2 Ana natane si nae, “Toranoo susue kara. Fai naa ra, emi mamahere Ramatua Yesus a, emi sipo Manetualain Dula-dale Malalao-malalafu Na boe, do taa?”

Ara rataa rae, “Ta'a! Ami bei ta mamanene rae, Manetualain nanuu Dula-dale leo naa'.”

3 Boe ma Paulus natane selu' nae, “Kalu leo' naa, sona ara sarani emi pake sarani leo bea'?”

Ara rataa rae, “Ara sarani ami tuka Yohanis sarani na.”

4 Paulus nafada si nae, “Nenene dei! Yohanis sarani lahenda fo dadi tanda nae, ara saledale-tu'etei nara. Tehuu mafarerene' leo ia'! Tuka-tuka fai', ana nanori-nafada lahenda Israel ara nae, ara muste ramahere Yesus, Lahenda fo ri' neu' ko Manetualain fee Ni mai.”^a

5 Ramanene leo' naa, boe ma ara hule fo ana sarani si, ela dadi Ramatua Yesus kileo-bobokin. 6 Fai ria Paulus lalaa lima na neu' asa, ma hule-haradoi, boe ma Manetualain Dula-dale Malalao-malalafu Na onda neu' asa. Ara mulai dedea pake dedea rupa', fo ri' ara bei ta parnaa bubulu'. Ma Manetualain pake si, ela rafada hata fo ri' neu' ko dadi. 7 Basa si, lahenda sanahulu dua.

8 Tepo' fo Paulus leo nai kota Efesus, ana biasa leo lahenda Yahudi ra uma mamason dale' neu, nanori-nafada lutu-lutu la'e-neu' Manetualain pareta Na. Ana dedea ta pake bibila-babaa' losa bula' telu. 9 Tehuu lahenda ruma ta sipo' ria nanori-nafadan, de ara ralelena ao' roon ma duduku-papau' lahenda rai naa, ela boso' tuka Yesus Eno Masoda Na. Huu ria naa, Paulus no lahenda kamahere' ara la'o ela uma mamaso' ria. Ara reu rabua ao nara rai uma sakola esa. Manuu uma' a nade Tiranus. 10 Paulus nanori-nafada si leo naa' losa teu' dua; de basa lahenda Yahudi, ma lahenda ta Yahudi rai propensi Asia, ramanene Ramatua Yesus Tutui Malole Na.

11 Tepo' ria, Manetualain fee Paulus kuasa, fo tao tanda heran bau-ina rupa'. 12 Conto leo-leo' kalu lahenda hule ra Paulus hata fefeo laka na, do tali-ee na, fo ara tao hata sira reu' lahenda kamahedis ara, sona te'e ra ao nara. Losa' nitu makaresi' ara boe kalua ela lahenda ra.

13-14 Nai naa, malaka agama Yahudi esa, nade Sakewa, no ana toun hitu. Sakewa ana nara biasa usi kalua nitu makaresi', reme lahenda mai nai basa mamana' ain. Ara soba-soba usi nitu pake Yesus nade Na rae, “O malela' Yesus, fo ri' Paulus nafada a, do? Besa' ia, au pareta o pake Yesus nade Na, kalua meme lahenda ia mai leo!” Ma lahenda Yahudi malela' hida soba-soba tao leo naa' boe.

15 Lai' esa de Sakewa ana nara pareta leo naa', boe ma nitu makaresi' a sipo' nae, “Au alela' Yesus! Au alela' Paulus boe! Tehuu bea emi?” 16 Boe ma lahenda nitu heke' ria namanasa' naan seli. Ana bo'e nabuu si, popo'o nalololi' asa, tao na si hina-hina' mesan, ma sii nalutu badu nara, de ara ralai rahola' reme uma ria mai.

17 Mana dadi' ria tui-bekan, de lahenda Yahudi do ta lahenda Yahudi fo rai kota Efesus, basa si bubulu'. Basa lahenda fo ri' ramanene tutui' ria, ara bii ma heran. Ma ara io-oa Ramatua Yesus, nana huu Ana fee Paulus kuasa bau-ina'. 18 Lahenda fo besa' ko ramahere a, ara leo toranoo kamahere nara reu, fo po'a sala-siko nara. 19 Lahenda sira ruma pake kuasa maiu'. Boe ma rabubua ra susura kuasa maiu nara de hotu heni si. Kalu reke susura' sira beli nara, sona doi lilo fula' rifun lima hulu.^b

20 Boe ma lahenda ra tui-beka Manetualain Tutui Malole Na hatu-leledon nai basa mamana' ain, de lahenda kamahere' ara tamba dodou'. Nana huu Manetualain Hara-dasin lelea-nonoren raa dale nara.

21 Boe ma Paulus naetu' naan fali Yerusalem neu, tehuu nahii' naulu' leo propensi Makedonia, ma propensi Akaya, besa' ko naroo leo Yerusalem neu. Ana afi nae, “Malole lena' au uu dama lahenda kamahere' rai mamana' ia ra dei, leo mae leo' bea boe, au muste losa kota Roma.” 22 Ana nadenu nonoon dua, si' Timotius ma Erastus, fo raulu' leo Makedonia reu. Tehuu ria sona bei leo namanoso nai propensi Asia.

