Lahenda ra hapu Manetualain Dula-dale Malalao-malalafu Na
2
1-2 Naraa la'e lahenda Yahudi ra fai' malolen, fo ri' rae, ‘Fai Pentakosta’,a basa lahenda fo ri' tuka Ramatua Yesus ara rabua rai uma esa.b Kekeneu te ara ramanene hoo' neme lalai mai, nonoo' leo ruli a. Hoo' ria bau na seli losa' lahenda fo rai naa, ta bisa ramanene lahenda feke' ara hara nara. 3 Boe ma ara rita nonoo' ai-pila' a, babati neu' sira esa-esa lain. 4 De basa si hapu Manetualain Dula-dale Malalao-malalafu Na. Boe ma ara mulai dedea pake lahenda feke' ara dedean, tuka hata fo Dula-dale' a fee si ela dedea. 5 Fai ria, lahenda Yahudi dodou' reme nusa rupa' nai dae-bafo' ia, mai rabua rai Yerusalem. Dale nara rahii' tuka Manetualain. 6 Basa si ramanene hoo' ria, boe ma ara mai rarurupu reu' mamana' ria. Sira ramanene ao nara Ramatua Yesus lahenda nara dedea pake sira esa-esa' ko dedean. Huu ria naa, ara heran. 7 Basa si roi rapopoo' bafa nara, ma dedea rae, “Lahenda mana dedea ia ra, nana basa si lahenda Galilea, hete? 8 Tehuu ubea' taon ita tamanene sira dedea pake ita esa-esa' ko nusa na dedean? 9 Ita teme propensi Partia, Media, Elam, Mesopotamia, Yudea, Kapadokia, Pontus, Asia, 10-11 Frigia, Pamfilia, Masir, reme Libya nanenea' kota Kirene; ita ruma teme kota Roma; ruma bali reme pulu Kreta, ma reme dae Arab mai. Ita ruma lahenda Yahudi, ma ruma lahenda nusa feke' fo ri' maso' agama Yahudi. Tehuu ita basa tamanene lahenda ia ra dedea pake ita esa-esa' ko dedean, la'e-neu' hihii-nanau' bau-ina' fo ri' Manetualain noi-taon. Ita heran!”
12 Basa si roi rapopoo' bafa nara, de ratatane ao' rae, “Ubea' taon, de bisa dadi leo naa'? Sosoa na nae ubea' ria?”
13 Tehuu lahenda feke' ruma ramumulu-ramamae' asa rae, “Boso' tao dale' neu' asa, te ara mafu' raan seli.”
Petrus dedea neu' lahenda kadodou' ara
14 Nai naa, Petrus no Ramatua Yesus lahenda nadedenu kasanahulu esa feke nara. Boe ma Petrus foa leo mata neu, de ana dedea neu' lahenda fo tesa rai naa. Ana dedea nambera nae, “Ina-ama, toranoo kara emin! Emi lahenda Yahudi, ma emi mana mai fo leo nai kota Yerusalem ia! Pasa' matalolole ridoo mara, fo nenene au dedea kara, huu fo au saka' afada emi hihii-nanau' penting. 15 Boso' emi mae lahenda ia ra mafu'. Ta leo naa' fa! Mafarerene' te lahenda bei ta rinu mafu' balahaa anan ia, huu fo besa' ko li'u sio! 16 Emi mamanene lahenda ia ra dedea pake emi esa-esa' ko dedean. Matetu na, leo ia': Fai ria Ama' Manetualain nafada mema', pake ria mana nesi matan Yoel nae:
17 ‘Manetualain nafada nae, “Kalu fai-fai mate'e,
Au aonda Dula-dale Ka neu' basa lahenda ra,
Emi ana tou' mara ma emi ana feto mara,
neu' ko Au pake si dadi reu' Au mana nesi mata Ki.
Emi ana muri-ana mara,
neu' ko rita hata fo ri' Au atudu si.
Ma emi lahenda lasi' mara,
neu' ko ralamei la'e-neu' hata fo Au atudu si.
18 Naraa la'e fai-fai mate'e,
Au aonda Au Dula-dale Ka neu' Au ata Kara.
