Paulus asa fali propensi Makedonia reu
20
Fai fo lahenda kota Efesus ta kaco so', boe ma Paulus naloo na lahenda kamahere' fo rai naa, de ana natetea dale nara. Boe ma ana nate'a, fo leo propensi Makedonia neu. 2 Nai naa, ana la'o rule-feo koro' ara, fo natetea lahenda kamahere' ara dale nara. Ana tao leo naa', losa leo nusa Yunani neu. 3 Ana leo nai naa losa bula' telu. Basa de nahehere aon, fo sa'e ofa' leo propensi Siria neu, tehuu namanene rae, lahenda Yahudi ra rala hara' fo nau raisa ni, de ana ta nau sa'e ofa' leo propensi Siria neu. De ana fali selu' naroo propensi Makedonia.4 Lahenda bubua' esa tuka Paulus. Lahenda sira nana Timotius; papa Pirus anan Sopater lahenda kota Berea; lahenda kota Tesalonika dua, si' Aristarkus ma Sekundus; lahenda kota Derbe esa, nade Gayus; ma lahenda propensi Asia dua, si' Tikikus ma Trofimus.
5-6 Boe ma au (Lukas, mana dui' susura' ia), abua selu' oo Paulus, nai kota Filipi nai propensi Makedonia. Lahenda fo ri' sama-sama ro Paulus a reu raulu', rahani ami nai kota Troas, nai tasi seri'. Basa lahenda Yahudi ra fai malole Paska na,a boe ma ami dua sa'e ofa' leo kota Troas meu, ami nai tasi' lain fai' lima. Losa kota Troas, boe ma ami onda de mabua selu' mo ami nonoo feke mara, de leo mo si mamaso' esa.
Nai kota Troas, Yutikus tuda neme jandela lain mai
7 Fai ria la'e fai Mamaso'. Paulus naetu' naan nae, “Toranoo kara! Balahaa' te au la'o so.” De ami lahenda kamahere' ara, mabua fo mia-minu. Huu fo ana saka' la'o, de Paulus dedea noo si losa' fatilada. 8 Ami mabua nai uma esa tada katelu na lain. Hatun ria ara dede bandu' dodou'.
9 Fai ria, tou muri-ana' esa, nade Yutikus,b natuu' nai jandela lain nenene Paulus dedea-nafadan. Tehuu doo-doo boe ma ana teau', de suku nenin. Kekeneu te ana tuda neme jandela lain mai, de mate tuti' ana. 10 Boe ma Paulus onda, de holu naan ma dedea nae, “Boso' bii' te ana nasoda.” 11-12 Ami basa mamaho'o, nana huu tou muri-ana' a nasoda selu', de ara roo ni leo uma na neu. Basa de ami ae selu' leo uma a tada lai na meu, de ami matuu' mia-minu meu' esa. Paulus dedea naroo losa' malua. Ledo a tii boe ma ami mate'a, nana ami saka la'o.
Reme kota Troas leo kota Miletus reu
13 Boe ma ami mala hara', fo esa ko la'o matan losa' ami maneta nai kota esa, nade Asos. Ami sa'e ofa' leo Asos meu, tehuu Paulus noi lako' a leo naa' neu.
14 Fai fo ami maneta mo Paulus nai Asos, boe ma ana no ami sa'e ofa' leo kota Metilene meu. 15 Neme Metilene mai, ami sa'e ofa' maroo, balahaa' boe ma ami manenea' pulu esa, nade Kios. Binesa' boe ma ami maroo leo pulu Samos meu. Bardema boe ma ami losa kota Miletus. 16 Tehuu Paulus nahii' lai-lai losa Yerusalem, ela ana tuka fai malole Pentakosta nai naa. Ana ta nau tutu'u ledo-fai leo kota Efesus neu, nana huu ta hapu lela' so'.
Paulus dedea no lasi' Kristen rai kota Efesus
17 Nai Miletus, Paulus fee hara' leo lasi' Kristen rai Efesus fo mai dama ni. 18 Ara losa, boe ma Paulus nafada si nae, “Toranoo kara emin! Emi bubulu' au masoda ka, mulai neme masososa na au molo ei ka nai propensi Asia, losa' besa' ia. 19 Emi boe bubulu' au oi-tao sota aan seli nai emi talada, tehuu au ta koao. Nai au nonoi-tatao ka, au luu ka tuda ma au lepa susa dodou'. Au hapu doidoso dodou' neme lahenda Yahudi ra dale tadalu nara. 20 Au anori-afada emi basa-basa hata malole fo ri' au bubulu'. Au anori-afada mata' emi ma kodi emi esa-esa uma mara, fo afarerene' fee emi Ramatua' a hihii-nanaun. 21 Au boe afada lahenda Yahudi ra, ma lahenda ta Yahudi ae, ara muste saledale-tu'etei nara, fo ratafali tuka Manetualain. Ma ara muste ramahere Ramatua Yesus fo ri' nanuu haak pareta ita.
