Ananias no Safira mate si, nana huu ara soba Manetualain Dula-dale Na
5
Tehuu tepo' ria tou' esa, nade Ananias, sao na nade Safira. Dua si se'o dae bibia ana' esa boe. 2 Tehuu dua si rala hara' fo rafuni doi' ruma neme dae ria beli na. Boe ma Ananias neu nafada Ramatua' a lahenda nadedenu nara nae, “Ami besa' ko se'o basa dae bibia ana' esa, de ami fee katema' doi nara leo Manetualain neu.” 3 Tehuu Petrus nasapaan nae, “Ananias! O talalu maan seli'! Tao leo' bea de o manuu dale leo naa', fo mafuni ma doi' neme dae ria beli na mai? O dale ma ta tadalu naan seli, nana huu o tuka malaka nitu a hihii-nanaun. O maparani masarole-masarali neu' Manetualain Dula-dale Malalao-malalafu Na. 4 Leo ia'! O se'o dae ria do ta'a boe, neme o mai. Kalu o se'o maan, de mae fee katema' doi na do ta'a boe, neme o mai. Ubea' taon de o tao leo naa'? O soba-soba tao mamakoa ami lahenda dae-bafo' a, tehuu ta hapu lahenda bisa tao namakoa Manetualain!”
5 Ananias namanene Petrus nae leo' naa, boe ma kekeneu te bara neu' dae', de maten tuti' a. Basa lahenda fo ramanene tutui' ria, ara bii raan seli. 6 Boe ma ana muri-ana' hida uma dale' reu, ara popoti ra Ananias popora na, de reu ratoin.
7 Basa de bate jam telu bali, boe ma Ananias sao na mai, tehuu ana ta bubulu' mana dadi' ria. 8 Petrus natanen nae, “Leo' bea, mama? Mama kasa se'o dae a nana beli na ria', do?”
Ana nataa nae, “Tebe leo' naa, papa. Dae a beli na ri' naa'.”
9 Boe ma Petrus nasapaa ni nae, “Tao leo' bea de o mo sao ma mala hara' fo soba Manetualain Dula-dale Malalao-malalafu Na? Mita'! Lahenda ra besa' ko rolo reni sao ma reu ratoin, de fali mai si so. Selu' baiana' ia te ara rolo reni popora ma, ratoin neu' sao ma boboa na.”
10 Ina' a namanene Petrus dedea nae leo' naa, boe ma kekeneu te leku neu, de maten tuti' a. Ana muri-ana' ara fali mai si, te rita ina' a maten so. Boe ma ara rolo reni popora na, ratoin neu' sao na boboa na.
11 Boe ma lahenda fo ri' ramahere Yesus, ara bii. Ma basa lahenda feke' fo ramanene la'e-neu' Ananias no Safira mamate nara, sira boe bii'.
Petrus asa puli ra lahenda dodou'
12 Fai ria Yesus lahenda nadedenu nara, tao tanda heran dodou-ina', de lahenda ra rita. Lahenda nadedenu' sira rahii' maso' leo Manetualain Uma Mamaso Yahudi Ina Na dale' reu ma rabua tei'esa-dale'esa nai Teras Mane' Soleman. 13 Fai ria, lahenda dodou' io Ramatua Yesus lahenda nara. Tehuu lahenda bea bei ta namahere Yesus, ana ta naparani maso' naa neu nabua no si.
14 Tehuu lahenda fo namahere Yesus, boe-boe tamba dodou', ina-tou'. 15 Fai ria hihii-nanau' sira dadi leo naa', de lahenda ra roo lahenda kamahedis ara, rapeu' asa reu' nea' lain nai eno' a suu na. Nana huu afi rae, “Kalu Petrus no Yohanis la'o resi' ia, leo mae noi salao nara boe, kamahedis ara te'e ra ao nara.” 16 Boe ma lahenda ra roi mai-mai' a reme koro manenea' nai kota Yerusalem. Ara rolo reni lahenda kamahedis nara, de Ramatua' a lahenda nadedenu nara puli ra katema' asa. Ma ara roo sira lahenda nitu heke nara, de Ramatua' a lahenda nadedenu nara usi heni nitu sira katema'.
