Paulus no Barnabas rai kota Ikonium
14
Paulus no Barnabas losa kota Ikonium, boe ma ara leo lahenda Yahudi ra uma mamason dale' reu. Nai naa, ara dedea loa-naru' la'e-neu' Manetualain Tutui Malole Na, losa' lahenda Yahudi dodou' ma lahenda nusa feke' ara boe ramahere Ramatua Yesus. 2 Tehuu nai naa, lahenda Yahudi hida fo ri' homu rahere sira agama na, ara ta sipo' Paulus asa dedea na. De ara duduku-papau' lahenda feke' ara, ela ete' ao nara ro lahenda fo ramahere Yesus. 3 Tehuu Paulus asa ta bii-ramata'u. Ara tui-beka raroo Ramatua Yesus Tutui Malole Na, fee sudi bea. Ara rafada rae, Ramatua Yesus dale Na loa' a neu' basa lahenda. Ana fee si kuasa fo bisa tao tanda heran rupa', ela lahenda dodou' bubulu' rae, Manetualain pake si.Tepo' ria, Paulus asa leo doo' a nai kota ria. 4 Boe ma lahenda bubua' dua dadi nai kota ria. Esa tuka lahenda Yahudi fo ri' homu rahere sira agama na; ma esa bali tuka rahere Ramatua' a lahenda nadedenu nara. Bubua kadua' sira ralelena ao' la'o naroo.
5 Lahenda Yahudi hida fo ri' homu rahere sira agama na, rala hara' ro lahenda feke' ara, ma sira malaka nara, fo tao rasususa' Ramatua' a lahenda nadedenu nara. Ara nau pia Paulus asa reni' batu. 6 Tehuu lahenda ruma rafada Paulus asa rae, lahenda bubua' esa saka' tao tadadalu si. Boe ma ara ralai leo propensi Likonia, nai kota Listra, kota Derbe, ma koro' manenea' nai naa. 7 Nai naa, ara tui-beka Ramatua Yesus Tutui Malole Na.
Paulus asa rai kota Listra ma Derbe
8 Losa kota Listra, Paulus no Barnabas ara rita tou' esa, luku ni neme mama na bokin ni a. De ana bei ta la'o nita fa. 9 Lahenda ria natuu' namanene Paulus tutui na. Paulus mete naheren ma afi nae, “Lahenda ia namahere na, bisa puli naan!” 10 Boe ma Paulus naloon nae, “A'a! Mapadei' leo!” Lahenda ria namanene leo' naa, boe ma ana foa napadei' tuti' a, de ana mulai lala'o.
11 Lahenda ra rita Paulus tao leo naa', boe ma basa si roi ramakokoa' a. Ara dedea pake sira dedean Likonia rae, “Emi nenene dei! Lahenda ia ra dua, nana dewa fo ri' onda leo dae-ina' a mai, rarupa leo' lahenda dae-bafo' a!” 12 Lahenda sira dedea rae leo' naa, nana huu ara afi rae, Barnabas nana sira dewa ni esa, nade Seus. Ma Paulus mana dedea a, ara afi rae dewa Hermes.a 13 Nai kota bafa' a dea', hapu uma sosoko' esa soa-neu' sira dewa Seus na. Seus mana soko na nita Paulus asa, boe ma neni buna' ma hela neni sapi mane bau-ina' hida, fo nau soko neu' asa. Lahenda dodou' tuka mana soko ria boe fo soko neu' Ramatua Yesus lahenda nadedenu nara.
