Petrus puli na lahenda luku' esa
3
Fai' esa, li'u telu leodaen, Petrus no Yohanis leo Manetualain Uma Mamaso Yahudi Ina Na reu, fo hule-haradoi ro lahenda feke' ara. 2 Ara maso' tuka lelesu bafa' esa, nade ‘Lelesu Bafa' Malole’. Nai naa, ara rita tou' esa lukun neme mama na boki ni a. Tuka-tuka fai', lahenda o'o roon leo mamana' ria neu, fo ana nalamemei neme' sudi bea, fo ri' maso' leo Uma Mamaso Yahudi Ina a dale' reu. 3 Ana nita Petrus no Yohanis maso' leo dale' reu, boe ma ana loo' lima na nae, “Papa kasa! Sue au sona, fee au ubea' bai'.” 4 Dua si bebesa ni, boe ma Petrus nae, “A'a! Relu leo ia' mai dei.”
5 Ana boti' laka na, de mete dua si ma afi nae, “Dua si tantu fee au ubea'.”
6 Tehuu Petrus nae, “A'a! Au ta anuu doi' sen esa boe'. Tehuu au fee a'a hata fo besa' ia au anuu a. A'a nenene matalolole! No Yesus Kristus lahenda Nasaret ria kuasa Na, au adenu a'a foa fo la'o leo!”
7 Boe ma Petrus tai na tou luku' a lima ona na de hela nafoan. No besa' ria boe, ei na fali na aon. 8 Kekeneu te, ana paraboku de napadei. Ana soba nasudi ei na, de la'o neu-mai. Boe ma ana tuka dua si leo Uma Mamaso' dale' reu. Ana la'o, paraboboku ma io-oa Manetualain. 9 Basa lahenda ra rita ni la'o ma io-oa Manetualain.
10 Basa si ralela' ana, de roi rapopoo' bafa nara ma rae, “Ia nana, tou luku mana malamemei', fo ri' natuu' nai Lelesu Bafa' Malole a, hete? Ubea' taon de leo ia'?”
Petrus dedea nai Uma Mamaso Yahudi Ina dale'
11 Tou' ria tutuka' Petrus no Yohanis. Telu si losa teras esa ri' ‘Teras Mane' Soleman’. Boe ma basa lahenda eo ra si ma heran. 12 Petrus nita lahenda sira, boe ma ana dedea nae, “Lahenda Israel emin! Ubea' taon de emi heran mita hihii-nanau' ia? Ubea' taon de emi mete mahere ami? Emi mae lahenda ia bisa la'o, nana huu ami pake dedea', do ami makate tuka Manetualain? Do, leo bea'? 13 Au saka' afada leo ia': ita bei-ba'in, Abraham, Isak ma Yakob do'o-tabe' Manetualain, fo ri' nadedema Lahenda fo Ana teka-here naan, ri' Yesus. Yesus ria, nana Lahenda fo fai maneu' a emi feen leo gubernor Pilatus neu a. Gubernor nau po'i Ni, tehuu emi malena-laka neu' ria hihii na, ela boso' po'i Yesus.a 14 Tehuu Yesus nana Lahenda sala' taa'. Dale Na roo-tetu'. Gubernor nau po'i Lahenda sala taa' ria, tehuu emi malena-laka neu' ana. Tadalu lena bali, emi duduku-papau' fo ana po'i lahenda kanisa' esa fee emi.b 15 Boe ma emi maisa Yesus. Sekonaa te, Ria nana ita masoda na huu na. Tebe Ana mate, tehuu Manetualain fee Ni nasoda selu'. Ma Ria ri' ami mita mata'.
16 Emi basa malela' tou luku' ia. Besa' ia bara'ai na aon, tehuu ta ami ri' puli ni. Ami ta manuu kuasa hata-hata esa boe'. Kuasa ria neme Yesus mai. Tou' ia bara'ai na aon, nana huu namahere Ramatua Yesus. Yesus ri' puli naan nai emi mata mara.
17 Toranoo kara emin! Besa' ia, au bubulu' emi mo malaka mara tao tadalu' neu' Yesus, tehuu emi ta bubulu' hata fo emi tao a. 18 Tehuu Manetualain nafada mema' neme fai a ulu na mai, pake mana nesi mata nara nae: Kristus nana Lahenda fo Ana teka-here Ni a, muste lepa doidoso. Ma besa' ia hihii-nanau' ria dadi so. 19 Huu ria naa, emi muste saledale-tu'etei mara ma fali leo Manetualain meu, ela Ana sae-safe heni sala-siko mara ma nafarene heni emi sala-siko mara. 20 Neu' ko Manetualain natetea emi dale mara. Ma Kristus fo ri' Manetualain teka-here Ni a, nadenu fali' ana leo emi mai. Ma Kristus ria, ri' Yesus fo parnaa Ana nadenu Ni leo emi mai. 21 Neme fai a ulu na mai, Manetualain dedea pake Ria mana nesi mata nara nae, ‘Neu' ko Manetualain tao natetu basa hihii-nanau' ara losa' dadi bebeu'.’ Yesus muste nahani nai Ria Mamana Lalao-lalafun, losa' Ria ledo-fai mamai Na, ela tao nabeu basa hihii-nanau' ara.
22 Fai a ulu na ba'i Musa parnaa nafada lahenda Israel nae:
‘Emi Manetualaim fo ri' nanuu haak pareta emi a, neu' ko nadenu Lahenda esa neme emi talada mai dadi Ria mana nesi matan, sama leo' Ana pake au dadi Ria mana nesi matan. De emi muste pasa' ridoo mara fo nenene basa-basan fo Ana nafada emi a.c 23 Tehuu bea ri' ta nau namanene natalolole Lahenda ria dedea Na, neu' ko bika-bati neme Manetualain lahenda nara mai. De ta nanuu haak so'.’d
24 Ta noi ba'i Musa ri' dedea nae leo' naa. Manetualain pake lahenda feke' ara dadi Ria mana nesi matan, ma ara tui rae leo' naa boe. Sama leo' fai fo Manetualain pake ba'i Samuel nafada hihii-nanau' fo ri' besa' ia ita tita mata'. 25 Manetualain helu neu' ita ba'in Abraham nae,
‘Neme' o tititi-nonosim mai, neu' ko Au fee ua-nale' neu basa lahenda nusa' nai dae-bafo' a.’e
Hehelu-barataa' fo Manetualain fee neu' mana nesi mata fai ulu' ara, besa' ia dadi nai emi, au toranoo' nusa Israel ka. 26 Manetualain nadenu Ana teteka-heheren ria, natudu eno' ela emi saledale-tu'etei mara. No ria naa, Ana natudu dale malole Na neu' emi. Manetualain nadenu Ana' ria naulu' leo emi mai, besa' ko nadenun leo lahenda nusa feke' ara neu. Ria dadi ua-nale' soa-neu' ita basa.”