Yesus lahenda nadedenu nara hapu susa
17 Huu no Ramatua Yesus lahenda lahenda nadedenu nara nonoi-tataon, de malaka agama Yahudi a malaka bau-ina na ma nonoon neme partei Saduki, ete' ao nara. 18 Huu ria naa, ara hopu ra Yesus lahenda nadedenu nara, de tee si leo bui dale' reu.a
19 Tehuu hatun ria, Manetualain eila'o-limalopen esa neme nusatetu-ikutema' a mai leo bui a neu, de soi fee si lelesu a. Boe ma nalala'o noo si dea' reu, de nafada si nae, 20 “Besa' ia emi leo Manetualain Uma Mamaso Yahudi Ina Na meu, fo mafada basa-basan neu' lahenda fo rai naa, ela ara tuka Ramatua' a Enon fo ri' Neni Masoda Bebeu' ia.”
21 Balahaa' balahaa anan, boe ma ara tao tuka Manetualain eila'o-limalopen ria hehelu na. Ara maso' leo Uma Mamaso Yahudi Ina a kintal na reu, de ara ranori-rafada lahenda rai naa.
Ta doo bea boe', te malaka bau-ina' ria no nonoo nara mai sama-sama ro basa lahenda bau-ina' Israel ma lasi nara. Ara rabua fo saka' parisa' dedea' agama la'e-neu' Ramatua Yesus lahenda nadedenu nara. Boe ma ara radenu manea ra, reu rala Petrus asa reme bui dale' mai, fo urus dedea' ria.
22 Tehuu manea ra losa bui a, te Petrus asa re'es ana bui dale'. Boe ma manea ra reu rafada lahenda bau-ina' ara nai mamana parisa dedea' agama. 23 Ara rafada rae, “Papa kasa boso' mamanasa. Ami meu te bui a lelesu nara mana koe naisa'. Manea ra boe basa si rapadei rai naa. Ami madenu si soi lelesu a, de ami dale' meu, tehuu ta mita hata esa boe'.”
24 Malaka agama Yahudi malaka nara ma malaka manea Manetualain Uma Mamaso Yahudi Ina Na ramanene leo' naa, boe ma mopo aafi nara, de roi ramakokoa' a.
25 Boe ma lahenda esa mai nafada nae, “Papa kasa nenene dei! Lahenda fo ri' ena si rai bui dale' a, rai dea' ia. Besa' ia ara ranori-rafada rai Uma Mamaso Yahudi Ina dale'!”
26 Malaka manea Uma Mamaso' a namanene leo' naa, boe ma pareta lahenda manea nara reu hopu selu' Petrus asa. Tehuu ara bii', nana huu lahenda dodou' nenene Petrus dedea. Ara afi rae, “Boso' losa basa lahenda sira rameru fo ara pia ita.” Huu ria naa, ara reu hopu selu' Petrus asa, tehuu ta raparani bara'aai si.
27 Ara roo Petrus asa leo mamana parisa dedea' a reu, boe ma malaka bau-ina' a natane si 28 nae, “Ami horo emi fo boso' manori-mafada lahenda dodou' la'e-neu' Lahenda fo ri' neni eno masoda bebeu' ria, hete?! Emi laka batu mara sona! Emi ta tao dale' neu' ami pareta ma, tehuu emi tao tuka emi hihii-nanaum! Emi manori-mafada rule-feo kota Yerusalem ia. Nonoo' leo emi sale ami mae, ami ri' madenu lahenda ramate Yesus.”b
29 Boe ma Petrus napadei de dedea neni basa si haraoe nara nae,
“Papa kara emin! Kalu lahenda dae-bafo' a pareta na nalena-laka neu' Manetualain hihii-nanaun, sona ami ta bisa tuka. Ami muste tuka noi Manetualain pareta Na. 30 Lahenda fo soi fee ami eno' masoda bebeu' a, nana ri' Yesus. Lahenda ria ri' emi londa-lake maisan nai ai kake'. Neme fai a ulu na mai, ita ba'i nara hule-haradoi neu' Manetualain fo ri' Ana fee Yesus nasoda selu' a!