23 Tepo' ria, dedea' bau-ina' dadi nai kota Efesus la'e-neu' Yesus Eno Masoda Na. 24 Dedea' ria tute na, leo ia': nai naa, mana tutu lilo fula' esa, nade Demetrius. Ana biasa tao uma ana sosoko' neme lilo fula', fo se'o fee lahenda Efesus ara, ela ara soko sira dewin esa, nade Artemis. Huu no ria tutuka-sasakan laku naan seli, de ana pake lahenda mana noi dodou', de ana hapu doi' dodou'. 25 Lai' esa de Demetrius naloo na ria tukan nara, ma tukan feke' ara, basa si tesa boe ma ana dedea no si nae, “Papa kasa ma toranoo kara emin! Emi bubulu', ita masoda na dadi malole, nana huu ita hapu doi' dodou' neme tutuka-sasaka' ia mai. 26 Tehuu besa' ia, ita tita ma tamanene mata' Paulus dedea na. Ana duduku-papau' lahenda dodou' nae, hata fo ita tao ia, sosoa-raraa taa'. Ana nae, patung fo ita tao ia, nana noi dewa-dewi pepeko'.

Ta noi lahenda rai kota Efesus ramanene ni, tehuu basa lahenda rai propensi Asia boe ramanene. 27 De nenene matalolole! Neu' ko ita dadi ubea' bali, kalu lahenda dodou' tuka Paulus asa? Tantu lahenda ta asa ita uma ana sosokon ia ra so'! Mafarerene'! Besa' ia lahenda dodou' do'o-tabe neu' ita dewi malolen, Artemis. Nai propensi Asia katema', losa dae-bafo' a bukun haas, lahenda ra mai io-oa ni, nai ria uma sosoko ina na nai ita kotan Efesus. De boso' losa lahenda ta tao dale' neu' ana, ma ara ta leo ia' mai so'!”

28 Ara ramanene leo' naa, boe ma ramanasa, de ara rahara rae, “Io-oa Artemis! Artemis malole! Ita lahenda Efesus io-oa Artemis!” 29 Lahenda ra ramanene rahara leo' naa, boe ma ralai reme basa mamana' ain mai tesa reu' naa, losa' kota ria henu' no lahenda. Tehuu roi ramakokoa' a. Boe ma lahenda ra mulai tao kaco rolo eno' a, losa kota a moo loa na.^c Ara hopu ra lahenda dua, de hela roo si leo naa' reu. Lahenda sira dua, nana Gayus no Aristarkus. Lahenda ra hopu ra si, nana huu sira dua Paulus ana mana tuka dean reme Makedonia mai. 30 Paulus namanene, boe ma ana nau leo lahenda mana tao kaco sira talada neu, tehuu lahenda kamahere' ara ta po'i ni. 31 Lahenda bau-ina' propensi Asia hida ralela' Paulus. Ara radenu lahenda reu rafada Paulus fo boso' leo moo loa' ria neu, nai lahenda kadodou' mana tao kaco sira.

32 Nai moo loa' ria, lahenda ra saka dedea' ria tute na ubea'. Ruma rasapapara rae, “Leo ia'!” ma ruma rasapapara rae, “Leo naa'!” Sekonaa te kadodou na ta bubulu' dedea' ria tute na ubea'. Ara tuka noi dara ei marurupu'. 33 Lahenda Yahudi fo rai naa, ara bii nana huu afi rae, boso' losa lahenda kadodou' ara neo rae sira si' dadi mana kikifu nai dedea' ria. Huu ria naa, fee sira lahendan esa, nade Aleksander nesi' mata, fo dedea kati si. Ara hule fo ana nasala'e si nae, dedea' ria nana ta huu lahenda Yahudi ra. Aleksander so'u lima na ela ara boso' rapue, de ana soba-soba dedea nasala'e lahenda Yahudi ra. 34 Tehuu ara bubulu' ria nana lahenda Yahudi, boe ma ara rahara rambera rae, “Io-oa Artemis! Artemis malole! Ita lahenda Efesus io-oa Artemis!” Ara rahara leo' naa losa jam dua.

35-36 Boe ma malaka mana pareta kota Efesus napadei', de dedea natatama lahenda sira dale nara nae, “A'a-fadi' fo nai kota Efesus! Basa lahenda bubulu' ita dewin Artemis rupa tea na onda neme lalai mai, leo ita ia' mai. De ita lahenda Efesus ri' taboi tatalololen. Ta hapu lahenda horo ita tanea Artemis, nana huu ria dadi tutui' de basa lahenda ra bubulu'. Ubea' taon de emi bobou' leo' ia? Leo mae lahenda ra dedea rakaroroko' tuka sira hihii-nanaun, tehuu emi boso' mamanasa no sosoa-raraa taa' leo' ia! 37 Emi hela moo lahenda ia ra dua leo ia' mai, nonoo' leo sira tao tadalu'. Sekonaa te, sira ta ramana'o ra hata esa neme Artemis uma sosoko ina na mai boe'. Ara ta dedea ramumulu ita dewi na nade malolen. De emi sale lahenda ia ra leo bea' bali? 38 Mafarerene' matalolole! Ita tanuu mamana parisa dedea'. Lahenda mana ee dedea ara rahani rai naa. De kalu Demetrius ara nau radedea, sona muste tuka atoran a, fo meni dedea' ria leo mamana parisa dedea' a neu. 39 Ma kalu bei nau kolaa' hihii-nanau' feke', neme' naa ela ara reu dedea-rao' ro lasi' ara. 40 Boso' losa mana pareta Roma sale ita, nana huu kaco ia. Kalu ara nau saka dedea' ia tute na ubea', sona ita tae ubea' bali! Huu fo dedea' ia huu-peda taa'!” 41 Malaka ria dedea basa nae leo' naa, boe ma nadenu basa lahenda sira rasida' de reu si.