Petrus nasala'e ao na, huu fo ana sarani lahenda ta Yahudi
11
Petrus bei ta fali, te Yesus lahenda nadedenu nara ro lahenda kamahere feke' fo rai Yerusalem ramanene rae, lahenda fo ta lahenda Yahudi sipo Manetualain Tutui Malole Na. 2 De Petrus losa Yerusalem, boe ma lahenda kamahere' ruma reme partei Yahudia ara salen, 3 rae, “O leo bea' ia? O bubulu' ita hadas na, do ta'a? O maparani leo lahenda ta Yahudi uma nara muu! Mua-minu mo si bali! Ta bole leo naa' fa, huu fo sira bei ta parnaa tuka ita hadas sunat na! Ta naraa ita tabua-taesa to si!”4 Boe ma Petrus tui si basa-basan fo dadi a nae, 5 “Fai' esa de au nai kota Yope, naraa la'e au hule-haradoi, boe ma Manetualain natudu au nonoo' leo meis. Au ita nonoo' leo lalai natahu'a, boe ma tema' maloa esa toda mai, bukun haa si mana heke'. Tema' ria londan leo au mai. 6 Au titiro leo tema' ria dale' neu, te au ita banda rupa' ara, ri' banda ei haa', manalodo-manarae', ma manupui rupa'. Ita lahenda Yahudi taluli basa banda sira. 7 Ma au amanene haraoe' esa nadenu nae, ‘Petrus! Foa leo! Hala banda sira fo mua!’
8 Tehuu au ataa ae, ‘Ta bisa fa, Ramatua'! Boso' tao leo naa'! Huu fo au bei ta parnaa ua banda rupa' leo naa'! Ita lahenda Yahudi taluli basa banda sira!”
9 Tehuu haraoe' ria balas nae, “Kalu Manetualain nafada nae, hata esa makamoi', sona o boso mae hata ria makekeo-makakanu' bali!”
10 Au ita tema' ria toda mai lai' telu, boe ma nana so'u fali' leo lalai neu.
11 Naraa la'e oras ria, lahenda telu reme Kaisarea mai, losa uma ria, ara mai saka au. 12 Boe ma Manetualain Dula-dale Malalao-malalafu Na nafada au nae, ‘O onda leo fo muu tuka lahenda sira. Dale ma boso' doda'. Leo mae sira ta lahenda Yahudi, tehuu boso' mahia' asa, fo tao si reu' lahenda makekeo-makakanu'.’ Au amanene leo' naa, boe ma au sama-sama oo ita toranoon kanee ia ra leo Kaisarea meu. Nai naa, ami basa maso' leo komendaan soldadu Roma esa uma na meu. 13 Komendaan ria tui nae, fai' hida maneu' ria, ana nita Manetualain eila'o-limalopen neme nusatetu-ikutema' a mai, napadei nai uma na ma nae, ‘Madenu lahenda leo kota Yope reu rala lahenda esa, nade Simon Petrus. 14 Neu' ko lahenda ria natudu o mo uma isi mara, eno na leo bea' fo Manetualain po'i-tata na emi ma sae-safe heni sala-siko mara.’
15 Huu ria naa, au atudu Manetualain Eno Soda Na neu' asa. Kekeneu te Manetualain Dula-dale Malalao-malalafu Na onda neu' asa, sama leo' fai' naa ra onda neu' ita a. 16 Au mete-ita si sipo Manetualain Dula-dale Malalao-malalafu Na leo' naa, boe ma au afarene Ramatua Yesus dedea maulu Na nae, ‘Yohanis sarani emi pake oe, tehuu neu' ko Manetualain tao lena ria bali, ri' Ana naonda Ria Dula-dale Malalao-malalafu Na neu' emi.’b 17 Huu fo Manetualain naonda Dula-dale Malalao-malalafu Na neu' lahenda feke' ara sama leo' ita boe. De emi hihii ma sona au alena-laka neu' Manetualain, do leo bea'? Au dedea ubea' bali?”
