Lasi' Kristen ara rabua rai Yerusalem
15
Tepo' ria, lahenda Yahudi Kristen hida reme propensi Yudea leo Antiokia reu. Losa naa, boe ma ranori-rafada Ramatua Yesus lahenda nara rae, “Emi mamahere Yesus nana la'e ria so. Tehuu ria bei ta dai fa. Kalu tebe-tebe emi nau hapu popo'i-tatata', sona muste sunat tuka ita hadan, fo ri' Manetualain feen neu' ba'i Musa.”a2 Tehuu Paulus no Barnabas ta sipo' lahenda sira dedea na. Ara ralelena ao' raan seli. Paulus no Barnabas rae, “Emi sala! Lahenda nusa feke' ta lahenda Yahudi, fo ri' ramahere Yesus, ta parluu tuka lahenda Yahudi ra hadas sunat na!” Huu no ara ralelena ao' leo naa', de rala hara' fo radenu Paulus no Barnabas, ma nonoo feke' hida rai Antiokia, reni dedea' ia leo Ramatua' a lahenda nadedenu nara ma lasi' Kristen feke' fo rai Yerusalem.
3 Huu ria naa, lahenda Kristen fo rai Antiokia radenu Paulus asa leo Yerusalem reu. Ara la'o ei' tuka propensi Fenisia ma propensi Samaria. Ara tuli lala'o' lahenda kamahere' ara uma nara. Ara tui lutu-lutu rae, “Lahenda fo ta Yahudi boe, ratafali ramahere Manetualain!” Basa lahenda sira ramanene leo' naa, boe ma ramaho'o.
4 Losa Yerusalem, Yesus lahenda nara, Ramatua' a lahenda nadedenu nara, ma lasi' Kristen ara sipo' asa no malole. Boe ma Paulus asa tui basa-basan fo ri' Manetualain noi-taon soa-neu' asa, losa' lahenda feke' dodou' boe tuka Ramatua Yesus. Ma ara tui sira ralelena ao' la'e-neu' sunat. 5 Lahenda fo ri' ramanene Paulus asa tutui na, hapu lahenda Yahudi Kristen hida reme partei Farisi mai. Ara foa rapadei', ma dedea rambera rae, “Nenene matalolole! Leo mae sudi bea fo ta lahenda Yahudi nau tuka Yesus, ara muste tuka ita hadas sunat na ma atoran feke', fo ri' Manetualain naondan tuka ba'i Musa.”
6 Boe ma basa lahenda sarani' ara rala hara', fo Ramatua' a lahenda nadedenu nara, ma lasi' Kristen ara, rabua ela dodoo-tatai hihii-nanau' ria. 7 Ara rafee aafi' doo na seli. Mate'e na, Petrus foa napadei' ma dedea nae, “Toranoo kara emin! Emi ri' bubulu' fai a ulu na Manetualain tudu na au neme emi basa talada mai, fo au tui-beka Yesus Tutui Malole Na neu' lahenda fo ta Yahudi. Huu fo Manetualain nau sira ramahere Yesus.b 8 Manetualain bubulu' ita lahenda dae-bafo' a esa-esa' ko dalen. Ma Ana naonda Dula-dale Malalao-malalafu Na neu' asa, sama leo' Ana naondan neu' ita boe. No ria naa, ita bubulu' Manetualain sipo' asa boe.c 9 Huu fo Manetualain ta mete mata', ma ta fifika-fafae ita to sira. Ana tao lalao-lalafu sira dale nara, nana huu sira boe ramahere Yesus, sama leo' Ana tao lalao-lalafu ita dale na.
10-11 Leo' bea? Kalu Manetualain sipo' asa, ubea' taon de ita bei tao tambera si, neni' hadas sunat bali? Sekonaa te, kalu ita tui roo', sona ita to ita bei-ba'i nara ta lepa tabe'i ita atoran agama na katema'! De ita boso' taseti si leo naa'! Au atane leo ia': Manetualain po'i-tata na ita, nana huu ita tuka atoran agama, do? Ta'a, hete! Ana po'i-tata na ita, nana huu Ramatua Yesus sue-lai ma dale Na malole a neu' ita. Boso' mafarene henin! Te Manetualain sue-lai ma dale Na malole a neu' lahenda feke' a boe.”