Au aonda neu' tou' ara, ma neu' ina ara.
Neu' ko ara dedea hata fo ri' Au afada si a.
19-21 Neu' ko Ramatua' a Fai Na losa. Fai ria bei ta mai,
tehuu Au tao aulu' tanda heran nai lalai poin.
Ri' ledo a dadi maiu',
ma bula' a pilas sama leo' daa.
Au boe tao hihii-nanau' bau-ina' nai dae-ina' a dae'.
Ri' nonoo' leo daa, ai-pila' ma masu' a kaboboa leo lain neu.
Neu' ko losa Ramatua' a fai marela-masa'an, lahenda fo raloo hule tutulu-fafali' neu' Manetualain,
sira si' hapu popo'i-tatata'.’”c
Ria ri' maulu na Yoel dui' mema'.
22 Toranoo' lahenda Israel emin! Pasa' ridoo mara fo nenene Au saka' dedea. Manetualain tudu na Yesus, lahenda Nasaret ria. Ita bubulu' ria tebe, huu no ita tita mata' Manetualain pake Yesus, fo tao tanda heran ma hihii-nanau' bau-ina'. Emi boe bubulu' hihii-nanau' ia, nana huu Yesus tao tanda heran nai emi talada. 23 Tehuu emi maisa Ni, meni' eno' meu kokoe lahenda tadalu' ara, fo londa-laken nai ai kake'. Sekonaa te, Manetualain bubulu' basa sira neme fai a ulu na mai, tebe natetu na Manetualain dudu'a-aafin.d 24 Tebe emi tao leo naa' losa' Ana mate. Tehuu Manetualain ta nau fee Yesus leo naroo nai lahenda mana mate' ara mamana nara. Huu ria naa, Manetualain po'i naan neme mamates a kuasa na ma fee Ni nasoda selu'. Huu fo Ana naseki mamates a kuasa na.e
25 Maulu na mane' Daud dui' mema' la'e-neu' Yesus nae leo ia':
‘Au bubulu' Manetualain sama-sama no au kose-kose.
Huu ria naa, ta hapu hata esa bisa natuda au boe',
huu fo Manetualain nahani' au boboa ka.
26 Huu ria naa, au amaho'o,
au io-oa Ni la'o naroo,
ma au ahani Ramatua' a no tesatei-tamadale'.
27 Huu fo Ana ta nataa' au sumane ka leo naroo nai lahenda mana mate' ara mamana na.
Ma Ana ta nataa' Ria Lahenda Malalao-malalafun popora na naboo nai rates dale'.
28 Manetualain natudu fee au eno masoda roo-tetu'.
Huu ria naa, au dale ka namaho'o naan seli,
huu no Manetualain sama-sama no au.’f
Ria ri' maulu na mane' Daud dui' mema'.
29 Toranoo kara emin! Besa' ia fee au lela', fo au dedea tuka matetu na oo emi la'e-neu' ita ba'in Daud. Ana dedea nae leo' naa, tehuu ana ta dedea soa-neu' ao-ina heheli na. Huu fo mate ni, de ratoin so. Ria rates na bei nai ita talada losa' besa' ia. 30 Mane' Daud nana Manetualain mana nesi matan esa rian. Ma ana bubulu' Manetualain helu-bartaa neni' sosoo-susupa' nae, Daud tititi-nonosin esa neu' ko homu pareta, ri' Lahenda fo Manetualain tudu mema' ana neme fai a ulu na mai.g 31 Tepo' ria, Daud relu leo doo a nai mata ele. Ma nafada naulu' la'e-neu' Lahenda fo Manetualain tudu mema' ana. Lahenda ria neu' ko mate, tehuu nasoda selu'. Daud boe nae, Lahenda ria ta leo nahani' lahenda mana mate' ara mamanan, ma popora na ta naboo.
