Yakobis mamate na; Petrus maso' bui; ma lahenda kamahere ara huhule-haradoin
12
Fai ria, mane' Herodesa mulai tao na Ramatua Yesus lahendan ruma doidoso raan seli. 2 Ana pareta lahenda fo raisa Yakobis reni' tafa'. Yakobis nana Yohanis a'a na. 3 Fai fo Herodes nita Yakobis mamate na, tao na malaka Yahudi ra ramaho'o, boe ma ana tao lena ria bali. Naraa la'e sira fai' bau-inan fo ri' rae, Feta Roti Ta Pake Ralu Tetei',b ana nadenu lahenda reu hopu Petrus bali. 4 Ara hopu raan, boe ma teen leo bui dale' neu. Ara tudu ra soldadu bubua' haa ranea rakakati' Petrus hatu-leledon. Bubua' esa, na soldadu haa. Tuka Herodes hihii na, basa feta ria dei, besa' ko naetu' Petrus dedea na, nai lahenda kadodou' ara matan.c 5 De fai ria ara ena Petrus nai bui dale' a, Ramatua Yesus lahenda nara hule-haradoi la'o naroo, ara hule Manetualain relu-natanae Petrus.Manetualain kalua na Petrus neme bui dale' mai
6 Balahaa', mane' Herodes nau naetu' Petrus dedea na nai lahenda touina' ara matan. Tehuu hatun ria, nai bui dale' Petrus suku nai soldadu dua talada ma heke rabua sira lima nara bei esa' pake rante dua. Ma soldadu feke' ara ranea rai uma lelesu na.
7 Kekeneu te, Manetualain eila'o limalopen esa neme nusatetu-ikutema' a mai, napadei neu' naa, de kama ria nahaa ledo-ledo. Ana fafae Petrus nae, “Petrus! Foa lai-lai.” No besa' ria boe, rante besi ria tuda henin neme Petrus lima na mai. 8 Boe ma eila'o-limalope ria nadenu ni nae, “Olu badu ma neu! Ma pake tabueis ma leo!” Petrus pake basa, boe ma eila'o-limalope' ria nafada bali nae, “Olu badu dea ma neu, fo mai tuka au leo!”
9 Petrus tuka eila'o-limalope ria kalua reme bui dale' mai. Tehuu Petrus naendobuko ana nalamei. Sekonaa te dadi tebe leo' naa. 10 Ara la'o seli mamana nanea masososa', ma kadua a, boe ma ara losa lelesu besi. Lelesu ria noi buka' aon. Dua si dea' reu, de la'o tuka eno' fo leo bendar neu. Kekeneu te, Manetualain eila'o-limalopen ria foa ela Petrus mesa' ana neu' naa.
11 Eila'o-limalope ria mopon, besa' ko Petrus nameda naan nae, “Mema' tebe! Besa' ko au bubulu', tebe-tebe Manetualain nadenu eila'o-limalope Na mai, po'i na au eme Herodes lima na. Manetualain tao leo naa', fo po'i na au eme lahenda Yahudi ra dudu'a-aafi tadalu nara.”
12 Boe ma Petrus leo mama Maria uma na neu. Ria nana Yohanis mama na. Yohanis nade feke na, Markus. Nai naa, lahenda dodou' rabua hule-haradoi, hule fo Manetualain tulu-fali Petrus nai dedea' ria. 13 Losa uma ria, boe ma Petrus dedelu lelesu a ma naloo neme naa' mai. Boe ma ata ina' esa, nade Rode, neu titiro sudi bea mana mai' ria. 14 Ana namanene Petrus hara na, te nalela' tuti' ana. Ana namaho'o naan seli', boe ma nalai leo uma dale' neu nafada si nae, “Petrus napadei nai dea'!” Tehuu no ria ta bulu' nae tao ubea', de nafarene henin ta soi lelesu a fee Petrus.
15 Tehuu rataa rae, “Ami ta mamahere fa! Boso' maseseko leo naa'!”
Tehuu ina' a neni' tea na nae, “Ta'a! Tebe Petrus haraoen ria! Ana nai dea' ele!”
Ara ta tao aafi' neu fa rae, “Ria nana bate Manetualain eila'o-limalopen nai nusatetu-ikutema' fo ri' nanea Petrus.”
16 Ara ralelena ao', tehuu Petrus bobou' naroo losa' reu soi lelesu a. Soi ra lelesu a, boe ma roi ramakokoa' a, huu fo ria nana Petrus. 17 Petrus lalae' lima na, ela basa si nenee'. Boe ma ana tui nae, tao leo' bea de losa' Manetualain kalua naan neme bui dale' mai. Ana nadenu si nae, “Emi meu tui basa hihii-nanau' ia ra neu' Yakobis ma basa lahenda nadedenu feke' ara.” Basa de Petrus leo mamana feke' neu.
18 Balahaa' balahaa anan, soldadu manea ra mete neu te Petrus ne'es ana, boe ma roi ramakokoa' a ma bii raan seli, nana huu ara ta bubulu' rae, neu' ko ubea' dadi soa-neu' asa. 19 Herodes bubulu' hihii-nanau' ria, boe ma ana pareta si reu saka Petrus. Tehuu ta rita ni. Herodes pareta fo parisa' soldadu manea sira. Parisa' basa, boe ma ana nadenu fo raisa soldadu manea sira katema'.
Boe ma Herodes la'o ela Yudea, neu leo nai kota Kaisarea.
Mane' Herodes Agripa mamate na
20 Tepo' ria, kota dua, si' Tirus ma Sidon, lahenda nara biasa asa nanaa' nai mane' Herodes nusa na. Tehuu mane' ria musu-noo si neme doo na mai. De ara dedea-rao' saka eno' fo reu mole-dame roon. Ara here ra lahenda bubua' esa, fo leo Herodes reu. Losa Kaisarea, ara ratia' ro lahenda uma isi' esa, nade Blastus. Ria malaka urusan nai mane' a uma pareta na. Rala hara' ro Blastus fo dadi mana lele'o, fo soi eno', ela ara bisa raneta ro Herodes.
21 Herodes nataa sipo' asa, boe ma ara here ra fai esa ela raneta. Fai ria, ara tao feta bau-ina'. Herodes pake kakao-papake mana pareta, ana natuu' neu' kadera mana pareta na lain. Boe ma ana dedea no si. 22 Lahenda ra ramanene haraoe na, boe ma ara io ni rae, “Nenene ria haraoe na! Ia ta lahenda dae-bafo' a haraoe na! Ia nana dewa haraoe na!” 23 Kekeneu te, Manetualain eila'o-limalopen esa nai nusatetu-ikutema' a, fee Herodes hedis esa, nana huu ana sipo sira i'io na, ana seti heni Manetualain, ma ta hada-horomata neu' Ana. Boe ma kalati' ara raa Herodes ao-paa na losa' ruada' neu.
24 No basa hihii-nanau' mana dadi' sira, Manetualain Tutui Malole Na boe-boe tui-bekan nai basa mamana' ain, ma lahenda fo tuka Ramatua Yesus Eno Masoda Na boe tamba dodou'.
25 Barnabas no Saulus reni lahenda Antiokia ra tutulu-fafalin leo Yerusalem reu, ara rabasa nonoi-laka nara, boe ma ara fali leo Antiokia reu. Ara roo ana muri-ana' esa, nade Yohanis. Raloon sona rae, Markus.