Ara here lahenda hitu fo ralalau' lahenda manato'a-manataa' ara
6
Tepo' ria, Ramatua Yesus lahenda nara tamba dodou'. Tehuu sira bubua dua dedean. Lahenda Yahudi sira ruma dedea pake dedea Aram, ma ruma dedea pake dedea Yunani. Basa fai' hida, boe ma dadi nahuu-nalena' nai bubua kadua' ia ra. Bubua' fo pake dedea Yunani, dale nara ta malole a ro bubua' fo pake dedea Aram. Bubua' Yunani rae, “Ia ta la'e so'! Fai-fai' emi bati nanaa-nininu' sona, boso' esa bera lena esa. Huu fo ami ina-falu mara ta hapu babati'.”2 Huu ria naa, Ramatua' a lahenda nadedenu kasanahulu duan sira, rabubua ra Ramatua Yesus lahenda nara katema' asa, boe ma ara dedea rae, “Basa toranoo kara emin! Kalu ami hahae tui-beka Manetualain Hara-dasin, fo urus emi nanaa-nininu mara, bisa boe, tehuu ta la'e fa. 3 De ami afi mae leo' ia: malole lena' here ma lahenda hitu neme emi mai. Saka lahenda nade malole, leleo-lala'on malole, nalela' hihii-nanau' dodou', ma Manetualain Dula-dale Malalao-malalafu Na ator soda na. Kalu emi here lahenda leo naa', sona ami so'u si fo urus ina-falu ra nanaa-nininun. 4 No ria naa, ami bisa hule-haradoi lena ria, ma tui-beka Manetualain Hara-dasin.”
5 Boe ma ara sipo' Petrus asa dedean ria, de here ra lahenda hitu. Lahenda, sira si':
Esa nade Stefanus, namahere matetu' Ramatua Yesus, ma Manetualain Dula-dale Malalao-malalafu Na pake ni. Ma feke' ara si':
Filipus,
Prokorus,
Nikanor,
Timon,
Parmenas,
ma Nikolas, neme kota Antiokia mai. Ria ta lahenda Yahudi, tehuu ana maso' agama Yahudi.
6 Boe ma roo lahenda kahitu' fo ri' here ra si a leo Ramatua' a lahenda nadedenu nara reu. Lahenda nadedenu' sira lalaa lima nara neu' asa, ma hule-haradoi fo so'u si dadi lahenda mana urus nanaa-nininu' ela lahenda manato'a-manataa' ara hapu babati' bei dedesi'.
7 De Manetualain Hara-dasin tui-bekan nai basa mamana' ain. Ma lahenda fo ri' tuka Yesus Eno Masoda Na, tamba raroo nai Yerusalem. Malaka agama Yahudi dodou' rabua-raesa ro Yesus lahenda nara.
Ara hopu ra Stefanus
8 Tepo' ria, Manetualain fee Stefanus ua-nale' dodou'. Ana fee Stefanus kuasa boe, fo tao tanda heran ma hihii-nanau' bau-ina', ela lahenda dodou' rita mata'. 9 Nai naa, lahenda Yahudi hida reme dae doo' mai. Reme kota Kirene, Kota Aleksandria, propensi Kilikia ma propensi Asia. Maulu na ara dadi ata fee lahenda feke', tehuu mate'e na sira ramatua na po'i si. Boe ma lahenda ia ra rabua ao nara rai Yerusalem. Ara biasa leo uma mamaso' esa reu nade, ‘Po'i neme Ata a mai’. Fai' esa boe ma ramanene Stefanus dedea, tehuu ara ta rahii', de ralelena ao' roon. 10 Tehuu Stefanus malela na seli, huu fo ana dedea pake Manetualain Dula-Dale Malalao-malalafu Na kuasan, de ta rasekin. 11 Huu ria naa, ara saka eno tadalu'. Boe ma ara seba lahenda hida fo tui pepeko' rae, “Ami mamanene lahenda ia dedea ta malole soa-neu' Musa ma Manetualain! Tebe ria nana namumulu-namamae'!”
12 Ara duduku' lahenda, losa' lahenda Yahudi ra lasi nara, ma mesen agama ra ramanene. Ara ramanene leo' naa, boe ma ramanasa. Ara reu hopu Stefanus, de hela roo ni neu nataa nai mamana parisa' dedea agama. 13 Mana sakasii pepeko nara tui popode' maa nara la'e-neu' Stefanus rae, “Lahenda ia, dedea tadalu' kokosen la'e-neu' Uma Mamaso Yahudi Ina. Ma ana dedea nadadae Manetualain paretan fo ri' ba'i Musa naonda si fee ita a. 14 Ami boe mamanene ni dedea nae, Yesus, lahenda Nasaret ria nau fate heni Uma Mamaso Yahudi Ina, ma tao nalutu ita atoran hadas fo ri' ba'i Musa naonda si fee ita a.”
15 Boe ma lahenda fo ri' tesa rai mamana parisa dedea agama ria, bebesa ratalolole Stefanus, nana huu mata-idun sama leo' Manetualain eila'o-limalopen rai nusatetu-ikutema' a mata-idun.