ana neu bea, sona lahenda Yahudi ra esa nadedea no esa. Ria mauli-malaka fufudi-lele'o neme partei agama fo ri' tuka lahenda esa neme Nasaret mai, ami mae ‘partei Sarani'’. Tehuu hata fo ara ranori-rafadan a, sala no ami nanori agama ma. 6 Lahenda ia, soba tao nakekeo-nakakanu ami Uma Mamaso Yahudi Ina lalao-lalafu' a, ma ana noo lahenda dintiu' leo dale' reu. Huu ria naa, ami hopu maan. [Tuka ami hihii-nanaum, huku ni pake ami atoran ma. 7 Tehuu komendaan Lisias po'i naan neme ami lima mara mai. 8 Ana pareta nae, kalu bea nau nadedea no Paulus, sona ara muste kolaa' leo papa mai nai Kaisarea. Ria maksud na, ela gubernor parisa' matan dedea' ia].a De besa' ia ami leo ia' mai, ela papa parisa' dedea' ia. Neu' ko papa ri' bubulu' basa-basan fo ami dedea ia, mema' tebe.
Noi ri naa' so papa. Makasi.”
9 Tertulus dedea basa nae leo' naa, boe ma lahenda Yahudi feke' ara rataa tuka ria dedea na rae, “Tebe papa! mema' leo naa'!”
Paulus nasala'e aon nai Feliks matan
10 Boe ma gubernor nafada Paulus nae, “Besa' ia, au fee o lela' fo masala'e aom.”
Paulus napadei, de ana dedea nae, “Papa gubernor! Doo-naru basa ia, papa pareta nai ami propensi ma. De papa bubulu' matetu' ami lahenda Yahudi a natuu-napadeim. Huu ria naa, au ta bii' asala'e ao ka nai papa mata ma. 11 Bate fai sanahulu dua maneu' a, au leo Yerusalem uu hule-haradoi nai Uma Mamaso Yahudi Ina. Papa bisa matane lahenda fo fai' naa hule-haradoi ro au a. 12 Nai Uma Mamaso Yahudi Ina a, au ta asisipo' bafa' o esa boe'. Ma nai uma mamaso feke' ara, au ta abua a lahenda fo ara tao kaco. Leo' naa boe nai Yerusalem, au ta tao tasibu' hata esa boe'.
13 Besa' ia, lahenda ia ra nau ratuda au, tehuu bisinaa' a ara dedea basa hata sira nana butin ta'a. 14 Leo ia', papa gubernor. Au muste manaku hihii-nanau' esa neu' papa. Au tuka partei bebeu' esa fo ri' lahenda rae, ‘Ramatua Yesus Eno Masoda Na’. Au hule-haradoi neu' Manetualain, sama leo' au bei-ba'i kara hule-haradoi neu' Ana, au tuka ba'i Musa atoran nara katema', ma au amahere tebe-tebe hata fo Manetualain mana nesi mata fai ulu nara dui' elan fee ami. 15 Au amahena neu' Manetualain, sama leo' lahenda ia ra, fo ri' besa' ia rapadei' rai ia radedea ro au. Ami mamahere neu' ko Manetualain fee lahenda mana mate' ara rasoda selu': leo mae lahenda roo-tetu' do lahenda tadalu'. 16 Huu ria naa, au aule tao leo bea' fo asoda roo-tetu' nai Manetualain ma lahenda dae-bafo' a matan. No ria naa, lahenda ta bisa ratuda au.
17 Au oi-tao teu' hida nai dae Israel dea', besa' ko au fali Yerusalem uu. Fai fo au fali a, au uni doi' fo ri' lahenda rabubua ra, ela tulu-fali lahenda manato'a-manataa' ara. Au leo Uma Mamaso Yahudi Ina dale' uu hule-haradoi, ma nai naa au fee tutunu-hohotu' rupa' neu' Manetualain. 18 Fai fo au tao makamoi ao' ka, nai Uma Mamaso Yahudi Ina tuka ami atoran ma, boe ma ara mai hopu au. Tehuu fai ria, lahenda ta dodou' ma ta hapu esa tao kaco nai naa boe'!b 19 Nai naa noi lahenda Yahudi hida reme propensi Asia mai hule-haradoi. De kalu ara radedea ro au, sona muste sira si' radedea ro au nai ia, ta lahenda ia ra fa! 20 Tehuu lahenda sira ta mai fa. De papa matane sudi lahenda ia ra, au sala ubea'? Fai' naa ra, ara parisa' au nai mamana parisa dedea agama, ara ta hapu au asala hata esa boe'. Papa matane si. 21 Bate noi hihii-nanau' esa ri' tao na si kaco, ma ta rahii' rita au mata ka. Huu ria naa, au dedea no hara bera' ae, ‘Emi nau huku au, nana huu au amahere Manetualain fee lahenda mana mate' a nasoda selu'!’”c
22 Paulus dedea nae leo' naa, Tehuu gubernor Feliks bubulu' dodou' la'e-neu' ‘Ramatua Yesus Eno Masoda Na’, boe ma ana ta parisa' naru'u dedea' a ma nae, “Leo ia'! Au saka' aloo komendaan Lisias mai fo amanene ria tutui na dei. Kalu au dedea oo ni sona, besa' ko au aetu' dedea ia.” 23 Boe ma ana nadenu malaka soldadu esa no Paulus neu ena ni. Tehuu ana pareta fo fee Paulus fai lela' bai', ma boso' horo Paulus tia-lai nara mai ralalau' ana.
Paulus dedea no Feliks ma saon Drusila
24 Gubernor Feliks sao na lahenda Yahudi, nade Drusila. Basa fai' hida, boe ma ana saka fai lela', ela no sao na dedea ro Paulus. De nadenu roo Paulus neu nataa dua si. Boe ma Paulus nafada si eno na leo bea', de lahenda ramahere Yesus Kristus Lahenda fo ri' Manetualain helu mema' neme fai a ulu na mai. 25 Ria boe nafada eno na leo bea', de lahenda nasoda roo-tetu', lahenda bisa nanea ao-ina na fo boso' tao sala', ma nafada nae, neu' ko Manetualain huku basa lahenda ra.
Feliks namanene leo' naa, boe ma ana bii naan seli, de nafada Paulus nae, “Paulus! Dai so. Te'e ada' naa leo! Kalu hapu fai lela', neu' ko au aloo selu' o.” 26 Fai ria, Feliks saka eno' ela Paulus loo feen doi', fo po'i ni, huu ria naa, ana naloo Paulus la'o naroo fo dedea noon.
27 Tehuu nai eno' esa bali, gubernor Feliks hai lahenda Yahudi malaka nara dalen. Huu ria naa, ana ta naetu' lalai' Paulus dedea na. Ana ena nahere Paulus losa teu' dua. Boe ma gubernor bebeu' esa, nade Porkius Festus, kati Feliks. Tehuu ara bei ena rahere Paulus.