22 Au afada emi leo ia': besa' ia au saka' leo Yerusalem uu, nana huu Manetualain Dula-dale Na noo au leo naa' uu. De au tuka, leo mae au ta bubulu' neu' ko hata ubea' dadi soa-neu' au nai naa. 23 Tehuu neme kota esa mai leo kota esa neu, Manetualain Dula-dale Malalao-malalafu Na nafada naulu' au nae, neu' ko au maso' bui, ma lepa doidoso dodou' nai naa. 24 Au bubulu' matetu' leo naa', nana huu Ramatua Yesus fua fee au nonoi' ia nai au aru ka, fo tui-beka Tutui Malole ae, Manetualain sue-lai ita, ma dale Na malole a neu' ita. Kalu au ta tuka Ria hihii-nanaun, fo oi-tao abasa Ria nonoi Na, au ameda aan au masoda ka sosoa-raraa taa'.c
25 Besa' ia, au bubulu' ta hapu esa neme' emi fo ri' au anori-afadan ela dadi Manetualain kileo-bobokin, neu' ko ta nita au so'. 26-28 Huu ria naa, nenene matalolole. Au abasa nonoi-tatao ka neu' emi so. De besa' ia, emi muste moi-tao maroo. Kalu lahenda neme emi mai, ta dadi Manetualain kelio-bobokin, sona emi ri' lepa-masaa maan! Huu fo au sala ki ta ria so'. Mafarerene' matalolole! Au afada mema' basa Manetualain hihii-nanaun neu' emi. Au ta afuni emi hihii-nanau' esa boe'. De emi muste manea matalolole masoda mara, ma maboi-masamao basa lahenda fo ri' Manetualain Dula-dale Malalao-malalafu Na nadenu emi manea si a. Boso' mafarene henin te Ramatua Yesus mate, de tifa etu lahenda sira neni' Ria daa Na. Ria boe tudu na emi fo relu-matanae si, sama leo' mana foo a foo-lolo ria bibi-lopo nara.
29 Besa' ia, au foa ela emi ria' so. Tehuu mafarerene'! Neu' ko lahenda mai ranori-rafada rafarara'u nai emi talada, sama leo' busa ma'aa' a kodi leo bibi-lopo a okan dale' neu. 30 Lahenda masarole-masarali' sira reme dea' mai. Tehuu mafarerene', ruma toda reme emi talada mai, ara ranori-rafada ta matetu' soa-neu' emi. Ara nau lahenda tuka noi sira. Huu ria naa ara soba-soba hela lahenda ra, fo boso' tuka Yesus. 31 Huu ria naa, emi muste manea matalolole ao mara. Boso' mafarene henin, te au leo sama-sama oo emi losa teu' telu. Au anori-afada emi hatu-leledon, au ta afi sosota ka, ma au luu ka tuda nana huu emi.
32 Besa' ia, ita tasida' ria' so. De au fee emi basa neu' Manetualain lima dale Na, ela Ana naboi-nasamao emi. Ma emi muste homu mahere basa hata fo au afadan neu' emi neme masososa na la'e-neu' Manetualain dale malole Na. Manetualain nanuu kuasa natetea emi. Ana helu fee ua-nale' neu' Ria lahenda nara. De kalu emi tuka mahere Ni no dale lalao-lalafu', tantu emi hapu Ria ua-nalen.
33 Tepo' fo au oi-tao nai emi talada, au ta hai emi hatam esa boe'. Au ta hule emi lilo pilas, lilo fula', kakao-papake', do sudi ubea'. 34 Emi boe bubulu', tepo' fo au leo oo emi a, au oi-tao sota aan seli, ela bisa asoda. Ta soa-neu' au mesa' ka, tehuu au oi-tao soa-neu' basa lahenda fo ri' tuka au. 35 De no basa hihii-nanau' ia ra, au atudu eno' ela emi boe tulu-fali lahenda manato'a-manataa' ara. Mafarerene matalolole Ramatua Yesus dedea Na nae, ‘Malole lena' ita fee, lena heni ita sipo.’”
36 Paulus dedea basa leo naa', boe ma sunda' undulaka na, de basa si hule-haradoi, ela Manetualain relu-natanae si. 37-38 Basa si dale nara hedis a, nana huu Paulus dedea nae, neu' ko ara ta rabua ro ni so'. De saka rasida', boe ma ara holu ra Paulus ma de'i ni, ma dola rasae'edu. Basa boe ma ara rafuli amid leo ofa' lain meu.