31 Besa' ia Manetualain so'u na Yesus dadi Ria lima boa ona Na. Yesus homu kuasa sama leo' mane bau-ina'. Ria ri' soi-tefa na lahenda reme sala-siko nara mai. Ana fee ita lahenda Israel eno' ela saledale-tu'etei ara, fo tatafali tuka Manetualain eno roo-tetun. No ria naa, Manetualain dale Na masufu, de Ana ta nafarene ita nusa' Israel sala-sikon so'. 32 Huu fo ita tita mata' tebe Yesus maten, tehuu nasoda selu'. Besa' ia Manetualain Dula-dale Malalao-malalafu Na nafada hihii-nanau' ia, neu' lahenda fo ri' tuka Yesus Eno Masoda Na.”
33 Basa lahenda fo ratuu' rai mamana' parisa dedea' ria ramanene Petrus dedean sira, boe ma ete' ao nara de nau raisa Ramatua' a lahenda nadedenu nara. 34 Tehuu tou' esa, nade Gamaliel, natuu' nai naa parisa' dedea' ria boe. Lahenda dodou' hada' ana, huu fo ria nana mesen malela' esa neme partei agama Farisi. Petrus dedea basa, boe ma ara nau raisa ni, tehuu Gamaliel foa napadei', de nadenu lahenda ra roo Petrus asa reu' dea' lalai. 35 Ara kalua dea' reu, boe ma Gamaliel dedea no malaka sira nae,
“Toranoo kara emin! Ita besa-besa! Boso' ita tapue tao tadadalu lahenda ia ra. Ita muste afi tatalolole dei. 36 Emi bei mafarene tou' esa nade Teudas, maten doo' a so. Ana bei nasoda a, hule aon nae ria lahenda bau-ina', losa' lahenda bate natun haa tuka ni. Tehuu fai fo raisa ni, lahenda mana tuka nara ralai kofela, losa' besa' ia ta mita esa mata-idun boe'. Ralai ramopo mata nara so!
37 Emi muste mafarene tutui' esa bali. Tepo' ria, naraa la'e mana pareta ra dui' lahenda ra dedesi na rule-feo nusa' a katema'. Tou' esa, nade Yudas, lahenda Propensi Galilea. Lahenda dodou' tuka ni. Tehuu lahenda raisan so. Boe ma lahenda mana tuka nara ralai kofela ii-ona' losa' ta mita esa mata-idun boe'.
38 De besa' ia, toranoo kara emin, au aafi ka leo ia': boso' taisa si, reme' naa. Huu fo kalu sira nanori-nafadan ma nonoi-tatao nara neme lahenda dae-bafo' a mai, tantu ta ranenete rala' doo' a, neu' ko sapu-lalo. 39 Tehuu kalu nanori-nafada' ia tebe neme Manetualain mai, neu' ko emi ta bisa matuda si. Huu ria naa, emi besa-besa. Boso' losa emi ri' malena-laka neu' Manetualain.”
Basa si ramanene leo' naa, boe ma rataa tuka Gamaliel lelea-nonoren. 40 Boe ma raloo lahenda nadedenu' sira dale' reu', de radenu lahenda ra popo'o si. Popo'o basa, boe ma ara horo fo ta bole sesei' Yesus nade Na so'. Basa de ara po'i lahenda nadedenu' sira.
41 Lahenda nadedenu sira la'o ela mamana parisa dedea' ria. Ara afi rae, leo mae nade nara raboo nana huu tuka Yesus, tehuu ara ramaho'o, huu fo Manetualain tao si reu' naraa hapu susa leo naa'. 42 De tuka-tuka fai', ranori-rafada lahenda rae, “Lahenda fo ri' Manetualain teka-here mema' neme fai a ulu na mai, nana ri' Yesus.” Ara rafada hihii-nanau' ria la'o naroo nai lahenda ra uma nara, ma nai Uma Mamaso Yahudi Ina a boe.