Malaka agama ra raloo Petrus no Yohanis mai rataa si
4
Fai ria, Petrus no Yohanis bei dedea ro lahenda sira, te lahenda bau-ina' hida mai. Sira ruma malaka agama Yahudi, lahenda reme partei agama Saduki ma malaka manea Uma Mamaso Yahudi Ina. Ara mai nana nau ratatane ao' ro Petrus no Yohanis. 2 Lahenda bau-ina' sira ramanasa nana huu dua si tui basa lahenda ra rae, “Yesus maten tehuu nasoda selu'. No ria naa, Yesus soi eno' fee lahenda mana mate' ara, fo rasoda selu'.”a 3 Boe ma ara pareta lahenda nara fo hopu ra dua si. Tehuu no ledo a saka' tena, de ena dua si reu' bui dale', fo balahaa' dei ara parisa' dedea nara. 4 Tehuu lahenda fo rahii' ramanene lahenda nadedenu' sira, kadodou na manaku rae, hata fo ara ranori-rafadan a, mema' tebe. Huu ria naa, sira lahenda nara tamba dodou' bate rifun lima. 5 Balahaa' boe ma lahenda bau-ina' Yahudi ra rabua ao nara rai Yerusalem. Sira nana, malaka ra, lasi' ara ma mesen agama Yahudi. 6 Malaka agama Yahudi bau-ina', Hanas, nai naa boe. Lahenda bau-ina' feke' ara si' Kayafas, Yohanis, Aleksander ma malaka bau-ina' a toranoo nara rai naa boe. 7 Basa si tesa boe ma ara pareta fo reu rala Petrus no Yohanis, mai rataa malaka sira. Dua si losa boe ma ara ratane si rae, “Tao leo' bea, de emi bisa puli ma lahenda luku' ria? Emi pake bea kuasa na? Bea ri' nadenu emi, de maparani tao leo naa'?”
8 Manetualain Dula-dale Malalao-malalafu Na tao napararani Petrus, de nataa si nae,
“Papa sara, fo ri' lahenda bau-ina' ma lasi' nusa Israel emin! Boso' mamanasa' kalu ami mamakoa. 9 Nonoo' nae papa sara nau saka dedea' mo ami, nana huu ami puli ma lahenda luku' esa. Ma emi nau bubulu' ami pake bea kuasa na? 10 De au ataa emi leo ia': papa sara tantu bei mafarene lahenda Nasaret, fo ri' nade Yesus. Ria nana Kristus, fo ri' Manetualain tudu mema' Ana neme fai a ulu na mai. Emi londa-lake maisan nai ai kake'. Tehuu Manetualain fee Ni nasoda selu'. Au nau papa sara ma basa lahenda Israel bubulu', huu fo ami puli ma lahenda luku' ria nana pake Yesus kuasa Na. 11 Yesus ia nana ri' mana dui' nai Manetualain Susura Makamoi Na nae,
‘Batu esa tukan ara, tu'u henin so;
tehuu besa' ia batu ria dadi batu buku'.’b
12 Nai dae-bafo' ia katema', Manetualain ta soi eno feke', fo po'i-tata na ita teme sala-siko' a mai. Noi eno' esa' a, ri' Yesus. Kalu ta Ria, sona ta hapu lahenda feke' esa bisa po'i-tata na ita boe'.”
13 Lahenda fo ratuu' rai naa, ara bubulu' Petrus no Yohanis nana noi lahenda aana', sama leo' mana sakola taa'. Tehuu ara heran nana huu dua si raparani dedea ta pake bibila-babaa'. Tamba neu' ara bubulu' lahenda sira dua ei' esa ro Yesus. 14 Huu ria naa, basa si bafa nara dadi' manarau' losa' ara ta dedea dodou' so', tamba neu' lahenda luku' fo ri' te'e na aon a nai naa boe, napadei nai sira mata nara. 15 Boe ma radenu Yesus lahenda nadedenu sira dua rae, “Emi dea' meu lalai dei.” Boe ma ara rafee aafi'. 16 Ara dedea-rao' rae, “Toranoo kara emin! Ita muste tao lahenda kadua' ia ra leo' bea? Basa lahenda rai Yerusalem bubulu', sira dua tao tanda heran ia. Ita bei talena tae ubea' bali? Te buti na ria' so. 17 Malole lena' ita saka eno', fo hihii-nanau' ia boso' bekan nai basa mamana' ain. Malole lena', ita tabibii' dua si ela ara boso' ranori-rafada la'e-neu' Yesus Eno Masoda Na. Kalu ara ta nau ramanene, sona dei ritan!”
18 Boe ma raloo dua si dale' reu selu', de rafada si rae, “Besa-besa! Emi ta bole manori-mafada lahenda la'e-neu' Yesus!”