14 Tehuu fai ria Paulus no Barnabas bubulu', lahenda sira nau soko neu' asa, de ara ta sipo'. Boe ma ralai leo lahenda kadodou' sira talada reu, ara sii rasai badu nara dadi tanda nae, ara ta sipo' hata fo lahenda ra tao a. Boe ma dua si rahara rae, 15 “Adoo! Ubea' taon de emi tao leo ia'? Emi boso' mae ami nana dewa. Ami lahenda dae-bafo' biasa leo emi boe. Ami leo ia' mai, fo tui-beka fee emi Tutui Malole esa. Emi muste foa ela emi dewa sosoa-raraa' taam sira. Emi muste matafali tuka Manetualain Masoda' a. Huu fo Ria ri' adu lalai ma dae-ina' a no basa oe-isin.b 16 Neme fai a ulu na mai, lahenda nusa' ara rasoda tuka hihii-nanau mesa nara. Manetualain nataa' asa leo naa' boe. 17 Tehuu Manetualain ta nafarene henin fee tanda rupa' ara, ela lahenda nusa' ara bubulu' rae, Manetualain malole. Ana naonda uda fee ita. Ana fee ita oka-tine nara buna-boa malole. Ana nahao ita ma tao na ita basa tamaho'o.”
18 Leo mae Paulus no Barnabas horo si boso' tao leo naa', tehuu lahenda sira nau-nau fee si hata sosoko' sira.
19 Fai ria, lahenda Yahudi hida reme kota Antiokia no Ikonium leo kota Listra reu. Ara duduku-papau' lahenda kadodou' sira, fo ralena laka neu' Ramatua Yesus lahenda nadedenu nara. Boe ma ara pia Paulus reni' batu. Ara raendobuko mate ni, de hela renin, tu'un leo kota dea' neu.
20 Tehuu Yesus lahenda kamahere nara rapadei eo ra Paulus, boe ma ana foa, de fali leo kota dale' neu. Balahaa', boe ma ana no Barnabas leo kota feke' esa, nade Derbe.
Paulus no Barnabas fali leo jama'at nai kota Antiokia nai propensi Siria
21 Nai Derbe, Paulus no Barnabas tui-beka Ramatua Yesus Tutui Malole Na, de lahenda dodou' ramahere Ni. Boe ma dua si fali selu' Listra reu, neme naa' mai, ara leo Ikonium reu. Neme Ikonium mai, ara la'o raroo leo Antiokia reu, nai propensi Pisidia. 22 Nai naa, ara dedea ro lahenda fo tuka Yesus, ela ratetea dale nara. Ara rafarerene' fee si rae, “Toranoo kara emin! Kalu ita dadi Manetualain lahendan, boso' afi mae ita ta hapu susa so'. Leo mae leo' bea boe, ita muste hapu susa. Tehuu ita muste tanenete tuka tahere Yesus.” Dua si ranori-rafada Yesus lahenda nara, nai kota ria rae leo' naa.
23 Boe ma Paulus no Barnabas saka lahenda fo elac jama'at ara esa-esa' ko no' mauli-malakan. Ara hule-haradoi ma puasa fo nau bubulu' Manetualain hihii-nanaun. Boe ma lalaa lima nara ma hule-haradoi fo so'u lahenda fo ri' Manetualain natudu a, ela dadi mauli-malaka sarani'.
24 Boe ma Paulus no Barnabas la'o ela propensi Pisidia, de leo propensi Pamfilia reu. 25 Ara losa kota esa nade Perga, boe ma ara tui-beka Manetualain Tutui Malole Na nai naa. Basa de ara la'o raroo, ta doo bea boe', te ara losa kota Atalia. 26 Nai naa, ara sa'e ofa' leo kota Antiokia, nai propensi Siria. Fai maneu' a, Ramatua Yesus lahendan rai Antiokia, ri' radenu Paulus no Barnabas ma fee si reu' Manetualain lima Na, ela Ana relu-natanae si. De besa' ia, Paulus asa nau fali, fo tui jama'at Antiokia rae, sira roi-tao basa nonoi-laka nara so.
27 Losa Antiokia, boe ma Paulus asa raloo ra Ramatua' a lahendan fo rai naa de basa si tesa. Ara tui loa-naru' la'e-neu' basa-basan fo ri' Manetualain taon soa-neu' asa. Rae, Manetualain soi eno' de lahenda fo ta Yahudi boe ramahere Yesus. 28 Boe ma Paulus no Barnabas leo ramanoso ro Ramatua Yesus lahenda kamahere nara rai naa.