12 Lahenda sira ramanene leo' naa, boe ma ta hapu esa tamba dudu'a-aafi' so boe'.
Boe ma Paulus no Barnabas tui selu' asa, Manetualain pake tao sira leo' bea. Ara tui si tanda heran ma hihii-nanau' bau-ina', fo ri' Manetualain taon nai lahenda nusa' fo ta Yahudi. 13 Tui basa boe ma lahenda esa, nade Yakobis, foa napadei' ma dedea nae, “Toranoo kara emin! Nenene au dei! 14 A'a Petrusd besa' ko tui ita nae, Manetualain so'u na lahenda fo ta Yahudi, dadi reu' Ramatua Yesus kileo-bobokin. 15 Ria natetu na hata fo Manetualain mana nesi mata nara rafada mema' neme fai a ulu na mai. Mana dui' nae:
16 ‘Naraa la'e fai na, te Au atafali mai.
Nana huu Au nau afoa selu' mane' Daud pareta na.
Ria tititi-nonosin fo ri' rasosopu' a,
Au afoa selu' ana, ma tao atea-amepe ni.
17-18 No ria naa, lahenda nusa feke' a boe saka Au.
Au teka-here a si, fo dadi Au lahenda Kara.
Neme fai a ulu na mai Manetualain dedea nae leo' naa!’e
19-20 De au, Yakobis, leo ia': kalu lahenda nusa feke' a dadi reu' Manetualain lahendan, sona ita lahenda Yahudi a boso' tao tasususa' asa, boso' tao tambera si, ma tadenu si tuka ita hadas sunat na. De ita muste dui' susura' fo haitua fee si tae, ara boso' tuka ita hadas Yahudi a katema'. Ita fee si nafarerene' tae, ara boso' hohoke, boso' raa paa sosoko', paa daa', ma raa paa' neme banda fo roi pode' raisa' ana.f 21 Kalu ita tao atoran leo ia', hihii-nanau' bebeu' ta ia fa. Lahenda dodou' bubulu' ita lahenda Yahudi hadas na mema' leo naa'. Te tuka-tuka fai hahae ao' ita lees ba'i Musa atoran ara nai uma huhule-haradoi' ara dale' nai basa mamana' ain. De lahenda nusa feke' dodou' bubulu'. Au dedea ka te'e ada' ia. Makasi!”
Fee susura' leo lahenda kamahere' fo ta lahenda Yahudi
22 Boe ma Ramatua' a lahenda nadedenu nara, lasi' feke' ma basa lahenda sarani' rai Yerusalem rala hara', fo radenu lahenda reu tui sira naetu na neu' lahenda sarani' nai basa mamana' ain. Ara here lahenda fo ri' jama'at ara hada' ana, ma naraa na neu' nonoi-laka' ria. Ara here lahenda dua. Esa nade Silas, ma esa nade Yudas (fo ri' raloon rae, Barsabas). Ara radenu dua si reu sama-sama ro Paulus ma Barnabas. 23 Ara reni susura' fee lahenda nusa feke' nai kota Antiokia, propensi Siria, ma losa propensi Kilikia. Susura' ria lii na nae leo' ia:
“Soda-mole' neme ami, Ramatua Yesus lahenda nadedenun, ma lasi' Kristen feke' nai kota Yerusalem ia. Ami dui' susura' ia fee emi, fo ri' ami sue-lai sama leo' ami toranoo boki mara.