19 Tehuu Petrus no Yohanis rataa si rae, “Soba papa sara dodoo ao mara. Bea ri' malole lena? Tuka papa sara pareta ma, do tuka Manetualain pareta Na? 20 Huu fo ami mita mata' ma mamanene ao mara hihii-nanau' dodou' so. Tao leo' bea de ami muste ena bafa mara fo boso' tui lahenda!”
21 Tehuu lahenda mana parisa dedea' sira horo si bali. Boe ma ara po'i dua si, nana huu ara ta bubulu' rae, huku si reni' eno' ubea'. Ma ara bii', boso' losa lahenda kakabaina' fo rai dea' a tao kaco. Ara io-oa Manetualain, nana huu lahenda luku' ria te'e na aon. 22 (Lahenda ria lukun teu' haa hulu lena' ara, besa' ko ana bisa la'o.)
Yesus lahenda nara hule-haradoi ela boso' ara bii'
23 Ara po'i Petrus no Yohanis, boe ma dua si fali leo nonoo nara reu. Dua si tui basa hata fo malaka agama Yahudi malaka nara ma lasi' ara horo si a. 24 Ramanene leo' naa, boe ma basa nonoo nara dale' esa de hule-haradoi rae, “Manetualain mana Kuasa Bau-ina', mana adu lalai ma dae-ina' a no basa oe-isin.c 25 Fai a ulu na Manetualain Dula-dale Malalao-malalafu Ma, pake ba'i Daud dadi Manetualain mana nesi matam. Ana nafada mema' nae, neu' ko lahenda nalena-laka neu' Yesus. Huu fo dui' nae:
‘Lahenda nusa feke' ara ramanasa nana huu dedea tui a,
Ara rafarara'u tao dedea' huu-peda taa'.
26 Basa mane' nai dae-bafo' a, rabua fo nau ratati soa' Ramatua' a;
ma malaka ra rala hara' fo soa' Manetualain ma Kristus,
Lahenda fo ri' Manetualain tudu mema' Ana neme fai a ulu na mai.’d
27 Hata fo ba'i Daud dui' a besa' ia dadi so. Ma sosoa-raraan besa' ia makaledo' a so. Tebe nai kota ia, mane' Herodes no gubernor Pontius Pilatus rabua ro basa ami lasi' Israel ara ma nusa feke' a malaka nara. Basa si rala hara' fo ralena laka neu' Yesus, Lahenda fo ri' Manetualain teka-heren a.e 28 Tehuu besa' ia, ita bubulu' basa sira natetu na Manetualain hihii-nanaun, tuka hata fo Manetualain naetu' mema' nai fai ulun na. 29 Besa' ia Manetualain mete masudi si, te ara tao rabibii' ami. De ami hule Manetualain tao mapararani ami, ela ami tui-beka fee lahenda Manetualain Tutui Malole Ma la'e-neu' Yesus nai basa mamana' ain. Ma ami ta bii-mamata'u. 30 Ami boe hule Manetualain fee ami kuasa, ela ami bisa puli ma lahenda kamahedis ara, ma tao tanda heran rupa', ela lahenda bubulu' rae, kuasa ria neme Lahenda Malalao-malalafu' fo Manetualain madenun a, ri' Yesus. Manetualain, ami huhule-haradoi ma te'e ada' ia.”
31 Ara bei hule-haradoi, te uma fo sira rai dale' a natakeko. De basa si hapu Manetualain Dula-dale Malalao-malalafu Na. Boe ma ara kalua de reu tui-beka Manetualain Tutui Malole Na ta pake bibila-babaa'.
Lahenda kamahere' ara rasoda lepa bera' sama-sama, ma ramaho'o sama-sama
32 Lahenda fo ramahere Yesus, nana dale' esa ma rasue-ralai ao. Ara ta malitua, ara ratulu-rafali ao. Bea ranuu ubea', sona ara ator fo pake reu' esa.f 33 Manetualain fee lahenda nadedenu nara kuasa, fo tui-beka fee lahenda rae, Ramatua Yesus nasoda selu'. Huu fo sira rita mata'. Ma Manetualain fee si ua-nale' dodou'. 34-35 Neme sira mai, lahenda ruma se'o oe-dae, do uma, de doi nara fee si leo Ramatua' a lahenda nadedenu nara reu, fo urus reni' lahenda ra parluu na. Huu ria naa, ta hapu lahenda esa to'a-taa boe'.
36-37 Conto leo' Yusuf. Ria nana Lewi tititi-nonosin, lahenda pulu Siprus. (Ramatua' a lahenda nadedenu nara raloon sona rae, ‘Barnabas’, sosoa na nae, ‘lahenda fo nahii' fufu'a-aali lahenda feke'’.) Ana se'o daen bibia ana' esa, boe ma neni doi' sira fee si reu' Ramatua' a lahenda nadedenu nara.