32 Lahenda fo Daud nafada a, nana ri' Yesus. Manetualain feen nasoda selu'. Ami basa ia mita mata' Ana nasoda selu'. 33 Ma besa' ia, Manetualain so'u na Yesus homu pareta madema naan seli. Ana natuu' nai Manetualain boboa ona Na, nai mamana' fo ri' Manetualain sadia mema'. Ma Papa Na fee Dula-dale Malalao-malalafu Na neu' Ana, natetu na Ria hehelu Na neme fai a ulu na mai. Ana helu nau naonda Dula-dale Malalao-malalafu' ria neu' ita boe. De Manetualain fee Dula-dale Malalao-malalafu Na, ri' besa' ia emi mamanene ma mita ni. 34 Daud ta hene-ae leo nusatetu-ikutema' a neu, tehuu ria ri' dui' nae,
‘Manetualain nafada neu' au Ramatua ka nae,
“Matuu' mai' Au boboa ona Ka, nai mamana fo ri' Au sadia mema',
35 losa' Au tao a musu-noo mara roi rae' O.’”h
36 Huu ria naa, basa lahenda Israel muste bubulu' no matetu' la'e-neu' Yesus fo ri' emi londa-lake maisan nai ai kake'. Ria nana Kristus fo ri' Manetualain teka-here mema' ana neme fai a ulu na mai. Ma Ria boe nanuu haak pareta ita!”
37 Lahenda ra ramanene leo naa', boe ma dale nara dadi' mana papau'. Ara ratane Petrus ma lahenda nadedenu feke' ara rae, “A'a kara emin! Ami muste tao ubea' bali?”
38 Petrus nataa nae, “Emi esa-esa muste saledale-tu'etei mara ma fali leo Manetualain meu. Emi muste hule fo sarani, dadi tanda nae, emi tuka Yesus Kristus Eno Masoda Na. Ria boe dadi tanda nae, Manetualain sae-safe heni emi sala-siko mara. Ma emi boe hapu Manetualain Dula-dale Malalao-malalafu Na.
39 Huu no Manetualain helu mema', fee Dula-dale Malalao-malalafu Na neu' basa lahenda fo dadi reu' Ria lahendan, ri' emi mo basa upu-ana mara ma lahenda feke' ara boe.”
40 Petrus bei dedea' loa naru' leo naa' no si, ma nafada nae, “Besa' ia lahenda dodou' la'o sala reme eno masoda roo-tetu' a. Huu ria naa, emi muste besa-besa fo boso' tuka lahenda tadalu' ara eno na. Tehuu emi muste tuka Manetualain eno roo-tetu Na. No ria na, emi hapu soda' mana basa taa'.”
41 Lahenda kadodou' sira sipo' Petrus dedea na, de ara tuka Yesus Eno Masoda Na ma ara hule fo sarani si. Fai ria boe, lahenda rifun telu rabua-raesa ro Yesus lahenda nara. 42 Ara rahii' rabua sama-sama ro lahenda feke' fo ri' tuka Yesus. Ma sira esa malole no esa. Tuka-tuka fai', ara makate ramanene Ramatua Yesus lahenda nadedenu nara nanori-nafadan. Ara hule-haradoi sama-sama, ma raa-rinu reu' esa.
Lahenda kamahere ara leleo-lala'on
43 Fai ria Ramatua' a lahenda nadedenu nara tao tanda heran dodou', losa' basa lahenda ra heran ma ara bii-ramata'u. 44 Lahenda fo tuka Ramatua Yesus Eno Masoda Na, nana rabua ma rasoda dale' esa, losa' sira hata-nuun nara, basa si pake reu' esa.i 45 Sira ruma rase'o bua-loas nara ro hata-heton, fo ara babati doi' sira, fee lahenda kamahere' ara tuka sira esa-esa' ko parluu na. 46 Tuka-tuka fai', ara rabua nai Manetualain Uma Mamaso Yahudi Ina Na. Ara raa-rinu reme uma esa leo uma esa reu no namaho'o. Ara rasoda ratulu-rafali ao, ma ta ramanitu-ina. 47 Tuka-tuka fai', ara io-oa Manetualain la'o naroo. Basa lahenda dea ra rahii' asa. Tuka-tuka fai', Manetualain po'i-tata na lahenda, de ara rabua-raesa ro Ramatua Yesus lahenda nara, losa' ara tamba raroo.