Paulus nalelela ao' no susi Priskila ma a'a Akila nai kota Korintus
18
1-3 Tepo' ria, mana pareta Roma, mane' bau-ina na, nade Klaudius. Ana namanasa no lahenda Yahudi ra, de usi heni si reme kota Roma nai propensi Italia. De ara kofela rai basa mamana' ain. Lahenda Yahudi esa, nade Akila no saon Priskila, ralai reme propensi Italia mai, leo kota Korintus reu. Akila lahenda propensi Pontus, nonoi na tao sudi ubea' neme banda rou' a.Tepo' ria, Paulus boe foa ela kota Atena leo kota Korintus neu. Nai naa Paulus nalelela ao' no Akila ma Priskila, huu fo ria boe tao sudi ubea neme banda rou' a. Ara leo rabua, ma roi-tao neu' esa.
4 Kalu losa lahenda Yahudi ra fai' hahae aon, sona Paulus leo sira uma mamason dale' neu. Nai naa, ana lele'o lahenda Yahudi, ma lahenda feke' ara, ela ramahere Yesus.
5 Tehuu fai fo Silas no Timotius reme propensi Makedonia mai, boe ma Paulus hahae tatao banda rou' a. Hatu-leledon ana nasapute nafada lahenda Yahudi ra nae, “Ita basa tahani Lahenda fo ri' neme fai a ulu na Manetualain helu nau fee Ni mai a, ri' Yesus! Ana mai so”
6 Tehuu lahenda Yahudi ruma ralena laka neu' Paulus, ma dedea radadae ni. Boe ma Paulus kakafu heni afu neme kakao-papaken mai, dadi tanda nae, ana ta tao dale' neu' asa, nana huu ara ta sipo' Tutui Malole fo ri' ana tui-bekan neu' asa. Ana nafada nae, “Emi talalu maan seli! Emi mamanene oo tao pake'! Tehuu neme' naa! Neu' ko emi lepa-masaa aom sala-siko mara. Au kafu lima ka oo emi. Neme besa' ia mai, au ta tao aafi' neu' emi lahenda Yahudi a so'. Au nau anori-afada lahenda nusa feke' fo ta Yahudi.”
7 Paulus la'o ela lahenda Yahudi ra, boe ma ana leo uma esa neu, nai uma mamaso' a boboa na. Manuu uma' a, nade Titius Yustus, ria ta lahenda Yahudi, tehuu dale na nahii' Manetualain.
8 Ta doo bea boe', te uma mamaso' ria malaka na, nade Krispus namahere Ramatua Yesus. Ria uma isi nara katema', ma basa lahenda Korintus feke' fo ri' ramanene neu' Paulus, ara ramahere boe. Boe ma Paulus sarani si.
9 Hatu' esa, boe ma nonoo' leo Paulus nalamei namanene Manetualain dedea nae, “Paulus! O boso' bii', ma boso' lau-ooe aom neu' nonoi' ia, huu fo o bei ta mabasa nonoi-laka ma. O muste manori-mafada maroo lahenda ia ra, Au Tutui Malole Ka. 10 Mafarerene'! O ta mesa' ko moi-tao, huu fo Au sama-sama oo ko. Leo mae lahenda tao rasususa' o, tehuu Au sama-sama oo ko. Ma hatu-leledon Au relu-atanae o. Boso' mafarene henin, te Au lahenda Ki dodou' rai kota ia.”
11 Paulus namanene leo naa', boe ma ana leo doo' a nai kota Korintus. Ana nanori-nafada Manetualain Eno Masoda Na nai naa, losa teu' esa seseri'.
12 Tepo' ria, ara so'u lahenda esa, nade Galio, dadi gubernor nai propensi Akaya.a Lahenda Yahudi hida rala hara' fo roo Paulus leo gubernor, nai mamana parisa dedea'. 13 Ara kolaa' Paulus rae, “Lahenda ia fufudi-lele'o lahenda dodou' fo tuka agama bebeu'. Sekonaa te, mana pareta Roma ta sipo' agama ria!”