18 Ara ramanene Petrus nasala'e aon nae leo' naa, boe ma ara ta salen so'. Basa si io-oa Manetualain rae, “Padoa' a leon! Manetualain soi eno' fo lahenda feke' ara boe bisa saledale-tu'etei nara, ela Manetualain sae-safe heni sala-siko nara, de ara hapu soda' mana basa taa'.”
Ramatua Yesus lahenda nara kofela rai basa mamana' ain. Sira kadodou na rabua rai kota Antiokia
19 Tepo' fo ara raisa Stefanus, boe ma ara mulai tao doidoso ma rasususa' Yesus lahenda nara. Huu ria naa, ara kofela rai basa mamana' ain. Ruma ralai propensi Fenisia reu. Ruma ralai pulu Siprus reu, ma ruma ralai leo doo' a reu losa kota Antiokia nai propensi Siria. Lahenda malai' sira boe tui-beka Ramatua Yesus Tutui Malole Na nai basa mamana' ain. Tehuu ara tui-beka fee noi sira lahenda Yahudi nara. Ara ta tui-beka fee lahenda feke' ara.c
20 Tehuu Ramatua' a lahendan ruma reme pulu Siprus ma kota Kirene, la'o raroo leo kota Antiokia nai propensi Siria. Nai naa, sira si' tui-beka Ramatua Yesus Tutui Malole Na neu' lahenda ta Yahudi. 21 Manetualain fee kuasa Na neu' asa losa' lahenda dodou' ramahere Ramatua Yesus.
22-24 Tepo' ria, Ramatua Yesus lahendan fo rai Yerusalem ramanene rae, lahenda feke' fo rai Antiokia boe ramahere Yesus. Boe ma radenu lahenda esa, nade Barnabas neu dama si rai naa. Barnabas, lahenda dale malole ma namahere tebe-tebe Manetualain. Manetualain Dula-dale Malalao-malalafu Na napipipi-nalala'on.
Ana losa naa, te ana nita mata', mema' tebe Manetualain noi-tao nai lahenda feke' ara masoda na talada. Dale na namaho'o, ma ana fufu'a-aali si, ela ara tebe-tebe tuka rahere Manetualain Eno Masoda Na. No ria naa, Manetualain lahenda nara boe-boe tamba dodou'.
25 Boe ma Barnabas leo Tarsus neu saka Saulus. 26 Naneta no Saulus, boe ma ana lele'o ni, fo sama-sama fali leo Antiokia reu. Dua si leo rabua ro Ramatua' a lahenda nara rai Antiokia losa teu' esa. Tuka-tuka fai', dua si ranori-rafada Ramatua Yesus Eno Masoda Na neu' lahenda dodou'. (Nai kota Antiokia, besa' ko ara mulai hule Yesus lahenda nara rae, ‘lahenda Kristen’).d
27 Dua si bei rai Antiokia, te lahenda hida reme Yerusalem mai. Manetualain biasa pake lahenda sira fo dadi Ria mana nesi matan. 28 Neme mana nesi mata sira, lahenda esa, nade Agabus. Manetualain Dula-dale Malalao-malalafu Na nafadan nae, “Neu' ko fai laa-roes ina' rule-feo dae-bafo' a bukun haas.” Boe ma ana nafada selu' lahenda ra. (Dedean ria tebe-tebe dadi tepo' fo mane' bau-ina' keser Roma, nade Klaudius, homu pareta).e 29 Ramatua Yesus lahendan fo rai Antiokia ramanene Agabus dedean sira, boe ma rala hara' fo rabubua doi' fee sira toranoon kamahere' manato'a-manataa' rai propensi Yudea. Ara fee tuka sira esa-esa' ko hahapu-dadain. 30 Ara rabubua ra doi sira, boe ma tudu ra Barnabas no Saulus, reni doi' sira leo malaka jama'at fo rai naa, ela bati fee lahenda manato'a-manataa' ara.