24 Ami dui' susura ia, nana huu ami mamanene rae, lahenda hida reme Yerusalem ia mai, reu dama emi nai naa. Ara ranori-rafada rafarara'u, losa' tao rasasusa' ma ramakoa emi. Ela emi bubulu' dei, te ami ta parnaa madenu lahenda sira. 25 Ami mamanene rae, lahenda tao rasususa' emi leo' naa, de ami mabua nai ia, fo dodoo-tatai hihii-nanau' ria. Ami mala hara' ma maetu' basa hihii-nanau' ria. De besa' ia, ami here ma lahenda reu rafada emi, ami naetum ria. Ara reu sama-sama ro ami toranoo susuem, Barnabas no Paulus. 26 Ita lahendan sira dua, lepa doidoso losa' kurabai' mate si. Ara doidoso leo' naa, nana huu ara tuka ita Ramatuan Yesus Kristus. 27 De ami madenu Yudas no Silas, reti rafada emi susura' ia isi na.
28 Manetualain Dula-dale Malalao-malalafu Na nafada ami, ma ami basa sipo' mae, emi boso' tuka ami hadas Yahudi ma katema', conto leo-leo hadas sunat. Huu fo hadas ria tao nambera emi. Tehuu hihii-nanau' esa-dua rai naa, emi muste mafarerene' asa:
29 Boso' hohoke.
Boso' mia paa sosoko'.
Boso' mia paa daa'.
Ma boso' mia paa' neme banda fo roi pode' raisa' ana.
Kalu emi manea ao-ina mara, neme basa hihii-nanau' sira, sona emi toranoom lahenda Yahudi Kristen ta rahia' emi. No ria naa, emi bisa mabua-maesa mo si. Ami susura ma lii na noi ri naa'. Soda-mole'.”
30 Paulus asa sipo ra susura' ria, boe ma rate'a, de leo kota Antiokia reu. Losa naa, ara raloo ra lahenda sarani' ara, basa si tesa boe ma loo fee si susura' ria. 31 Ara lees basa susura' ria, boe ma lahenda sira ramaho'o, nana huu susura' ria isi na natetea dale nara.
32 Yudas no Silas dadi Manetualain mana nesi matan. Dua si ro lahenda kamahere' rai kota ria dedea-rao nara rala doo' a. Ara ranori-rafada ma ratetea lahenda sira dale nara. 33 Dua si leo ramanoso rai naa, boe ma lahenda sarani' fo rai Antiokia fee si fali leo lahenda fo ri' radenu si a. Ara fee dua si fali no mole-dame. 34 [Tehuu Silas nau leo nahani' Antiokia.]g
35 Paulus no Barnabas leo fai' hida nai naa. Ara tulu-fali lahenda feke' fo ri' ranori-rafada la'e-neu' Ramatua Yesus Eno Masoda Na.
Paulus no Barnabas esa' ko la'o matan
36 Paulus no Barnabas leo ramanoso rai Antiokia, boe ma Paulus dedea no Barnabas nae, “A'a! Mai ita fali leo basa mamana' fo maulu na ita parnaa tuli a. Teu mete taneni toranoo' sira masoda na. Sira leo bea' so? Lahenda sira ramahere Ramatua Yesus bei ta doo' a. Fai maneu' a, ita tanori-tafada si. De mai teu dama taneni si dei.” 37 Barnabas namanene Paulus nae leo' naa, boe ma ana nataa.
Barnabas nau noo Yohanis fo tuka si. (Ara raloo Yohanis sona rae, Markus). 38 Tehuu Paulus ta nataa fa. Huu fo fai maneu' a, Markus foa ela si rai propensi Pamfilia.h 39 Paulus no Barnabas ralelena ao' raan seli, losa' esa' ko la'o matan. De Barnabas noo Markus, dua si sa'e ofa' leo pulu Siprus reu.
40 Tehuu Paulus noo Silas. Dua si saka' la'o, lahenda kamahere' fo rai Antiokia hule-haradoi, ela Manetualain nasuru-nahapa si, ma natudu dale malole Na neu' asa. Ara hule-haradoi basa, boe ma dua si la'o. 41 Ara la'o rule-feo propensi Siria ma propensi Kilikia. Nai bea-bea oo ara ratetea lahenda kamahere' ara dale nara.