14 Paulus nau dedea nasala'e ao na, boe ma gubernor nahapu-hani ni. Ana nafada lahenda fo ri' kolaa' Paulus nae, “Lahenda Yahudi emin, pasa' ridoo mara! Kalu emi mae lahenda tao tadalu', do lahenda rapau ao, sona au muste amanene emi dedea' mara. 15 Tehuu dedea' fo ri' emi kolaa' ia, emi urusan uma dalem! Emi malelena ao' noi atoran agama Yahudi a dedea laka na, ma nade nara. Mana pareta nai ia, ta urus dedea' leo naa'!”b
16 Boe ma gubernor usi heni si reme mamana parisa dedea' ria mai. 17 Lahenda Yunani fo rai naa hopu ra lahenda esa, nade Sostenes. Ria malaka uma mamaso' lahenda Yahudi. Ara hela roon, de popo'o ni nai gubernor mata na, tehuu gubernur ta tao dale' neu' asa.
Paulus neme Korintus mai, fali selu' leo kota Antiokia nai propensi Siria
18-19 Paulus leo nahani' Korintus. Tehuu ta doo bea boe', te ana nate'a lahenda kamahere' rai naa, boe ma no Priskila ma Akila leo kota Kengkrea reu rahani ofa'. Nai naa, Paulus keu kusi' laka na dadi tanda nae, hata fo maulu na ana helu neu' Manetualain, besa' ia natetetu na si so.c Basa de ara sa'e ofa' leo kota Efesus reu, ara onda boe ma Paulus foa ela nonoo kaduan sira, de leo lahenda Yahudi ra uma mamason dale' neu. Nai naa, ana nafee aafi' no lahenda Yahudi ra. 20 Ara dedea leo' naa, boe ma lahenda Yahudi ra hule fo Paulus leo namanoso noo si, tehuu ana ta nataa. 21 Boe ma ana nate'a nae, “Toranoo susue kara, boso' dale mara rasala'! Kalu Manetualain soi eno', neu' ko au mai dama selu' emi.” Dedea nae leo' naa, boe ma ana la'o ela Efesus.d
22 Ana sa'e ofa' leo kota Kaisarea neu, ana onda nai naa, boe ma la'o ei' leo Yerusalem neu dama lahenda kamahere' fo rai naa. Basa de ana fali leo kota Antiokia neu. 23 Ana leo fai' hida nai naa, boe ma ana la'o rule-feo propensi Galatia ma propensi Frigia. Nai naa, ana natetea lahenda kamahere' ara dale nara.
Apolos nai kota Efesus no kota Korintus
24 Fai ria, lahenda Yahudi esa, nade Apolos, neme kota Aleksandria nai propensi Masir ele, ana besa' ko losa kota Efesus. Ria lahenda malela dedea'. Ria boe nalela' katema' Manetualain Susura Makamoi Na isi-liin. 25 Ana namanene tutui' la'e-neu' Yesus, ma ao na nasee nahii' tui fee lahenda feke'. Hata fo ana tui a mema' tebe. Tehuu ana bei ta bubulu' basa hihii-nanau' a, ana bubulu' noi Yohanis sarani lahenda, kalu ara saledale-tu'etei nara. 26 Lai' esa de ana dedea nai lahenda Yahudi ra uma mamason dale' ta pake bibila-babaa'. Nai naa, Priskila no Akila ramanene ni dedea. Hule-haradoi basa, boe ma ara hule ni fo roon leo sira uma na reu. Nai naa, ara tui ni lutu-lutu Ramatua Yesus Eno Masoda Na katema'.
27 Apolos naetu' naan leo propensi Akaya neu. Lahenda kamahere' fo rai Efesus, dale' esa ro ria hihii-nanaun. Boe ma lahenda Efesus ara tao susura' fee sira toranoon lahenda kamahere' rai Akaya, ela ara sipo' Apolos no malole. Apolos sipo na susura' ria, boe ma ana la'o. Losa Akaya, tebe-tebe ana tulu-fali lahenda kamahere' fo rai naa. Ara ramahere Yesus, nana huu Manetualain natudu dale malole Na neu' asa. 28 Ana natatane ao' no lahenda Yahudi nai lahenda dodou' matan, tehuu ara ta raseki ni. Ana nanori-nafada si pake Manetualain Susura Makamoi Na nae, “Doo-naru' basa ia, ita tahani Lahenda fo ri' Manetualain helu nau feen mai a, nana ri' Yesus!”